[მედიანიუსი]
სასჯელის უპირობო შეკრებითობის პრინციპის გაუქმებაზე მთავრობის მიერ ინიცირებული კანონპროექტი პარლამენტმა პირველი მოსმენით მიიღო.
ცვლილებები სისხლის სამართლისა და სისხლის სამართლის საპროცესო კოდექსებში შედის.
პროექტის თანახმად, დანაშაულთა ერთობლიობისას საბოლოო სასჯელის უფრო მკაცრი სასჯელი ნაკლებად მკაცრს შთანთქავს. დანაშაულის რეციდივის შემთხვევაში საბოლოო სასჯელის დანიშვნისას, უფრო მკაცრი სასჯელი ნაკლებად მკაცრს შთანთქავს ან ნაწილობრივ ან მთლიანად ამ დანაშაულთათვის განსაზღვრული სასჯელები შეიკრიბება. ამასთან, რეციდივის დროს ვადიანი თავისუფლების აღკვეთის სახით დანიშნული საბოლოო სასჯელის ვადა 30 წელს არ უნდა აღემატებოდეს.
რაც შეეხება განაჩენთა ერთობლიობას, შესაძლებელი იქნება სასჯელთა ნაწილობრივ ან მთლიანად შეკრება, ან ბოლო განაჩენით დანიშნული სასჯელი შთანთქავს წინა განაჩენით დანიშნული სასჯელის მოუხდელ ნაწილს. ამ შემთხვევაში მოსამართლე არჩევანს კონკრეტული საქმის, კონკრეტული გარემოებებისა და განსასჯელის პიროვნებიდან გამომდინარე გააკეთებს.
