"ეს ყველაფერი ბუმერანგივით უბრუნდება ჩვენ ქვეყანას და სახელმწიფოს"
myrights.ge
"ევროპული დემოკრატების" ლიდერი, პაატა დავითაია აცხადებს, რომ ტელეკომპანია "რუსთავი 2-თან" დაკავშირებით სამართლებრივი პროცესი დასრულდა და პოლიტიკური პროცესი დაიწყო. მისივე თქმით, ყველაზე სამწუხარო ის არის, რომ ეს ყველაფერი ბუმერანგივით უბრუნდება ჩვენ ქვეყანას და სახელმწიფოს. დავითაიას შეფასებით, ამ და სხვა მსგავსმა პროცესებმა საქართველოს ევროატლანტიკურ ინტეგრაციას შეიძლება რეალური საფრთხე შეუქმნას. ის პროდასავლურ ძალებს საარჩევნოდ გაერთიანებისკენ და "ქუჩაში დაგდებული" ხელისუფლების აღებისკენ მოუწოდებს.
"ქრონიკა პლუსი" პარტია "ევროპული დემოკრატების" ლიდერს, პაატა დავითაიას ესაუბრება:
- ფარსია, რასაც მთელი ამ ხნის განმავლობაში „რუსთავი ორთან“ დაკავშირებით ვხედავთ. მაგალითად, ბოლო სხდომაზე ბატონი გვარამიას დასწრებაზე შუამდგომლობა არ დააკმაყოფილეს, რათა მას პოზიცია დაეფიქსირებინა ბრალდებებთან დაკავშირებით, რაც ქალბატონ გუჯაბიძეს წაუყენა. ეს ცალსახად ტენდენციაზე მიუთითებს.
არხის დირექტორს სიტყვის წარმოთქმის უფლებას არ აძლევენ, ადვოკატებს სასამარლო დარბაზიდან აძევებენ, საზოგადოების წარმომადგენლებს აგდებენ და ა.შ. ეს ცხადყოფს, რომ დაკანონებულ უსამართლობასთან გვაქვს საქმე.
მოსამართლე გუჯაბიძემ საკუთარ თავს აცილება არ მისცა და ამით დაადასტურა, რომ სახელმწიფო თანხებს ითვისებდა. იმისთვის იღებდა, რომ დედისგან ბინა ექირავებინა. მაგრამ თქვა, რომ ეს ხელს არ უშლის მიუკერძოებელი მოსამართლე იყოს.
ამ ყველაფრიდან ერთი დასკვნის კეთება შეიძლება - სამართლებრივი პროცესი დასრულდა და პოლიტიკური პროცესი დაიწყო.
ჩემთვის ეს პოლიტიკური პროცესი დიდი ხანია დაწყებულია. მაგრამ დღეს უკვე საზოგადოებისთვის ნათლად გამოჩნდა, რომ საქმე პოლიტიკასთან გვაქვს. ჩათვალეთ, რომ სახელმწიფო აპარატი ამ სასამართლო პროცესზე მხარედ გამოდის. და მოსამართლეები იქცევიან, როგორც მხარე და არა როგორც მართლმსაჯულების წარმომადგენლები.
ამაში ყველაზე სამწუხარო ის არის, რომ ეს ყველაფერი ბუმერანგივით უბრუნდება ჩვენ ქვეყანას და სახელმწიფოს. აი ეს სერიოზული პრობლემაა.
ამასთან დაკავშირებით, ჩემთვის ყველაზე დიდი მესიჯი და გაფრთხილება "ვაშინგტონ პოსტში" გამოქვეყნებული სარედაქციო კოლეგიის წერილი იყო. პირდაპირ არის ნათქვამი, რომ ის პროცესები, რასაც დღეს საქართველოში ადგილი აქვს გაგრძელდება, დასავლეთის კარები დაიხურება.
ვინც ეს სისტემა იცის, "ვაშინგტონ პოსტის" სარედაქციო კოლეგიის წერილი, რეალურად, ღია გაფრთხილებაა. ყოველთვის, შემდგომი ნაბიჯი სახელმწიფო დეპარტამენტის განცხადებაა. ერთი სიტყვით, ეს თეთრი სახლის პირდაპირი გზავნილია საქართველოსთვის.
ამიტომ ყველაფერი უნდა გავაკეთოთ, რომ ხელისუფლების ასეთ შეცდომებს მაქსიმალურად წინ აღვუდგეთ - დავიცვათ სიტყვის თავისუფლება, რათა ქვეყანა არ დაზიანდეს.
ეს ამბავი პირდაპირ მიბმულია საარჩევნო პროცესზე. რატომ არის დღეს ჭიდაობა "რუსთავი ორთან" დაკავშირებით? იმიტომ, რომ ხელისუფლებას რეალური პრობლემები აქვს არჩევნებთან დაკავშირებით. აღარ უნდათ ისეთი ტელეკომპანიის არსებობა, რომელიც თავისუფალ სიტყვას გააშუქებს და იმ რეალობას, რომელიც დღეს ქვეყანაში არის.
მაგალითად, ჩემთვის, როგორც პოლიტიკოსისთვის "რუსთავი ორი" ერთადერთი ტელეკომპანიაა, რომელიც ჩემს გამონათქვამებს აშუქებს. ტელეკომპანია "იმედზე", "საზოგადოებრივ არხზე", სხვა ძირითად არხებზე ჩვენ არ გვაშუქებენ. არ ვსაუბრობ ახალ არხებზე, როგორიცაა "პირველი" და "იბერია", რომლებიც აქტუალურ თემებს აშუქებენ.
მონიტორინგიც რომ ჩაატაროთ, ნახავთ, რომ ზემოაღნიშნულ ეთერებში (იმედი, საზმაუწყებელი) მე, მაგალითად, საერთოდ არ ვჩანვარ. ეს სხვებსაც ეხება.
ეს მეტყველებს, რომ აღნიშნული ტელეკომპანიები ხელისუფლების მხრიდან კონტროლირებადია. ცდილობენ ყველაფერი ისე გააკეთონ, რომ ბატონ ივანიშვილს ასიამოვნონ.
ყველაფერი ერთმანეთზე გადაჯაჭვულია და ამ ფონზე, მიდის ბრძოლა "რუსთავი ორთან" დაკავშირებით.
- სოფელ კორცხელის ინციდენტს რამდენად ადეკვატური რეაგირება მოყვა?
- მინდა გითხრათ, რომ კორცხელის ინციდენტი ქართული სახელმწიფოებრიობისთვის მიყენებული სერიოზული დარტყმაა. ჩვენ ვსაუბრობთ, რომ ევროკავშირისკენ მივდივართ და მეორე მხრივ, ერთმანეთს ვცემთ, ასევე დეპუტატებს ვურტყამთ. ამის შემდეგ ჩამდენების დადგენა დიდხანს გრძელდება. და ბოლოს, არაადევატურია სასამართლო გადაწყვეტლება, რომელიც ვიხილეთ.
ბრიუსელში ვიზალიბერალიზაციაზე მსჯელობისას, ეს საკითხები, სწორედ კორცხელის ინციდენტიც განხილვის თემა იყო. აქედან გამომდინარე, თუ ჩვენ გვინდოდა, რომ ამ მიმართულებით საფრთხეები არ ყოფილიყო, ამ კუთხით მართლმსაჯულებას მკაცრი შეფასება უნდა გაეკეთებინა.
კორცხელში ის სურათი მივიღეთ, თუ როგორ შეიძლება განვითარდეს პროცესები ოქტომბრის თვეში. ამით მწვანე შუქი ავუნთეთ იმ ადამიანებს, ვინც მზად არის ძალადობისთვის.
- იცით რა, დიდი არაფერი დაგემართებათ, თუ ერთმანეთს დაერევით და სცემთო.
ეს არის რეალობა, რაც კორცხელის ინციდენტის გარშემო ტრიალებს. რასაც სახელმწიფომ ხელი უბიძგა, რომ ასეთ ადამიანებს თავისუფლად მოქმედება შეძლებოდათ.
- შესაძლებელია თუ არა, რომ ევროინტეგრაციის კუთხით რეალური დაბრკოლებები წარმოიშვას?
- როგორ აღვნიშნე, ამაზე ბრიუსელში, კომიტეტების სხდომებზე ღია საუბარი იყო. იგივე კორცხელის ინციდენტზე, "რუსთავი ორთან" დაკავშირებით, ასევე სხვა ქმედებებზე. რეალურად, ეს ძალიან სერიოზულ შეშფოთებას იწვევს.
ეს პრობლემები ვიზალიბერალიზაციას საფრთხეს უქმნის. ამ პროცესის შეფერხება ხელისუფლებისთვის ძალიან ცუდად დამთავრდება. ჩვენ მართლაც სერიოზულ ზღვარზე ვდგავართ - თუ უკან, რუსული გავლენის ქვეშ დაბრუნება მოვახერხეთ, ძალიან რთული პერსპექტივა გველის. ვიზების მოხსნა კი წინგადადგმული ნაბიჯი იქნება, რაც ევროპულ ღირებულებებთან კიდევ უფრო დაგვაახლოვებს.
აქედან გამომდინარე, ხელისუფლებამ ყველაფერი სწორად უნდა გააკეთოს. მოითოკონ თავიანთი ამბიციები, ეს შურისძიება, აგრესია და პროცესს გამოუსწორებელი ზიანი არ მიაყენონ.
- რამდენად ქმედითი რეაქცია ჰქონდა ხელისუფლებას ხურჩის მკვლელობაზე?
- ხურჩის მკვლელობა ძალიან სერიოზული თემაა. არანაირი რეაქცია ხელისუფლებას არ ჰქონია და არც ექნებოდა, რა უნდა გაეკეთებინათ? რა უნდა მოემოქმედათ თვითონ მკვლელობის ფაქტთან დაკავშირებით, როცა ამ მიმართულებით სახელმწიფო პოლიტიკა ნულის ტოლია?
ერთ მაგალითს მოვიყვან რომან შამათავასთან დაკავშირებით, რომელიც წინა ხელისუფლების პერიოდში ამ სიტუაციებს კურირებდა და მთელ პერიმეტრს აკონტროლებდა. მინდა პირდაპირ გითხრათ, რომან შამათავას პერიოდში სეპარატისტული გამგეობა, რომელიც გალის ტერიტორიაზე უნდა ყოფილიყო, რეალურად ტყვარჩელში განლაგებული იყო. ეს გამოწვეული იყო შიშით, რომ მათ რამე არ დამართნოდათ.
დღეს, როცა რომან შამათავა ციხეში ზის, ვხედავთ, რომ ჩვენ მიერ კონტროლირებად ტერიტორიაზე კლავენ ჩვენივე ქართველებს. ე.ი. სახელმწიფომ მთელი ეს პოლიტიკური პროცესი ისე წაიყვანა, რომ ადამიანი, რომელიც უსაფრთხოებას უზრუნველყოფდა, ციხეში ზის. მისი შიშით სეპარატისტები ტყვარჩელში იმალებოდნენ. დღეს პირიქით, ზუგდიდშიც გადმოდიან გამომდინარე შედეგებით.
ეს არის პოლიტიკური პროცესის შედარება. ამიტომ რასაც ქართული ოცნება აკეთებს, პოლიტიკის არქონა ჰქვია.
მე წინა ხელისუფლების პოლიტიკას აფხაზეთთან დაკავშირებით ვაკრიტიკებდი, მათი მოქმედებებიც გარკვეულწილად სწორი არ იყო. მაგრამ პერიმეტრში მოსახლეობის დაცვის საკითხები მართლაც კარგად მოგვარებული ჰქონდათ. დღეს ჩვენ სხვადასხვა პრობლემებს ვაკვირდებით და ეს ყველაფერი უკვე ღიად წარმოჩინდა. ხურჩის მკვლელობამაც ეს თვალნათლივ აჩვენა.
- მეორე მხარეს, ოკუპირებულ ტერიტორიაზე აღნიშნულმა მკვლელობამ რა რეაქციები გამოიწვია?
- გამეცინა, როდესაც ქართულმა მხარემ აჟიოტაჟი ატეხა, რომ მკვლელობაში ეჭვმიტანილი დააკავესო. და რომ თითქოს ქართულმა მხარემ მისი გადმოცემის საკითხი დაყენა. სასაცილოა ეს ყველაფერი.
ის მკვლელი ვერავინ ვერ დააკავა, ორი საათით გააჩერეს და ისევ გაუშვეს. რადგან ის სეპარატისტული რეჟიმისთვის გმირია. რადგან მათი ე.წ. პარლამენტის წევრები აცხადებენ, რომ ქართველები, როგორც ძაღლები ისე უნდა დავხოცოთო. ამიტომ ის მათთვის გმირია.
აქედან გამომდინარე, მას თითს ვერავინ დააკარებს. ეს რომ გააკეთონ, მთელი აფხაზეთი ფეხზე დადგება მკვლელის დასაცავად. ამიტომ ვერ დაიჭერენ და ვერც ვერაფერს უზამენ.
აქ თბილისში კი არ წყდება საუბრები დაკავებაზე და ა.შ. ვინ გადმოსცემს? არ ცნობენ თბილისთან რაიმე თანამშრომლობას და რომელ გადმოცემაზე საუბარი? ასეც მოხდა. ორი საათით გააჩერეს, ახსნა-განმარტება ჩამოართვეს და ამით მორჩა.
- რა ნაბიჯები უნდა გადადგას ქართულმა მხარემ პასუხისგებლობის საკითხის დასაყენებლად?
- ერთ რაღაცაში ვეთანხმები ამ ხელისუფლებას, რაც ხურჩის ინციდენტთან დაკავშირებით გააკეთა, განაცხადა, რომ ეს ადამიანი ინტერპოლის ძებნაში უნდა დასვას. მაგრამ ხაზს ვუსვამ, ინტერპოლის ძებნაში მარტო ეს ადამიანი კი არა, სეპარატისტთა ყველა ლიდერი უნდა ჩაისვას. ყველა ის ადამიანი, ვინც ჩაიდინა ეს ეთნიკური წმენდა, ვინც დახოცა, გაასახლა ქართველები, ვინც საქართველოს კონსტიტუციური წყობის რღვევა დაიწყო, - ეს სისხლის სამართლის კოდექსის კონკრეტული მუხლებია.
ამ ყველაფერზე სისხლის სამართლის საქმეები უნდა იყოს აღძრული და ინტერპოლის ძებნაზე გადაცემული.
- რამდენად მართებულია ე.წ. კაბელების საქმეზე დაკისრებული სასჯელები?
- ეს საქმე საერთოდ ნონსენსია. მე შემიძლია ვისაუბრო მხოლოდ იმაზე, რასაც ტელევიზორში ვხედავ ამ მიმართულებით. ცალსახად ჩანდა, რომ კაბელების საქმე პოლიტიკურად შეკვეთილი იყო და თავის დროზე ეს ირაკლი ალასანიას მოსაშორებლად გაკეთდა. ბოლოს უკვე გააკეთეს ის, რაც გააკეთეს.
ხაზს ვუსვამ, რომ ეს ყოვლად მიუღებელი პროცესია. მე ახლა როგორც ყოფილი გამომძიებელი ვსაუბრობ, - რასაც ვუსმინე, ამ ადამიანებს არ შეეძლოთ ჩაედინათ ის დანაშაული, რაზეც მათ ბრალი ჰქონდათ წარდგენილი. ისინი ვერ იქნებოდნენ ამ დანაშაულის განმხორციელებლები, რადგან შესაბამისი თანამდებობები არ ეკავათ. უბრალოდ, ამას ვერ მიითვისებდნენ.
- ქვეყანაში წინასაარჩევნო მდგომარეობა შევაფასოთ, თქვენი დაკვირვება როგორია?
- არჩევნების კონტექსტში ერთ საინტერესო მომენტს ხაზს გავუსვამდი, რაც ჩემთვის ძალიან დიდ კითხვის ნიშნებს ბადებს - ეს არის პოლიტიკური პარტიების სრული პოლიტიკური დაქსაქსულობა. ეს იქნება დასავლური პარტიები თუ პრორუსული ორიენტაციის პოლიტიკური ორგანიზაციები. სრული დაქსაქსულობა სახეზეა.
პირველი შემთხვევაა, როდესაც არანაირ ბლოკებზე საუბარი არ მიდის. ამასთან ყველა გაიძახის, რომ არჩევნებში ჩვენ გავიმარჯვებთო. ეს სრული აბსურდია.
ამიტომ შთაბეჭდილება მექმნება, რომ მართვად პროცესთან გვაქვს საქმე. უფრო სწორად, მართვადი ქაოსია, პოლიტიკური ძალების სრული დაქსაქსულობაა, რათა ისევ ქართულმა ოცნებამ გაიმარჯვოს. ამის უკან რაღაცები დგას. რადგან ამ მიმართულებით არანაირი კონსოლიდაცია არ ხდება.
სასაცილოა ნაციონალური მოძრაობის განცხადებები, რომ ჩვენ გავიმარჯვებთო. სხვა პოლიტიკური ძალების გამოსვლები, ჩვენ გავიმარჯვებთ და უმრავლესობით მოვალთო, ასევე ძალიან სასაცილოა.
ამიტომ ვსვამ კითხვას - როდესაც ხელისუფლება ქუჩაში დევს (ეს ნათლად ჩანს), ამ დროს რატომ არავინ ერთიანდება ამ ხელისუფლების ასაღებად? ე. ი. მართვადი პროცესია. ამის უკან ის დგას, ვინც მართვადი ქაოსის მეშვეობით ხელისუფლების შენარჩუნებას ცდილობს.
მაინც ვიმედოვნებ, რომ პოლიტიკური სპექტრი გაერთიანებას მოახერხებს.
- არსებული საარჩევნო სისტემა რამდენად განაპირობებს პარლამენტში სამართლიან გადანაწილებას?
- ეს სისტემა ყველასთვის მიუღებელია და ჩვენ ამაზე არაერთხელ ვისაუბრეთ. არაერთი განცხადება ინტერპარტიული ჯგუფის ფარგლებში გავაკეთეთ. ვენეციის კომისიამ, საერთაშორისო ორგანიზაციებმა, ვისაც არ ეზარება ყველამ გააკრიტიკა, გარდა ქართული ოცნებისა. რომელიც არც გერმანულ მოდელს და არც სხვა კომპრომისულ ვარიანტს არ იზიარებს.
ძალიან კაგად იციან, ეს საარჩევნო სისტემა რომ შეიცვალოს, ისინი ხელისუფლებას კარგავენ. ამიტომ არაფერზე არ მოდიან.
ევროპის საბჭოს საპარლამენტო ასამბლეის 2014 წლის რეზოლუციაში პირდაპირ ნათქვამი იყო - თუკი საარჩევნო პროცესთან დაკავშირებით კონსენსუსი არ შედგა, ამით ძალიან ბევრი კითხვის ნიშანი ისმებოდა. ოცნების წინააღმდეგობის გამო ეს კონსენსუსი არ შედგა. ეს პარტია თავისთვის უბერავს და არავინ არ აინტერესებს.
აქედან გამომდინარე, აუცილებლად დადგება საპარლამენტო არჩევნების ლეგიტიმაციის საკითხი, თუ ვითარება ასევე გაგრძელდება.
- რას აპირებთ „ევროპული დემოკრატები“ საარჩევნოდ?
- როგორც აღვნიშნე, ქვეყანაში პროდასავლური ძალების გაერთიანება უნდა შედგეს. კენჭისყრაზე ერთიანი ფრონტით გამოსვლა თუ არ მოხდა, ეს ძალიან ცუდის მომასწავებელი იქნება. მზად ვარ ყველასთან ურთიერთობისთვის, რადგან ჩემთვის მინუსი არ არსებობს. პირდაპირ ვუთხრათ მოსახლეობას, თუ რა უნდა გაკეთდეს ხელისუფლების შეცვლის შემდგომ.
როდესაც ასეთი საარჩევნო კოდექსია და არანაირი რესურსები არ არსებობს, როდესაც ხელისუფლება ყველაფერს აკნინებს, საეთერო დროით დაწყებული, ცესკოს კომპლექტაციით დამთავრებული, ამით ღიად ჩანს, რომ ისინი არჩევნების გაყალბებისთვის ემზადებიან.
ამ პირობებში, ალბათ, რაღაც პოლიტიკურ გადაწყვეტილებას მივიღებთ, თუ როგორ უნდა ვიმოქმედებთ ამ საარჩევნო პროცესში.
მე რასაც ვუყურებ, თუ დასავლური ძალების გაერთიანება არ მოხდა, ქართული ოცნება გამარჯვებული იქნება და ეს ქვეყანას სერიოზულ კრახს მოუტანს. ქვეყანას ისეთი პროცესებისკენ წაიყვანენ, რომლის შემოტრიალება მერე ძალიან ძნელი იქნება.
პროდასავლური ძალების გაერთიანება კი მინიმუმ იმ შედეგს მოიტანს, რომ ქართული ოცნება მთავრობას ვერ ჩამოაყალიბებს, თუ აღნიშნულ ძალებს არ დაელაპარაკება. და მაქსიმუმ, მთლიანად ხელისუფლების ცვლილება მოხერხდება.
