მთავარი ჩვენს შესახებსაიტის რუკაკონტაქტი
 
რატომ გადაწყვიტა პროფკავშირების თავმჯდომარემ პარლამენტის დეპუტატობა? - 16 აგვისტო 2016

"წინააღმდეგი ვარ იმ აზროვნების დამკვიდრებისა, რომ ბიზნესს უნდა ვკითხოთ, საით წავიდეთ და როგორ ვიცხოვროთ"

myrights.ge

პროფკავშირები აქტიურ პოლიტიკურ პროცესში ერთვება. ისნის რაიონის ვაზისუბნის მაჟორიტარულ ოლქში, დამოუკიდებელ მაჟორიტარ კანდიდატად საქართველოს პროფკავშირების თავმჯდომარეს, ირაკლი პეტრიაშვილს წარადგენენ. მიზანი ადამიანის უფლებების (მათ შორის შრომითი უფლებების) უფრო ქმედითი დაცვა, ამისთვის საპარლამენტო ბერკეტების გამოყენებაა.  

"საქართველოს პროფესიული კავშირების გაერთიანების გამგეობამ ისტორიული გადაწყვეტილბა მიიღო. საინიციატივო ჯგუფის მიერ, 2016 წლის საპარლამენტო არჩევნებზე, ისნის რაიონის ვაზისუბნის მაჟორიტარულ ოლქში, დამოუკიდებელ მაჟორიტარ კანდიდატად წარდგენილი იქნება საქართველოს პროფკავშირების თავმჯდომარე - ირაკლი პეტრიაშვილი.

ვაზისუბნელებო - არჩევანის გაკეთების დროს გახსოვდეთ, თქვენ პირველებს საქართველოს დამოუკიდებლობის ისტორიაში შანსი გეძლევათ ხმა მისცეთ არა რომელიმე პარტიას, არა რომელიმე პოლიტიკოსს ან პოლიტიკოსთა ჯგუფს, არამედ ხმა მისცეთ მუშას.

დიახ, ირაკლი პეტრიაშვილის არჩევით თქვენ აირჩევთ მეშახტეს, მაღაროელს, მეტალურგს, ქიმიკოსს, მასწავლებელს, მძღოლს, ექიმს, მეეზოვეს, ენერგეტიკოსს, ავტოგამმართველს, რკინიგზელს, კავშირგაბმულობის მუშაკს, მშენებელს და ა. შ.

ვაზისუბნელებო, დასაქმებულ ადამიანებს თქვენი მხარდაჭერა სჭირდებათ, ამავე დროს გარწმუნებთ, რომ ირაკლი პეტრიაშვილის არჩევით ვაზისუბანს ყველაზე ეფექტური დეპუტატი ეყოლება.

ამასთან, ძალიან საინტერესო და ორიგინალური მოცემულობა გაჩნდა ირაკლი პეტრიაშვილის კანდიდატობით: აქამდე არსებული პრაქტიკით, ამომრჩეველი ირჩევს დეპუტატს და შემდეგ ელოდება ეს დეპუტატი რას გააკეთებს მათთვის.

ირაკლი პეტრიაშვილის არჩევით კი ვაზისუბნის 43000-მდე ამომრჩეველს საშუალება ეძლევა თავად შეიტანოს წვლილი დასაქმებული ადამიანების შრომით-სამართლებრივი და სოციალურ-ეკონომიკური მდგომარეობის გაუმჯობესების საქმეში.

დარწმუნებული ვარ, ვაზისუბნელები საკუთარ მისიას ჯეროვნად გააცნობიერებენ და ამ შანსს ხელიდან არ გაუშვებენ", - აცხადებს სამთო და ქიმიური მრეწველობის მუშაკთა პროფკავშირის თავმჯდომარე თამაზ დოლაბერიძე.

ამ თემაზე "ქრონიკა პლუსი" პროფესიული კავშირების გაერთიანების თავმჯდომარეს, ევროპის პროფკავშირის პრეზიდენტს, ირაკლი პეტრიაშვილს ესაუბრება:

- ბატონო ირაკლი, რატომ გადაწყვიტეთ თქვენ და პროფკავშირებმა საპარლამენტო არჩევნებში მონაწილეობა?

- გაერთიანებულმა პროფკავშირებმა ეს იმიტომ გადაწყვიტა, რომ რიგი საკითხებისა, საკანონმდებლო წინადადებებისა და ინიციატივებისა, რაც დასაქმებულ ადამიანებს სჭირდებათ (პროფკავშირები სწორედ აქედან აყალიბებს თავის პოზიციებს), იქნება ეს საპენსიო რეფორმა თუ ნებისმიერი სხვა აქტივობა, თაროებზე შემოდებულია ხოლმე და პოლიტიკურ ცხოვრებაში საჭირო ასახვას ვერ ჰპოვებს. 

რაც შეეხება პირადად ჩემ დამოკიდებულებას თუ რატომ გადავწყვიტე ამ გზით წასვლა, ჩემთვის, ბუნებრივია, დეპუტატობას რაიმე სხვა ხიბლი არ გააჩნია. ჩემი თანამდებობები საქართველოსა და ევროპაში ბევრად უფრო აღმატებულია. 

ერთი მხრივ, დასაქმებულების ხმა პარლამენტში უნდა ისმოდეს და, რეალურად, ეს თემები (რაზეც წლების განმავლობაში გვიმუშავია და გვიკეთებია) პოლიტიკური ტრიბუნიდან გაჟღერდეს. მეორე მხრივ, ჩემთვის, როგორც ამ უბნის მაცხოვრებისთვის (აქ ვიზრდებოდი, სკოლაც მანდ დავამთარე და ა.შ.), ეს სივრცე ძალიან მნიშვნელოვანია და მას ვალიც უნდა დავუბრუნოთ. 

საუბარია იმ ხალხზე, რომელმაც ჩემში მყარი მენტალიტეტი და მსოფლმხედველობა ჩამოაყალიბა. რომელიც მოეწონათ ევროპაში და ამიტომაც ევროპის პროფკავშირების პრეზიდენტი ვარ; მოეწონათ საქართველოში და ამდენი ხნის განმავლობაში საქართველოს პროფკავშირების თავმჯდომარე ვარ. ეს ამ ხალხის დამსახურებაა, იმ პროლეტარიატის, რომელთან ერთადაც მე გავიზარდე და ჩამოვყალიბდი.

- ახსენეთ კანონპროექტები, რომელთა გატანაც აუცილებელია. ამ ეტაპზე რომელ სფეროებშია აუცილებელი პროგრესის მიღწევა, რაზე იმუშავებთ?

- ვფიქრობ, რომ ბევრი მნიშვნელოვანი პრობლემა ქმედით რეაგირებას მოითხოვს. ამ კონტექსტში რომელიმეს განსაკუთრებული ნიშნით გამოყოფა ნამდვილად გამიჭირდება. 

ალბათ, ყველაზე მნიშვნელოვანი მაინც ის არის, რომ ადამიანების ძალიან დიდ ნაწილს არ გააჩნია სტატუსი და ბიუჯეტის სიკეთეებით ვერ სარგებლობს. ისე, როგორც დაქირავებით დასაქმებული, თვითდასაქმებული ამას ვერ იყენებს. 

ანუ ის ხალხი, რომელსაც საუშაო ადგილი არც ბიძისთვის არც მამიდისთვის არ უთხოვია და ასე არ მოუპოვებია. არამედ თვითონ გააკეთა, თვითონ შექმნა სამუშაო ადგილები და ისინი დღემდე საქართველოში უსტატუსოდ არიან დატოვებული. მათ რაიმე სტატუსი არ გააჩნიათ, ისინი ვერ იღებენ ბიულეტენის ანაზღაურებას, საპენსიო რეფორმაში ვერ ჩაერთვებიან და ა.შ.

ვფიქრობ მათი ჩრდილიდან გამოყვანა, ქვეყნის ყოფა-ცხოვრებაში ჩართვა მნიშვნელოვანი საკითხია.

ასევე მნიშვნელოვანია, რომ არსებული უმუშევრობის პირობებში ნორმები და სტანდარტები დაცული იყოს. რომელთა დაუცველობაც გვაძლევს ასეთ შედეგს, რომ ერთი ადამიანი ნორმას, ანუ 40 საათს კი არ მუშაობს, არამედ 80 საათს და, ამ დროს, მეორე ადამიანი დაუსაქმებელი რჩება. 

ბუნებრივია, თუ ერთი ადამიანის ნორმა დაცული იქნება, ამ შემთხვევაში ჩვენ საშუალება გვექნება, რომ მეორე ადამიანიც იყოს დასაქმებული და ა.შ. უამრავი ასეთი საკითხია, რომლის მოგვარებაც სჭირდებათ ვაზისუბნელებს და არა მხოლოდ აღნიშნული უბნის მცხოვრებლებს. ეს სჭირდება ყველა დასაქმებულ ადამიანს საქართველოში. 

- სწორედ შრომითი უფლებების სფეროში კიდევ რაზე აპირებთ ყურადღების გამახვილებას?

- შრომის კოდექსში ბევრი საკითხი შევცვალეთ. უამრავი მუხლი პირადად ჩემ მიერ დაწერილი და ინიცირებულია მთავრობაში, შემდეგ პარლამენტმა დაამტკიცა. დიახ, რაღაცები შეიცვალა და მიუხედავად იმისა, იმის განცდა არ გვაქვს, რომ ეს ხალხზე, მის ყოველდღიურ ცხოვრებაზე რეალურად აისახა. 

ბუნებრივია, ამ კუთხით ერთი უკვე შესული ცვლილებების იმპლემენტაციაა, ხოლო, მეორე მხრივ, საჭიროა კიდევ დამატებითი ცვლილებები შევიდეს პარლამენტში. 

ყველაზე მნიშვნელოვანი, რატომაც მსურს ვიყო პარლამენტში, უმაღლესმა საკანონმდებლო ორგანომ არ უნდა იმუშაოს რაღაც ბუსუსებიან პრეზერვატივებზე და მისთ. არამედ ჩვენ ქვეყანაში ადამიანების ელემენტარული უფლებები უნდა იყოს დაცული. 

პარლამენტარის დრო არა იმის გარკვევაზე უნდა იკარგებოდეს, იქ ჩოხა-ახალუხით უნდა ვიაროთ თუ დახეული ჯინსებით. თუმცა ვეთანხმები ყველა იმ ოპონენტს, ვინც წინააღმდეგია  იქ კევის ღლაჭუნითა და დახეული ჯინსებით სიარულისა. პარლამენტში დრო იმაზეა დასახარჯი, რომ საქართველოში საკანონმდებლო სივრცე მოწესრიგებული და სრულყოფილი იყოს. 

- როგორ ფიქრობთ, ამომრჩეველმა თქვენ მხარი რატომ უნდა დაგიჭიროთ?

- ამომრჩეველმა მხარი იმიტომ უნდა დამიჭიროს, რომ მე არ ვპირდები დიდ პენსიებს, უზარმაზარ მინიმალურ ხელფასებს... რაც გამიკეთებია, უკვე სახეზეა და ამაზე გაჩერებას არ ვაპირებ, - ეს საქმე გამიკეთებია ჭიათურელებისთვის, ტყიბულელებისთვის, ზოგადად, დასაქმებული ადამიანებისთვის.

კიდევ ერთხელ ვამბობ, ამ თანამდებობას, ე.წ. მაჟორიტარულ დეპუტატობას ჩემთვის რამე სხვა ხიბლი არ გააჩნია, თუ არა სიყვარული ამ უბნისა და, ზოგადად, დასაქმებული ადამიანისა, რომლის ხმაც მინდა, რომ პარლამენტში ისმოდეს. 

როგორც ერთი თანამდებობა საქართველოში ასევე ბრიუსელში, ბევრად, ძალიან ბევრად აღემატება დეპუტატის მანდატს.

- რას სთავაზობთ ამომრჩეველს, როგორც თქვენ უბანში, ასევე ზოგადად პოლიტიკის განსაზღვრაში?

- ვთავაზობ, რომ ყოველთვის ის საკითხები იქნება გაჟღერებული, რომელიც დასაქმებულ ადამიანს აინტერესებს. წინააღმდეგი ვარ იმ აზროვნების დამკვიდრებისა, რომ ბიზნესს უნდა ვკითხოთ თუ საით წავიდეთ და როგორ ვიცხოვროთ. ჩვენ ეს ყველაფერი უნდა ვკითხოთ დასაქმებულ ადამიანს, რადგან მასზე დგას ეს ქვეყანა და არა ბიზნესზე. 

ბიზნესს მოვიწვევთ ნებისმიერი სფეროდან, ნებისმიერი ქვეყნიდან და ვინც აქ ფულს ჩადებს, ის აქაური ბიზნესმენიც იქნება. მე ნაკლებად მაინტერესებს მისი ეროვნული წარმომავლობა. ჩვენი ხალხი და ჩვენი მოქალაქეები უნდა იყვნენ განმსაზღვრელი, ქვეყანა საით წავიდეს და როგორ უნდა ვითარდებოდეს. ამიტომ უპირველესად, მათი ხმა უნდა ისმოდეს ქვეყნის პარლამენტში. 

ამისთვის საჭიროებები ერთ საგაზეთო ინტერვიუს არ ეყოფა. ეჭვი მეპარება ის ოთხი წელი მაინც ეყოს, იმდენად ნულს ქვემოთაა ჩვენთან ადამიანის უფლებები დასული. შრომითი უფლებები განუყოფელი ნაწილია ადამიანის უფლებების, არსებული რეალური მდგომარეობა კი კრიტიკას ვერ უძლებს. 

საჭიროა დღის წესრიგის, გამოწვევების, გეგმების განსაზღვრა, თუ რაზე უნდა მსჯელობდეს პარლამენტი და რაზე არა. აქცენტი იმ თემებზეა, სადაც მოქალაქეების ჩართულობა უმნიშვნელოვანესია. და როცა დემოკრატიაზე საუბრობენ, განზოგადებულად დემოკრატია სწორედ ეს არის, რომ მოქალაქეებს აქვთ განცდა, რომ ქვეყნის სამართავ საჭეზე, ანუ კანონებზე და ა.შ. ხელი მიუწვდებათ.

აი ეს არის პარლამენტარის მთავარი ფუნქცია, რომ ადამიანებთან კომუნიკაცი ჰქონდეს და ისინი იყვნენ რუპორი ადამიანებისა, თავიანთი ამომრჩევლებისა.

- გამოწვევები ახსენეთ, შეუძლებელია არ გკითხოთ რას აპირებთ ქმედით შრომის ინსპექციასთან დაკავშირებით, რომლის ჩამოყალიბებასაც საშველი არ დაადგა?

- რასაკვირველია, აქცენტია შრომის ინსპექციაზე, შრომის კოდექსში შესატან ცვლილებებზე,   სოციალური პარტნიორობისა და დიალოგის განვითარებაზე, იმ გამოწვევებსა და პრობლემებზე, როდესაც საქართველოს საკითხები ევროპასა და ამერიკაში იხილება, - ეს გახლავთ კონფლიქტები ფოსტაში, კონფლიქტი პოფკავშირებსა და რკინიგზაში, კონფლიქტი კაზრეთში და ა.შ. აუცილებელია ამ ყველაფრის დარეგულირება. 

რა თქმა უნდა, ეს არის სამუშაო დრო, ზეგანაკვეთური დრო, რომელიც კანონში განსაზღვრულია, მაგრამ ამისთვის მეტი ვერ გაიმეტეს. ბიზნესს იმხელა დიდი ლობისტები ჰყავდა, რომ ჩვენ, მხოლოდ ერთმა პროფკავშირებმა მეტი ვერ შევძელით. იქ წერია, რომ კი, განსხვავებული ტარიფით უნდა იხდებოდეს ზეგანაკვეთური შრომა, მაგრამ რამდენი დასაქმებული ადამიანი უნდა მოელაპარაკო დამსაქმებელს? როცა იქ პროფკავშირი არ არის, წარმოგიდგენიათ, დასაქმებული დამსაქმებელთან ვერტიკალურ ურთიერთობაში შედის და შეუძლებელი ხდება, რომ ის რამეზე მოელაპარაკოს. და ვერასოდეს ვერ მოელაპარაკება, რადგან ამ უმუშევრობის პირობებში მას კონტრაქტს დამსაქმებელი უდგენს. მისი ყოფა სწორედ ამ კონტრაქტზეა დამოკიდებული.  

ამიტომ ვფიქრობ, რომ ამ კუთხით დასაქმებულმა ადამიანებმა თავიანთი ძალა ბოლომდე უნდა გამოიყენონ, - ეს არის მათი ერთად ყოფნა. და ამით პარლამენტში იქნება თუ მის გარეთ იმ საკითხების ლობირება მოახდინონ, რაც მათ ინტერესში შედის.

- თქვენ საარჩევნო უბანში კონკურენტებზე რა შეგიძლიათ გვითხრათ?

- მე არ მაქვს დრო, რომ კონკურენტებთან დაკავშირებით ვისაუბრო. რადგან უნდა ვისაუბრო იმაზე, თუ ჩვენ რა გვაქვს გასაკეთებელი ამ ხალხთან. ამიტომ მე მაქსიმალურად შევთავაზებ ამომრჩევლს თუ რა გაგვიკეთებია და კიდევ რის გაკეთებას ვაპირებთ. შედარებები თვითონ ამომრჩეველმა გააკეთოს. 

დროს არ დავხარჯავ იმაზე, რომ აი ნახეთ, თუ რა ცუდია კონკურენტი. არა იმიტომ, რომ ცუდი არ არის, უბრალოდ, ამდენი დრო არ მაქვს და, სიმართლე გითხრათ, არც ვიცი, ვინ არიან ჩემი კონკურენტები.

- დაიწყეთ თუ არა კამპანია?

- ჯერ არ დაგვიწყია, ჩამოყალიბების პროცესშია ეს ყველაფერი. საბოლოო ჯამში, როცა ცესკო ამ რეგისტრაციას მოგვცემს (ალბათ, 18-ის შემდეგ) მერე დავიწყებთ აღნიშნულ პროცესს. მანამდე გეგმებს ვადგენთ, რა, როგორ უნდა იყოს, როგორ უნდა მივიდეთ ამომრჩეველთან და ამის მერე ყველაფერთან დაკავშირებით საქმის კურსში იქნებით.

- რა შედეგს ლეოდებით 8 ოქტომბრის არჩევნებზე?

- რა თქმა უნდა, გამარჯვებისთვის ვიბრძვით და გამარჯვებას ველოდებით. მაგრამ, როგორც მინიმუმი, მოქალაქეების ცნობიერება უნდა ამაღლდეს არსებულ გამოწვევებთან დაკავშირებით. ასევე იმ გაკეთებულ საქმეებთან დაკავშირებით, რაც პროფკავშირის ყულაბაშია. ცნობიერება ამაღლდება და, ბუნებრივია, იმ საკითხებს, რომელსაც პროფკავშირი აყენებს, გარანტიას გაძლევთ, რომ უფრო მეტი მხარდამჭერი ეყოლება. 

ჩვენ ამ ტრიბუნას აქტიურად გამოვიყენებთ იმისთვის, ამომრჩევლების მოთხოვნა კიდევ უფრო მკაცრი გავხადოთ პოლიტიკოსების მიმართ.  

პოპულარული სტატიები
რა განაპირობებს ახალგაზრდებში უმუშევრობის და პასიურობის პრობლემას
გენდერული თანასწორობა რეგიონებში - ქალების ჩართულობა საქმისთვის გადამწყვეტია 
რა მნიშვნელობა აქვს ოზონის შრეს და რას ვაკეთებთ მის დასაცავად? 
 
ვიდეოები
გამოკითხვა
 


სპონსორები

2024 ყველა უფლება დაცულია