გელა მამულაშვილი
იურისტი კახა კახიშვილი ამბობს, რომ თუ ტელეკომპანია „რუსთავი2-ში“ ფარული ჩანაწერების ფაქტზე გამოძიება უმოკლეს ვადაში ჭეშმარიტებას არ დაადგენს, ამასთან დაკავშირებით კითხვები ხელისუფლების მიმართ გაჩნდება. მისივე თქმით, ამ საკითხზე პრემიერის შეფასება ნაჩქარევი იყო.
– ფაქტი და განცხადება საფუძველს ქმნის, რომ საქმეზე ჭეშმარიტების დადგენის მიზნით გამოძიება დაიწყოს. პროცესი უკვე დაწყებულია და ძალიან ინტენსიურად მიმდინარეობს. რუსთავი 2–ის თანამშრომლებიც კმაყოფილი არიან პროკურატურის მოქმედებით და კვალიფიკაციით.
რაც შეხება ვერსიებს – ერთია, რომ დანაშულებრივი გზით უსმენდნენ და უთვალთვალებდნენ „რუსთავი2-ის“ თანამშრომლებს, მაგრამ გასარკვევი და დასადგენია, ეს უკანონობა ვის მიერ ხორციელდებოდა. მეორე ვერსია, ალბათ, პროკურატურის განცხადებითვე უკვე გამოირიცხა, რომ რომელიმე აღძრული სისხლის სამართლის საქმეში, გამოძიების ფარგლებში, სასამართლოს სანქციით ხდებოდა ფარული ჩაწერა და მიყურადება; და მესამე – ეს არის ინსპირაცია, რომელიმე დაინტერესებული მხრიდან.
თუ გამოძიება უმოკლეს ვადაში საზოგადოებას არ წარუდგენს დამაჯერებელ, არგუმენტირებულ პასუხს, რასაკვირველია, კითხვები ხელისუფლების მიმართ გაჩნდება. ამიტომ, პროკურატურამ რაც შეიძლება სწრაფად საქმეზე ჭეშმარიტება, ამის ჩამდენი პირები და პასუხისმგებლობა უნდა დაადგინოს.
– პრემიერმა ღარიბაშვილმა ფარული მიყურადების ფაქტს „რუსთავი 2–ის“ იმპროვიზაცია უწოდა...
– ნაჩქარევი განცხადება იყო. ეს არ უნდა გაეკეთებინა და გამოძიების შედეგებს დალოდებოდა.
– „რუსთავი 2–ის“ დირექტორი, თავის დროზე ტელეკომპანია იმედში განხორციელებულ ფარულ მიყურადებას კანონიერს უწოდებს; თქვენი პოზიცია როგორია?
– ეს უნდა გაირკვეს იმ საქმის ფარგლებში გამოძიებით, რომელსაც იმედის დარბევა ჰქვია. ეჭვი მეპარება, რომ ეს კანონიერი ყოფილიყო, რადგან ადამიანებს ყოველგვარი სანქციის გარეშე უსმენდნენ. აღძრავდნენ საქმეს ვთქვათ ავტოავარიაზე, სადღაც ჭიჭიკო ბიჭიკოს მანქანას დაარტყამდა და მის ფარგლებში ყველა პოლიტიკოსს უსმენდნენ. ასევე უკანონოდ მათი ტელეეთერში გავრცელება ხდებოდა.