„მეგობრებო „ნაცმოძრაობიდან“, ძალა ერთობაშია, თუ გადაღუნვაში? სამწუხაროა, ძალიან სამწუხარო“, - „ევროპული საქართველოს“ ერთ-ერთი ლიდერი, გიგი უგულავა „ნაციონალური მოძრაობის“ მხრიდან ისნის მაჟორიტარად ხატია დეკანოიძის დასახელებას „ფეისბუქზე“ ეხმაურება.
ამასთან, მოგვიანებით, გიგი უგულავამ მინაწერი გააკეთა, სადაც აღნიშნავს, რომ „ევროპული საქართველო“ ისნის მაჟორიტარულ ოლქში მხარს უჭერს გაერთიანებული ოპოზიციის კანდიდატს, გიორგი ვაშაძეს.
„ჩვენ შეთანხმების ერთგული ვრჩებით, შესაბამისად, ისანში მხარს გიორგი ვაშაძეს დავუჭერთ. კიდევ ერთხელ, ძალიან სამწუხაროა ეს ყველაფერი. სამწუხაროა, რომ ხატიას წარმატებას არ ვუსურვებ. დრო გამოაჩენს, რომ ეს ძალიან არასწორი ნაბიჯი იყო“,- წერს გიგი უგულავა.
„გვქონდა შეთანხმება ისნისა და სხვა მაჟორიტარულ ოლქებზე და ამ შეთანხმებას არღვევს „ნაციონალური მოძრაობა“,- ასე ეხმაურება გაერთიანებული ოპოზიციის ისნის მაჟორიტარ დეპუტატობის კანდიდატი, „სტრატეგია აღმაშენებლის“ ლიდერი გიორგი ვაშაძე „ნაციონალური მოძრაობის“ მხრიდან ისნის მაჟორიტარობის კანდიდატად ხატია დეკანოიძის დასახელებას.
„ეს არის მათი გადაწყვეტილება, ითამაშონ ოპოზიციური გაერთიანების შიგნით პოლიტიკური თამაშები, ნაცვლად იმისა, რომ შემოგვიერთდნენ „დამსხვრეული ოცნებების“ პარტიის დასამარცხებლად საპარლამენტო არჩევნებში.
ჩვენს თანამოქალაქეებს არ აინტერესებთ პოლიტიკური ინტრიგები, ისინი ჩვენგან ელიან სიღარიბისა და კრიმინალის დამარცხებას, „დამსხვრეული ოცნებების“ პარტიის დამარცხებას.
სულ ესაა, რაც შემიძლია გითხრათ. ჩვენ მოვიპოვებთ გამარჯვებას ისნის ოლქში „დამსხვრეული ოცნებების“ პარტიის კანდიდატზე და ჩემთან, როგორც ამ ქვეყნის მომავალ პრემიერ-მინისტრთან ერთად, დავამარცხებთ კრიმინალსა და სიღარიბეს.
საქართველოში არც ერთი ბავშვი აღარ უნდა შიმშილობდეს და მოქალაქეები ქუჩებში თავს უსაფრთხოდ უნდა გრძნობდნენ. ეს არის ის, რაც ჩემთვის ყველაზე მნიშვნელოვანია და მაღელვებს“,- წერს გიორგი ვაშაძე „ფეისბუქზე“.
„ნაციონალური მოძრაობის“ ისნის მაჟორიტარობის კანდიდატი ხატია დეკანოიძე იქნება. ამის შესახებ ინფორმაციას პარტიის პრესსამსახურის წარმომადგენელი სოციალურ ქსელში ავრცელებს.
ამასთან, დეკანოიძე „ფეისბუქზე“ წერს:
„ერთადერთი, რაც დღეს მინდა გითხრათ: თავს დავდებ ბიძინა ივანიშვილის დასამარცხებლად. მე არ მჭირდება არჩევნები ძალაუფლებისა და თანამდებობისთვის. მე ვიბრძოლებ თქვენი კეთილდღეობის, უსაფრთხოებისა და უფლებებისთვის. შეხვედრამდე“,- წერს დეკანოიძე.
„ნაციონალურმა მოძრაობამ“ ისნის მაჟორიტარობის კანდიდატი ხატია დეკანოიძე დაასახელა. გაერთიანებულმა ოპოზიციამ ისანში მაჟორიტარი დეპუტატობის კანდიდატად გიორგი ვაშაძე წარადგინა, - აღნიშნულია „პირველი არხის“ ინფორმაციაში.