ბოლო სოციოლოგიური გამოკითხვების შედეგებს ექსპერტი ვანო მაჭავარიანი ფეისბუქის გვერდზე ეხმაურება.

„ეს კვლევები ძალიან მნიშვნელოვანია საზოგადოების განწყობების გადმოსაცემად და ბევრი პარტია, მათ შორის მმართველი პარტია და ოპოზიცია ძალიან კარგად იცნობს მის შედეგებს. მათი შიდა კვლევები იქნება ეს  თუ სხვა კვლევები ზუსტად ამ შედეგებს, ამ ციფრებს მიუთითებს.

„ქართულმა ოცნებამ“ კარგად იცის, რომ მას არ აქვს 40 %-ზე მეტი მხარდაჭერა, მიუხედავად იმისა, რომ უნდათ 60% ჰქონდეთ.

თუ ოპოზიცია სწორად დაალაგებს თავის წინასაარჩევნო ხედვებს და სტრატეგიას, შანსები როგორც მმართველი გუნდის, ისე მისი ძირითადი ოპონენტების არის თანაბარი.

მნიშვნელოვანია, რომ ძალიან დიდი პროცენტი მოსახლეობის აპირებს არჩევნებზე წასვლას და ეს მზაობა მიუთითებს იმას, რომ „ქართული ოცნებისთვის“ რთული იქნება „გამოაცხოს“ ციფრები ამ არჩევნებზე.

ძალიან აქტიურად ნეგატიურ საარჩევნო კამპანიას დავინახავთ „ქართული ოცნების“ მხრიდან მათი ოპონენტების წინააღმდეგ.

„ქართულმა ოცნებამ“ და ბიძინა ივანიშვილმა კარგად იციან, რომ ქვეყანაში მათი მხარდაჭერა კლებულობს იმ შეუსრულებელი დაპირებების, იმ ერთპარტიული მმართველობის გამო, რომელიც არავითარ შედეგს არ აძლევს საქართველოს მოსახლეობას, მათ ეკონომიკურ, სოციალურ მდგომარეობას, რომელიც დღითიდღე უარესდება, დაპირებები დაპირებებად რჩება.

რა თქმა უნდა, ამ თვალსაზრისით ძალიან სერიოზული სამუშაო ექნება „ქართულ ოცნებას“, რომ ეს 40%-იც არ დაკარგოს, იმიტომ რომ წინასაარჩევნო პერიოდი ახლა იწყება.

ახლა გამოჩნდება რეალურად, რა მდგომარეობაშია საქართველოს ეკონომიკა, ფინანსები, მოქალაქეების სოციალური მდგომარეობა და რამდენად რეალისტურია პოლიტიკური პარტიების დაპირებები, რომ მათი მდგომარეობა გაუმჯობესდეს და არ დარჩეს ერთ ადგილზე, უძრაობაში, როგორც ჩვენ დღეს გვაქვს“, - წერს ვანო მაჭავარიანი.