„ვებრძვი როგორც სახელისუფლებო კანდიდატს, რომელიც ბინძური ჭორების გავრცელებით არის დაკავებული ჩემ წინააღმდეგ, ასევე ვებრძვი ფულის ტომარას, რომელიც მეორე ალტერნატიული ვერსიაა ქართული ოცნებისთვის აქ გასამარჯვებლად“

myrights.ge

„ქართული ოცნების“ ერთ-ერთი ლიდერის, გია ვოლსკის განცხადებით, „რესპუბლიკურ პარტიას“ კარგად არა აქვს გააზრებული, რას ჰქვია სახელმწიფო ინტერესები. ხოლო ეკა ბესელიას არ ჰგონია კარგი პოლიტიკური კულტურის მანიშნებელი იყოს, როცა პირად მეილებს აფრიალებ პირდაპირ ეთერში (უსუფაშვილის მიერ გამოქვეყნებული წერილის საპასუხოდ). თავის მხრივ, თინა ხიდაშელი ბიძინა ივანიშვილს პირობას აძლევს, რომ აუცილებლად მოიხდის ბოდიშს საძაგლობებისთვის, რომელიც იკადრა.

მაინც რა გახდა „რესპუბლიკელებისა“ და ბიძინა ივანიშვილის (ქართული ოცნების წარმომადგენლების) დაპირისპირების მიზეზი, რა მოტივები ამოძრავებს ყოფილ პრემიერს, ქვეყანაში არსებული არაფორმალური მმართველობის მიუხედავად, რატომ გადაწყვიტა „რესპუბლიკურმა პარტიამ ბოლომდე დარჩენილიყო კოალიციის შემადგებლობაში, სამომავლოდ მსგავსი ტიპის არაფორმალური მმართველობის გაგრძელება ქვეყანას რა შედეგებს მოუტანს, როგორ მოახდევინებენ „რესპუბლიკელები“ ივანიშვილს ბოდიშს, რატომ ვერ შეასრულა სათანადოდ „ქართულმა ოცნებამ“ ადრე გაცემული დაპირებები, რა სოციალურ-ეკონომიკური პრობლემები აწუხებს ზესტაფონის მოსახლეობას, რას პირდება თინა ხიდაშელი რაიონის მოსახლეობას და რა მხარდაჭერას ელოდება? 

„ქრონიკა პლუსმა“ ამ კითხვებით ზესტაფონში „რესპუბლიკელების“ მაჟორიტარ კანდიდატს, თინა ხიდაშელს მიმართა:

- ქალბატონო თინა, რა გახდა თქვენი და ბიძინა ივანიშვილის (ქართული ოცნების წარმომადგენლების) დაპირისპირების მიზეზი?

- ვფიქრობ, ამ კითხვაზე პასუხი გაცემულია. ეს ჩვენ არ დაგვიწყია და ერთადერთი მიზეზი ის შეურაცხყოფების კასკადი, პიროვნული შეურაცხყოფები, ღირსების შემლახავი განცხადებები იყო, რომელიც ჩვენ ყოფილი პრემიერისგან მოვისმინეთ. ჩვენ არც მანამდე, არც შემდეგ ასეთი ტიპის საჯარო კამპანიაში ჩართვას არ ვგეგმავდით. მაგრამ, რა თქმა უნდა, ყველაფერს თავისი საზღვარი აქვს და როდესაც შეურაცხყოფას გაყენებენ, ბუნებრივია, პასუხის გაცემას იწყებ.

ჩვენ გვაქვს ფაქტები და დოკუმენტები და როდესაც მეორე მხარეს ამაზე პასუხი არ აქვს, იწყება შეურაცხყოფა, რაც ძალიან სამწუხაროა.

- რაც შეეხება დოკუმენტებს, ეკა ბესელიამ განაცხადა, რომ კარგი პოლიტიკური კულტურის მანიშნებელი არ არის, როდესაც პირადი მეილების ფრიალი ხდება პირდაპირ ეთერში...

- როგორც ჩანს, ეკა ბესელიასთვის მაღალი პოლიტიკური კულტურის მანიშნებელია, როდესაც პოლიტიკურ ოპონენტებს უღირსად მოიხსენიებ, განიარაღებული იტყუები და არგუმენტებითაც სრულიად გაშიშვლებული ხარ. ამიტომ ეს მისი არჩევანია და მასთან რაიმე პოლემიკაში შესვლას არ ვაპირებ.

- ამ შემთხვევაში ყოფილ პრემიერს რა მოტივები ამოძრავებს?

- არ ვიცი, როგორც ჩანს, მან გადაწყვიტა, რომ რესპუბლიკელები მთავარ მტრებად მიგვიჩნიოს. ეს მისი არჩევანია. მაგრამ კიდევ ერთხელ ვაბობ, სანამ მათთან ნორმალური პოლიტიკური ოპონირების რეჟიმში ვიყავით, ყველაფერი კარგად იყო. მაგრამ როდესაც ცილისწამების, ტყუილებისა და შეურაცხყოფების მთელი კასკადი მოდის, ამაზე შესაბამის პასუხს მიიღებენ.

მე არ ვიცი ივანიშვილს რა ამოძრავებს, ეს უკვე მას უნდა ჰკითხოთ და მისი გადასაწყვეტია. მე ვიცი ის, რაც მოხდა, რაც მან ბრძანა და ყოველ ჯერზე პასუხს მიიღებს, როდესაც ჩვენ მიმართ მსგავსი ტიპის ეპითეტებს გამოიყენებს.

- დღეს თქვენი მხრიდან აქცენტი ქვეყანაში არაფორმალურ მმართველობაზე კეთდება. თავის დროზე, როდესაც მმართველ კოალიციაში იყავით, მაშინაც ხომ არაფორმალური მართვის ნიშნები ცხადი იყო; რატომ გადაწყვიტეთ, რომ ბოლომდე კოალიციის შემადგენლობაში, მთავრობაში  დარჩენილიყავით?

- მგონია, რომ ამ თვალსაზრისით ბოლო წერილში ყველაფერი ახსნილი და განმარტებულია. სასაცილო განცხადებები მესმის ზოგიერთი პოლიტიკური ოპონენტისგან, - მაშინ ვერ ხედავდნენ, რომ არაფორმალური მმართველობა იყოო, - მაგრამ ამ წერილების გამოქვეყნების  შემდეგ თუ ვინმეს ეს კითხვა რჩება, ძალიან სასაცილოა.

მგონი ძალიან კარგად ჩანს, რომ 2015 წელს, 2016 წლის დასაწყისის ამ წერილებში არათუ ვხედავდით, სწორედ ამას ვითხოვდით ჩვენ ბიძინა ივანიშვილისგან, რომ ღია, საჯარო პოლიტიკაში დაბრუნებულიყო. რადგან ისედაც ნათელი იყო, რომ გადაწყვეტილებებს ის იღებდა.

ამასთან, როდესაც შენ კოალიციაში ხარ, ბოლომდე ერთგული ხარ ერთიანობის და შესაბამისად, ეს სწორედ იმ ფორმით ხდებოდა, რა ფორმაც ამ წერილებში ჩანს. და არა ვთქვათ კამერების წინ.

მანამდე, ჯერ კიდევ 2014 წლის შემოდგომაზე ჩვენი პირველი წერილი გამოვაქვეყნეთ, სადაც სრულიად ღიად და ნათლად იკითხებოდა, რომ პოლიტიკის დეპერსონალიზაციაზე ვსაუბრობდით. არცერთ კოალიციურ პარტნიორს ამ ხნის განმავლობაში მსგავსი არაფერი უთქვამს.

თავად ბიძინა ივანიშვილმაც უკვე მრავალჯერ განაცხადა, რომ ჩვენ კომფორტული პარტნიორები არ ვიყავით. რადგან მთელი ამ ხნის განმავლობაში სისტემის და პროცესის  დეპერსონალიზაციისთვის ვიბრძოდით, რასაც პოლიტიკის ენაზე ზუსტად არაფორმალური მმართველობა ჰქვია.

- სამომავლოდ მსგავსი ტიპის არაფორმალური მმართველობის გაგრძელება ქვეყანას რა შედეგებს მოუტანს?

- საერთოდ მე ვფიქრობ, რომ ნებისმიერი ტიპის არაფორმალური სისტემა ქვეყნისთვის მხოლოდ და მხოლოდ უკან დამწევია. ეს კიევში მყოფი ქვეყნის არამოქალაქის მიერ პოლიტიკური პარტიის მართვა, თუ რაიმე სხვა ფორმით მართვა იქნება. ეს ერთი და იგივე პროცესია, მისი  სხვადასხვა განშტოებაა.

სამწუხარო რეალობა გვაქვს, რომ მოქმედი მმართველი პარტიის საარჩევნო კამპანიას ატარებს მისი დამფუძნებელი, რომელიც მუდმივად იმას აცხადებს, რომ პოლიტიკაში არ იმყოფება. და ყოფილი მმართველი პარტიის საარჩევნო კამპანიას, საერთოდ, სხვა ქვეყნის მოქალაქე და ამ ქვეყნის მაღალი თანამდებობის პირი ატარებს.

მე მგონი ასეთი ტიპის გაუგებრობაში ჯერ არ ვყოფილვართ. როცა ორივე პარტიის, ვიმეორებ მოქმედი და ყოფილი სახელისუფლებო პარტიების საარჩევნო კამპანიის ლიდერებად გვევლინებიან ადამიანები, რომლებიც პირადად პროცესზე არავითარ პასუხისმგებლობას არ იღებენ, ისე ითხოვენ ელექტორატის ხმებსა და მხარდაჭერას.

ეს, რასაკვირველია, ძალიან მძიმე ფორმაა, რომელშიც ქართული პოლიტიკური ცხოვრება აღმოჩნდა.

- „ქართული ოცნების“ წარმომადგენლებმა ასევე მოგიწოდეს, რომ ნუ გექნებათ ექსკლუზივი ევროპულობასა და დასავლურ კურსზე, სააკაშვილიც ხომ ასე  საუბრობდაო...

- ვნახე იმავე ქალბატონის კომენტარი, რომელიც წეღან ახსენეთ. კიდევ ერთხელ ვამბობ, რომ მე არ ვაპირებ მათთან არანაირ პოლიტიკურ დებატებში შესვლას. ამას არც სწორად და არც საჭიროდ არ მივიჩნევ. ეს დღევანდელი პოლიტიკური დღის წესრიგისთვის თავსებადი ნამდვილად არ არის.

თუ ეკა ბესელიას რაიმე განსაკუთრებული პოლიტიკური ამბიციები და პრეტენზიები აქვს, მას მარტივ კითხვას ვუსვამ - სად არის? სად არის, რატომ არ არის სადმე პოლიტიკურ ბრძოლაში ჩართული, რატომ სადმე საარჩევნო კამპანიაში არ მონაწილეობს?

მე აგერ ზესტაფონიდან გაძლევთ ინტერვიუს, ვებრძვი როგორც სახელისუფლებო კანდიდატს, რომელიც ბინძური ჭორების გავრცელებით არის დაკავებული ჩემ წინააღმდეგ, ასევე ვებრძვი ფულის ტომარას, რომელიც მეორე ალტერნატიული ვერსიაა ქართული ოცნებისთვის აქ გასამარჯვებლად.

სად არის ეკა ბესელია, დამანახვეთ და ამის მერე გადავწყვეტ, მას პასუხი გავცე თუ არა იმ განცხადებებზე, რომელსაც ამ ბოლო დღეებში აკეთებს.

- თქვენ განაცხადეთ, რომ ბიძინა ივანიშვილს ბოდიშს მოახდევინებთ იმ საძაგლობებისთვის, რაც მან იკადრა...

- მე ვთქვი, რომ ის ბოდიშს მოიხდის, ეს ორი სხვადსხვა ფორმაა.

- ივანიშვილმა განაცხადა, რომ დღეს მესამე სექტორი დასვრილი და დაბინძურებულია, მისივე თქმით, სამოქალაქო საზოგადოება გარყვნეს; თქვენი პოზიცია როგორია ამ საკითხთან დაკავშირებით?

- ჩემი პოზიცია არ შეცვლილა იმასთან დაკავშირებით, რასაც ამ თემაზე ბიძინა ივანიშვილი წლების განმავლობაში ამბობდა. ოღონდ ადრე ამ სიაში თამარ ჩუგოშვილსაც მოიაზრებდა. დღეს, როგორც ჩანს, ამ საკითხთან დაკავშირებით თამარ ჩუგოშვილი კომპრომისზე წავიდა, გასაგები მიზეზების გამო.

მე ოცი წელი სამოქალაქო საზოგადოების არა უბრალო მონაწილე ვიყავი, ბევრ სხვა რესპუბლიკელთან ერთად პრეტენზია მაქვს, რომ ამ სექტორის შექმნის სათავეებთან ვიდექით და ჩვენი დამსახურებაცაა, რომ დღეს ქვეყანაში ასეთი ძლიერი სამოქალაქო სექტორი არსებობს.

ამიტომ თუ რამე შემიქმნია, ჩემი ერთი ნაწილი იქ არის და ზუსტად ისე, როგორც მაშინ ვეწინაღმდეგებოდი ბატონ ბიძინას, როცა ჩუგოშვილზე ასე საუბრობდა, დღესაც ანალოგიური დამოკიდებულებამ მაქვს.

- თქვენ ზესტაფონში მართავთ შეხვედრებს; რა პრობლემები აწუხებს მოსახლეობას უპირველესად სოციალურ-ეკონომიკური თვალსაზრისით?

- ქვეყანაში ყველგან ერთი და იგივე გამოწვევებია. დღეს საარჩევნოდ მთავარი პრობლემა და ოპონენტი იმედგაცრუებაა. რეალურად, ეს არის უზარმაზარი იმედგაცრუება მოსახლეობაში. ჩვენმა საზოგადოებამ მოტივაცია დაკარგა, რაც ძალიან სამწუხაროა. 2012 წელს იმდენად დიდი აღფრთოვანება თუ უკეთესის მოლოდინი იყო, რომ მათი თქმით, ეს ყველაფერი აბსოლუტურად წყალი ჩაყრილია.

ამ ფონზე ბიძინა ივანიშვილი ბრძანებს, რომ თურმე ვინც იბრძოდა ყველა სულელი იყო და ვინც ეგუებოდნენ, უკაცრავად და ვინც სააკაშვილის რეჟიმს გაუწვნენ, ამ გზით გადარჩნენ, სწორედაც იქცეოდნენო. რასაკვირველია, ასეთი დამოკიდებულება მოსახლეობას კიდევ უფრო აღიზიანებს და მათ მოტივაციას აგდებს.

მაგრამ, ჩემი აზრით, ყველა პოლიტიკოსის ამოცანა უნდა იყოს, რომ ადამიანებს იმის იმედი და რწმენა ჩავუნერგოთ, რომ ბრძოლა ყოველთვის მნიშვნელოვანია. თუ ვცოცხლობთ, უნდა გავაგრძელოთ ბრძოლა უკეთესობისთვის; ყველაფერი გავაკეთოთ იმისთვის, რომ თუ გნებავთ ნაბიჯ-ნაბიჯ, მაგრამ ქვეყანაში მდგომარეობა უკეთესობისკენ, განვითარებისკენ მიდიოდეს.

- მოდით ისიც ვთქვათ, რატომ ვერ შეასრულა სათანადოდ „ქართულმა ოცნებამ“ ადრე გაცემული დაპირებები?

- ვფიქრობ, აქ რამდენიმე მიზეზი იყო. ერთი ის, რომ თავისთავად არარეალისტური მოლოდინები იყო შექმნილი. ამასთან, ადამიანები სააკაშვილის რეჟიმისგან გამწარებული იყვნენ.

მეორე, ეს ქართული ოცნების ლიდერის მიერ გაცემული უხვი დაპირებებია, რომელიც ასევე შეუსრულებელი იყო. ობიექტურად, ეს დაპირებები განუხორციელებელი აღმოჩნდა.

მაგრამ მესამე და განმსაზღვრელი, ჩემი აზრით, სუბიექტური ფაქტორები აღმოჩნდა. ამის ბევრი მაგალითი არსებობს.       

ამომრჩეველთან ეს მაგალითი მომყავს ხოლმე. თქვენ იცით, რა კატასტროფაში ვიყავით ნაციონალური მოძრაობის დროს და შემდეგ ვიცით, რა ხდებოდა ქართული ოცნების პირობებში. მე ნამდვილად ამაყი ვარ, რომ ამ ოთხი წლის განმავლობაში ერთადერთი სახელმწიფო დაწესებულება, სადაც მის ხელმძღვანელს არცერთი თეთრი პრემია არ აუღია, ეს საქართველოს პარლამენტი იყო. და ბოლო 15 თვის განმავლობაში ეს არის საქართველოს თავდაცვის სამინისტრო.

ამის საპირისპირო დამოკიდებულება ჩემი აზრით ერთი-ერთი მთავარია მიზეზია იმ იმედგაცრუების, რომელიც დღეს საზოგადოებაში ასე მოჭარბებულია.

-  რას პირდებით ზესტაფონის „ფეროს“ თანამშრომლებს?

- აქ რამდენიმე თემაა. ჩვენ მუდმივად ფაქტებითა და დოკუმენტებით ვსაუბრობთ. ჩემი ერთ-ერთი კონკურენტის, ფეროს ყოფილის მესაკუთრის დროს საწარმოში მოპარული 157 მილიონის შესახებ დოკუმენტი გამოვაქვეყნე. ეს არის დოკუმენტურად დადასტურებული მტკიცებულება. და ჩვენი ერთ-ერთი მთავარი დაპირება ფეროს მუშებისა და აქციონერების, ზესტაფონელების მიმართ სწორედ ის არის, რომ ყოველი ეს თეთრი უკან დავაბრუნებინოთ  ამ ადამიანებს, რომლებიც ზესტაფონში ჩვეულებრივ მაფიოზებად ჩამოყალიბდნენ.

ზესტაფონელებს, „ფეროს“ მუშებს ვპირდები, რომ მაფიოზებს მათთვის მოპარულ ყველა თეთრს დავაბრუნებინებთ.

მხოლოდ საკუთარ კეთილდღეობაზე ზრუნვამ ერთი მხრივ ამ ქალაქის გაღარიბება გამოიწვია და, მეორე მხრივ, ქალაქი უბრალოდ გაიმეტეს სიმსვნის მსხვერპლობისთვის. რადგან ფულის დახარჯვა არ ემეტებათ იმისთვის, რაც ასეთი ტიპის საწარმოს მუშაობისას იზრუნონ ეკონომიკურ გარემოზე და, შესაბამისად, ჯანმრთელობის სასიკვდილო დაზიანების თვალსაზრისით რისკები და საფრთხეები მაქსიმალურად შეამცირონ. 

- რა საარჩევნო შედეგებს ელოდებით ზესტაფონში და, ზოგადად, ქვეყნის მასშტაბით?

- ძალიან რთული სათქმელია. მე ველოდები, რომ საქართველოს პარლამენტი მრავალპარტიული იქნება, ამ სიტყვის ძალიან ფართო გაგებით. ვფიქრობ, რომ ექვსი-შვიდი პარტია გადალახავს საარჩევნო ბარიერს. რა თქმა უნდა, რესპუბლიკელები მათ შორის ვიქნებით.

ჩვენ თვისობრივად ახალი ტიპის პოლიტიკურ რეალობას, ჭეშმარიტ ევროპულ პარლამენტს მივიღებთ. რომელიც შესაძლებლობას გააჩენს, რომ კომპრომისების, პოლიტიკური დიალოგისა და დისკუსიის რეჟიმში ქვეყნის პრობლემების მოგვარება დავიწყოთ.