„საქართველოში ვაქცინის შემოსვლამდე, იდეალურ შემთხვევაში ნახევარი წელია დარჩენილი. ეს ნახევარი წელიწადი უმძიმესი იქნება ქვეყნისათვის, თუ ვირუსის გავრცელების დინამიკას დავაკვირდებით.

ჯანდაცვის სისტემა ჩამოშლის პირასაა მისული.

დღეს, ყველაზე საშიში ის კი არ არის, რომ ვიღაც გონებაჩლუნგები ამბობენ, ვირუსი არ არსებობსო ან ინტერნეტს რომ აბრალებენ მის გავრცელებას. ასეთები ყველგანაა. რას ვიზამთ, ასეთი ყოფილა ადამიანის ბუნება და მას ვერც ელექტრონული საუკუნე ცვლის. ბნელი ყველა საუკუნეში ბნელია. პრობლემა საფრთხის გამარტივებული აღქმაა მოსახლეობის დიდი ნაწილის მხრიდან, რასაც ხელს ბევრი რამ უწყობს.

„ვირუსი ჩვეულებრივი გაციებაა, დაავადებულთა 85 პროცენტს მსუბუქად გადააქვს, მაინც ყველამ უნდა მოვიხადათოთ, რა შიმშილს მოვუკლავთ და რა ვირუსს“ და ასე შემდეგ - მსგავსი განწყობილებების შექმნა არის საფუძველშივე მცდარი, არაზნეობრივი და საშიში. სხვა ენაზე, იგივე ტექსტი ასე უნდა წავიკითხოთ: არა უშავს, ინფიცირებულთა მხოლოდ 15 პროცენტს აქვს გართულებები და აქედან მხოლოდ 5 პროცენტი მოკვდება.

მხოლოდ!

ჩაკეტვა-არჩაკეტვის საკითხიც მსოფლმხედველობრივი დისკუსიის თემა გახდა, როცა ჩვენს გვერდით ყოველდღიურად ათეულობით ადამიანი იღუპება და ეს რიცხვი დღითიდღე მოიმატებს.

არ არსებობს არცერთი ქვეყანა, სადაც არის  ჩვენნაირი მდგომარეობა (ჩვენზე უარესი სულ ორიოდე ქვეყანაშია მსოფლიოში ბოლო დროის მონაცემებით) და არ მიემართოს შეზღუდვებისთვის.

ახლა მთავარი ამოცანა ის არის, რომ ის მწირი რესურსები (მათ შორის ნასესხები ფული), ისე იყოს გამოყენებული, რომ რაც შეიძლება მინიმუმზე იქნას დაყვანილი შეზღუდვებით გამოწვეული ზიანი და ეს შეზღუდვები არ უნდა ცდებოდეს იმ გონივრულ საზღვრებს, რაც ამ ღატაკ ქვეყანას კიდევ უფრო დიდ სიღატაკეში არ გადააგდებს.

ხელისუფლება  უნამუსოდ ეწეოდა პანდემიის პოლიტიზებას, რაც მის არაკომპეტენტურობასთან ერთად შექმნილი უმძიმესი ვითარების ერთ-ერთი განმაპირობებელი ფაქტორია. მაგრამ ქვეყანა მხოლოდ ხელისუფლება არ არის. ყველამ უნდა გააცნობიეროს თავისი წილი პასუხისმგებლობა“, - წერს რომან გოცირიძე (ენმ) „ფეისბუქის“ გვერდზე.

საქართველოში კორონავირუსის 3 768 ახალი შემთხვევა გამოვლინდა. ამის შესახებ ინფორმაცია მთავრობის სპეციალურ ვებგვერდ stopcov.ge-ზე განახლდა.

ქვეყანაში ბოლო 24 საათში 4 055 ადამიანი გამოჯანმრთელდა. ბოლო დღე-ღამეში კორონავირუსით გარდაიცვალა 41 პაციენტი.

საქართველოში კორონავირუსით ინფიცირების სულ 96 860  შემთხვევაა გამოვლენილი, მათგან 77 932 გამოჯანმრთელდა, 894 კი გარდაიცვალა.

კარანტინის რეჟიმში იმყოფება 2 226 ადამიანი, ხოლო „კოვიდ“-სასტუმროში – 3 411. სტაციონარში მეთვალყურეობას გადის 5 879 პაციენტი, - აღნიშნულია „პირველი არხის“ ინფორმაციაში.