- ნელ-ნელა მოედო „კოვიდი“ ქვეყანას და ახლა ტაში იმათ დავუკრათ, ვინც საზღვრების გაუაზრებელ გახსნას, შეზღუდვების უპირობო მოხსნას, ექიმების ლანძღვა-გინებას, ვირუსისადმი ირონიულ დამოკიდებულებას უჭერდა მხარს.
რაც შეეხება მათ, ვინც კორონავირუსის არსებობისადმი დღემდე სკეპტიკურადაა განწყობილი, ისინი ნამდვილად ოვაციას „იმსახურებენ“.
ახლა უკვე პირიქით, იმ მიზეზით მოვდგეთ მთავრობას, რატომ ვერ აღკვეთა ვირუსის გავრცელება, როცა არც პირბადის ტარება გვინდა, არც დისტანციის დაცვა, როცა არც თავს და არც ჩვენს ახლობლებს არ ვუფრთხილდებით... - წერს საპროექტო ჯგუფ „სითი ინსტიტუტი საქართველოს“ ხელმძღვანელი მამუკა სალუქვაძე „ფეისბუქის გვერდზე“.
საქართველოში კორონავირუსის 45 ახალი შემთხვევა გამოვლინდა. მონაცემებს დაავადებათა კონტროლის ეროვნული ცენტრი ავრცელებს. ამ დროისთვის საქართველოში კორონავირუსის 1 729 შემთხვევაა დადასტურებული.
გამოჯანმრთელდა კიდევ ექვსი პაციენტი – განკურნებულთა რაოდენობა სულ 1 321-ს შეადგენს.
ამასთან, უცხოეთიდან სამკურნალოდ გადმოყვანილია საქართველოს 41 მოქალაქე. კორონავირუსის შედეგად, ქვეყანაში 19 პაციენტი გარდაიცვალა.
კარანტინის რეჟიმში იმყოფება 5 882 მოქალაქე, ხოლო სტაციონარში მეთვალყურეობის ქვეშ – 390.