საქართველოს შინაგან საქმეთა სამინისტრომ შეიმუშავა საკანონმდებლო ცვლილებათა პაკეტი, რომლის მთავარ მიზანს საგზაო წესების მაქსიმალურად უზრუნველყოფა და საგზაო-სატრანსპორტო შემთხვევების პრევენცია წარმოადგენს.
როგორც შსს-ს ინფორმაციაშია ნათქვამი, ბოლო წლების განმავლობაში, მნიშვნელოვნად გაზრდილი სატრანსპორტო საშუალებების რაოდენობისა და მზარდი მობილობის ფონზე, საგზაო უსაფრთხოება კვლავ გამოწვევად რჩება და მიუხედავად მიღწეული პროგრესისა, საქართველოში ყოველწლიურად საგზაო-სატრანსპორტო შემთხვევების შედეგად ასობით ადამიანი იღუპება ან იღებს ჯანმრთელობის მძიმე დაზიანებას.
„შესაბამისად, საგზაო-სატრანსპორტო შემთხვევები და მასთან დაკავშირებული სიკვდილიანობის მაჩვენებელი სახელმწიფოს ავალდებულებს გადადგას ეფექტიანი ნაბიჯები საგზაო უსაფრთხოების წესების გამკაცრების მიმართულებით.
საგზაო-სატრანსპორტო შემთხვევების გამომწვევი მიზეზების ანალიზის შედეგად დასტურდება, რომ საზოგადოებრივი უსაფრთხოების მაქსიმალურად უზრუნველყოფის მიზნით, აუცილებელია, მნიშვნელოვნად გადაიხედოს და გამკაცრდეს დღეისათვის არსებული სანქციები. შესაბამისად, საქართველოს შინაგან საქმეთა სამინისტროს მიერ მომზადდა საკანონმდებლო ცვლილებათა პაკეტი, რომლის თანახმადაც:
100 ლარამდე იზრდება ჯარიმა სატრანსპორტო საშუალების გზაზე მანევრირების წესების დარღვევისთვის. ამავდროულად, ამ სამართალდარღვევისთვის მართვის მოწმობისთვის მინიჭებული ქულათა რაოდენობა შემცირდება 20 ქულით;
50-დან 100 ლარამდე იზრდება სანქცია 15 კმ/სთ-ზე მეტი, მაგრამ არაუმეტეს 40 კმ/სთ-ის სიჩქარის გადაჭარბებისთვის;
50 ლარამდე იზრდება სანქცია ავტომობილით მოძრაობისას მძღოლის ან მგზავრის მიერ უსაფრთხოების ღვედის გამოუყენებლობისთვის, ამავდროულად, ამ სამართალდარღვევისთვის მართვის მოწმობისთვის მინიჭებული ქულათა რაოდენობა შემცირდება 10 ქულით;
50 ლარამდე იზრდება სანქცია ავტომობილის მართვის დროს მძღოლის მიერ მობილურით სარგებლობისთვის;
დგომა-გაჩერების წესების დარღვევისთვის თბილისის მსგავსად, 50 ლარამდე იზრდება ჯარიმის ოდენობა ქუთაისის, ბათუმის, მცხეთის, რუსთავის, გორის, თელავის, ფოთის, ზუგდიდის მუნიციპალიტეტებში და საქართველოს კურორტებზე.
დამატებით პასუხისმგებლობა დგინდება „BUS LANE“-ზე სამარშრუტო სატრანსპორტო საშუალების გარდა, სხვა სატრანსპორტო საშუალების მოძრაობის საპირისპირო მიმართულებით მოძრაობისთვის, რაც გამოიწვევს დაჯარიმებას 200 ლარის ოდენობით.
ასევე, ახალ სამართალდარღვევად განისაზღვრება სატრანსპორტო საშუალების ტროტუარზე ან ქვეითთა გადასასვლელზე დგომა – გაჩერება, რაც გამოიწვევს დაჯარიმებას 100 ლარის ოდენობით. ამავდროულად, ამ სამართალდარღვევის ჩადენის შემთხვევაში, კანონით განსაზღვრული პირობების არსებობისას, სატრანსპორტო საშუალება დაექვემდებარება სპეციალურ დაცულ სადგომზე გადაყვანას.
აღნიშნული საკანონმდებლო ცვლილებათა პაკეტი საქართველოს პარლამენტს უკვე წარედგინა“, – ნათქვამია ინფორმაციაში.
სანქციების დანიშნულებაა, ადამიანს არ უღირდეს სამართალდარღვევის ჩადენა, როგორც ჩანს, შინაგან საქმეთა სამინისტროს მიერ არსებული სტატისტიკა დამაკმაყოფილებელი არ არის და საჭიროა კანონში ცვლილებები, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი თქმით, კანონში საჭიროა ცვლილებები და სანქციის ისე მორგება, რომ ადამიანს სიჩქარის გადაჭარბება არ უღირდეს, რათა უფრო დიდი ჯარიმა არ გადაიხადოს.
„კანონმდებლობა იმ გამოწვევებს უნდა მოვარგოთ, რაც ქვეყანაშია. საგზაო წესების უკეთესი უზრუნველყოფისთვის „ადმინისტრაციულ სამართალდარღვევათა კოდექსი“ შესაბამის აქტუალიზაციას საჭიროებს. სანქციების დანიშნულებაა, რომ ადამიანს არ უღირდეს სამართალდარღვევის ჩადენა. როგორც ჩანს, შინაგან საქმეთა სამინისტროს მიერ არსებული სტატისტიკა დამაკმაყოფილებელი არ არის. შესაბამისად, საჭიროა კანონში ცვლილებები და სანქციის ისე მორგება, რომ ადამიანს სიჩქარის გადაჭარბება არ უღირდეს, რათა უფრო დიდი ჯარიმა გადაიხადოს. იგივე, რაც გზის უკანონო გადაკეტვას ეხებოდა. აკრძალული ქმედებებია, რომელსაც ადამიანი მაინც თუ სჩადის, ეს იმას აჩვენებს, რომ სანქცია არ მუშაობს და სანქციის ოდენობა საკმარისი არ არის. ამიტომ, პარლამენტი ამაზე რეაგირება. როგორც კი შევხედეთ, რომ გზის უკანონო გადაკეტვაზე სანქცია არ მუშაობდა და პრევენციულ ხასიათს არ ატარებდა, კანონმდებლობა შევცვალეთ და ქუჩა აღარ იკეტება“, – განაცხადა შალვა პაპუაშვილმა.
"პირველი არხი"
