ufleba.ge
საერთაშორისო ასოციაცია „დაიცავი შენი წილი სამშობლო“ იწყებს ახალ კამპანიას სახელწოდებით - „ბრავო ლეგენდა, სუხიშვილები ჩემი სამშობლოს სიამაყეა!“
„ყველასთვის საამაყო და ლეგენდარული, ი. სუხიშვილისა და ნ. რამიშვილის სახელობის ქართული ნაციონალური ბალეტის სახელმწიფო აკადემიური დასი (სუხიშვილები) თავის წილ სამშობლოს იცავს, როგორც საქართველოში, ასევე მთელ პლანეტაზე. ეს იმაში გამოიხატება, რომ ჩვენი კულტურა და ხელოვნება (ქართული გენია როკვით განფენილი) მსოფლიოს მერვე საოცრებადაა აღიარებული“, - აღნიშნულია საერთაშორისო ასოციაცია „დაიცავი შენი წილი სამშობლოს“ განცხადებაში, რომელსაც ორგანიზაციის თავმჯდომარე, თადარიგის პოლკოვნიკი, დარეჯან (დოდო) გუგეშაშვილი ხელს აწერს.
ანსამბლ „სუხიშვილების“ დირექტორმა და მთავარმა პროდიუსიერმა - ნინო სუხიშვილმა, ტელევიზია „ერთსულოვნების“ ეთერში 17 მაისთან დაკავშირებით განცხადება გააკეთა. მან 17 მაისს სამების ტაძართან გამართულ კონცერტზე ისაუბრა.
„მე ვარ მართლმადიდებელი ქრისტიანი და თამამად ვაცხადებ, რომ ვდგავარ იქ, სადაც ჩემი ეკლესია დგას!“– განაცხადა ნინო სუხიშვილმა.
მისივე თქმით, სამების წინ კონცერტი ძალადობა არ არის და მისთვის დიდი პატივია კონცერტში მონაწილეობა.
„კონცერტი ჩემთვის არანაირი ძალადობა არ არის და არანაირი აგრესია არავის მიმართ. ჩემთვის პატივია სამების წინ კონცერტში მონაწილეობის მიღება. ჩემთვის ეკლესია არის სიკეთე და სიყვარული“, - განაცხადა ნინო სუხიშვილმა.