„კომერციული სექტორისათვის გაზის ფასი 24 თეთრით გაიზარდა, რაც ერთბაშად 28 პროცენტიან მატებას ნიშნავს. ეს უმძიმეს დღეში ჩააგდებს ბიზნესს.

ვინ გაზარდა გაზის საფასური? ხელისუფლების კარის ბიზნესმენმა.

თბილისის გაზის სისტემას, სანამ ყაზახებისგან სახელისუფლებო კლანს გადეცემოდა, ჩამოეწერა ბიუჯეტის წინაშე არსებული დავალიანება 100 მილიონი ლარის ოდენობით. ასე გასუფთავებულ-გაკრიალებული ბიზნესი გადაიბარეს, პატარა პაუზა გააკეთეს, მორჩა არჩევნები და აიშვეს. 

გაზში ხომ ფეხი მოიკიდეს, ახლა დენის ხელში ჩაგდების გეგმა აამუშავეს. იმავე ბიზნესმენმა ახლახან სპეციალურად, წინასწარ მისთვის  გამოცხადებულ აუქციონზე იყიდა სახელმწიფოს ხელში არსებული „თელასის“ წილის 25 პროცენტი, რა თქმა უნდა, შორსმიმავალი მიზნებით.

ესაა კლანური მმართველობის შედეგი: აზიანებს ბიზნესს და აღარიბებს ხალხს“, - წერს რომან გოცირიძე (ენმ) „ფეისბუქის“ გვერდზე.

"ბოლო წლებში ეროვნული ვალუტის კურსის ცვლილებამ აშშ დოლართან მიმართებით, სერიოზული პრობლემები შექმნა დედაქალაქის უწყვეტი გაზმომარაგების საკითხში, ვინაიდან კომპანია ბუნებრივი გაზის შესყიდვას ახორციელებს აშშ დოლარში, ხოლო მომხმარებლებთან ბუნებრივი გაზის მიწოდებისას ანგარიშსწორებას ახდენს ლარში ფიქსირებული ფასით“, - ეს არის ამონარიდი კომპანია „თბილისი ენერჯის“ განცხადებიდან, რომელიც 2021 წლის 3 იანვრიდან კომერციული სექტორისთვის, გარდა პურის საწარმოებისა, არასაყოფაცხოვრებო მომხმარებლისათვის მისაწოდებელი ბუნებრივი გაზის ფასი ერთ კუბურ მეტრზე 24 თეთრით 1.10 ლარამდე გაძვირებას შეეხება.

კომპანიის მტკიცებით, იმისათვის, რომ არ შეფერხდეს ბუნებრივი გაზის შესყიდვის პროცესი და თბილისის მოსახლეობის უწყვეტი გაზმომარაგება, აუცილებელია, არასაყოფაცხოვრებო აბონენტებისთვის ბუნებრივი გაზის ფასის კორექტირება.

„შპს „თბილისი ენერჯი“ დღემდე ინარჩუნებს ბუნებრივი გაზის ყველაზე დაბალ ტარიფს არასაყოფაცხოვრებო მომხმარებლებისთვის. კომპანია შექმნის პირველივე დღიდან, ქართული ბიზნესის განვითარების ხელშეწყობისთვის, საკუთარი რესურსებით აბალანსებს ვალუტის კურსის ცვლილებით, ბუნებრივი გაზის შესაძენ და სარეალიზაციო ფასებს შორის წარმოქმნილ სხვაობას.

ასევე, ყველაზე მთავარი - მილიონობით ლარის ზარალი სერიოზულ საფრთხეს უქმნის მნიშვნელოვან პროექტებს, რომლებსაც შპს „თბილისი ენერჯი“ დედაქალაქის მასშტაბით ახორციელებს - მაგალითად, გამანაწილებელი ქსელის რეაბილიტაცია-განახლება, რომელიც 60 წელია არ შეცვლილა და მწყობრიდანაა გამოსული. ქსელის განახლება სასიცოცხლოდ მნიშვნელოვანია ჩვენი აბონენტების, დედაქალაქის მოსახლეობის მეტი უსაფრთხოებისთვის.

დღეისათვის შპს „თბილისი ენერჯის“ უჭირს მოწოდებული ბუნებრივი გაზის შესასყიდად საკმარისი ფინანსური სახსრების აკუმულირება, რაც ცხადია, როგორც ზემოთ აღვნიშნეთ, არა მხოლოდ რეალურ საფრთხეს უქმნის მომხმარებელთა უწყვეტ გაზმომარაგებას, არამედ საფრთხეს უქმნის კომპანიის ნორმალურ და უსაფრთხო ფუნქციონირებას.

ხაზგასმით აღვნიშნავთ, რომ ბუნებრივი გაზის ფასი არ ძვირდება საყოფაცხოვრებო მომხმარებლებისთვის, რომელიც 1 კუბურ მეტრზე 0,461374 ლარს შეადგენს და დადგენილია სემეკის მიერ. ასევე, ქვეყანაში დღეს არსებული მდგომარეობის გათვალისწინებით ტარიფი არ გაუძვირდებათ პურის საწარმოებს", - ნათქვამია განცხადებაში.