მთავარი ჩვენს შესახებსაიტის რუკაკონტაქტი
 
ამირან გამყრელიძე - გრიპის ვირუსით დაინფიცირების მაჩვენებელი გაიზარდა - 13 იანვარი 2020

ufleba.ge

იანვრის მეორე კვირაში, წინა კვირასთან შედარებით, ქვეყანაში გრიპის ვირუსით დაინფიცირების მაჩვენებელი გაიზარდა და ასი ათას ადამიანზე 219 შემთხვევა შეადგინა, – ამის შესახებ დაავადებათა კონტროლის ეროვნული ცენტრის დირექტორმა, ამირან გამყრელიძემ დღეს გამართულ პრესკონფერენციაზე განაცხადა.

მისივე თქმით, გაზრდილია სეზონური ვირუსის გამო ჰოსპიტალიზაციის მაჩვენებელიც, თუმცა გასული წლის ანალოგიურ პერიოდთან შედარებით, ორივე მონაცემი შემცირებულია.

როგორც გამყრელიძემ აღნიშნა, ქვეყანაში გაზრდილია ვაქცინაციის მაჩვენებელი და სახელმწიფოს მიერ შემოტანილი ვაქცინა რისკის ჯგუფში შემავალმა 97 ათასმა ადამიანმა გაიკეთა.

„როგორც მოსალოდნელი იყო, ახალი წლის დღეებში მომართვიანობამ იკლო და იანვრის მეორე კვირის მონაცემებით, პირველ კვირასთან მიმართებით, გვაქვს მომართვიანობის უმნიშვნელო ზრდა. ასევე, 3%-ით მომატებულია ჰოსპიტალიზაციის მაჩვენებელი.

გრიპის სეზონი გრძელდება მარტის ბოლომდე, აპრილის შუა რიცხვებამდე. ამიტომ, ყურადღება არ უნდა მოვადუნოთ და უნდა დავიცვათ ყველა ის რეკომენდაცია, რომელსაც დაავადებათა კონტროლის ცენტრი გრიპის პრევენციისა და პროფილაქტიკისთვის იძლევა. ძალიან კარგია, რომ ქვეყანაში გაიზარდა კულტურა და მოთხოვნილება ვაქცინაციაზე, რომელიც გახლავთ და მეთოდი გრიპის პროფილაქტიკის უპირველესი პრევენციული საშუალება. წელს ჩვენ 2,5-ჯერ მეტი ადამიანი ავცერით, ვიდრე გასულ წელს. ახლა უკვე აცრილია დაახლოებით 96 900 ადამიანი. ჯერ კიდევ გვაქვს ვაქცინების მარაგი. კიდევ ერთხელ მოვუწოდებ მაღალ რისკჯგუფებს, განსაკუთრებით ორსულებს, რომ ისარგებლონ ვაქცინაციით“, – განაცხადა გამყრელიძემ.

მისივე თქმით, ქვეყანაში ანტივირუსულ პრეპარატ „ტამიფლუს“ საკმარისი მარაგია.

„ქვეყანაში საკმარისია ანტივირუსულ პრეპარატ „ტამიფლუს“ მარაგი. ისინი გაიცემა საავადმყოფოებში, სრულიად უფასოა და საავადმყოფოებს ამისი სერიოზული მარაგი აქვთ. ასევე „ტამიფლუ“ გაიცემა მინისტრის 30 დეკემბრის ბრძანებით ადამიანების ორ კატეგორია ჯგუფებზე – ესენია ორსულები და სოციალურად დაუცველები, საზოგადოებრივი ჯანდაცვის ცენტრების საშუალებით ექიმის დანიშნულების მიხედვით. ამ დროისათვის, პრეპარატი დაახლოებით 200-მდე ადამიანზეა გაცემული და მათ შორის ჭარბობენ ორსულები.

ვაწარმოებთ მუდმივ მონიტორინგს, თუ რა ტიპის ვირუსები ცირკულირებენ ქვეყანაში. გასულ კვირაში პრევალირებს B ტიპის გრიპის ვირუსი. დაახლოებით 76%-ში გვაქვს B ტიპის გრიპი. დაახლოებით 6%-ში გვაქვს A ტიპის გრიპის H1 ქვეტიპი“, – განაცხადა გამყრელიძემ.

არსებულ სიტუაციაში დაავადებათა კონტროლის ცენტრი სკოლამდელ და ზოგადსაგანმანათლებლო დაწესებულებებში არდადეგების გახანგრძლივების მიზეზს ვერ ხედავს.

შეგახსენებთ, რომ ბაღები და სკოლები მუშაობას 15 იანვარს განაახლებენ, - აღნიშნულია "პირველი არხის" ინფორმაციაში. 

პოპულარული სტატიები
რა განაპირობებს ახალგაზრდებში უმუშევრობის და პასიურობის პრობლემას
გენდერული თანასწორობა რეგიონებში - ქალების ჩართულობა საქმისთვის გადამწყვეტია 
რა მნიშვნელობა აქვს ოზონის შრეს და რას ვაკეთებთ მის დასაცავად? 
 
ვიდეოები
გამოკითხვა
 


სპონსორები

2024 ყველა უფლება დაცულია