ufleba.ge

მმართველმა გუნდმა მოიტანა წინადადება, რომელიც არის აბსოლუტურად მიუღებელი, – ამის შესახებ „ნაციონალური მოძრაობის“ თავმჯდომარემ, გრიგოლ ვაშაძემ განაცხადა.

მისი თქმით, მმართველი გუნდის მიერ დღევანდელ შეხვედრაზე გაკეთებული შეთავაზება არასერიოზულია.

„არ მესმის ამ წინადადების მოტანის აზრი. მოიტანეს წინადადება, რომ 2020 წლის არჩევნები უნდა ჩატარდეს სისტემით – 50 მაჟორიტარი დეპუტატი, 100 პროპორციული დეპუტატი და არამარტო 2020 წლის არჩევნები უნდა ჩატარდეს ასე, არამედ საქართველოში ყველა დანარჩენი არჩევნებიც უსასრულობამდე. ამისთანა არასერიოზულობა არ მინახავს. ეს წინადადება აჩვენებს, როგორ წვალობენ, დიალოგს თავს ვერ ანებებენ, საერთაშორისო მედიატორებს ვერ ეუბნებიან მონაწილეობაზე უარს. ესმით, რომ კომპრომისი მათგან უნდა წამოვიდეს და ისიც ესმით, რომ საზოგადოებაში საშინელი კრიზისია. არ ვიცი, როდის გაგრძელდება მოლაპარაკება. სიმართლე გითხრათ, ჯობია მოლაპარაკებები ამ ოთახში, ვიდრე დაპირისპირება ქუჩაში, მაგრამ ერთი რაღაც მმართველმა გუნდმა უნდა გაიგოს, ჩვენ მხარდამჭერებს და საერთოდ საქართველოს ამომრჩევლებს ვერასდროს ავუხსნით, თუ დავთანხმდებით რამეს. ნუ იქნება ისეთი სისტემა, რომელიც სახელმწიფოში შეინარჩუნებს ერთპიროვნულ მმართველობას. პროტესტი გაგრძელდება, სანამ სამი მოსმენით არ იქნება მიღებული ისეთი სისტემა, რომელიც დააკმაყოფილებს საქართველოს მოქალაქეს“, – განაცხადა გრიგოლ ვაშაძემ.