„როსნეფტი“ დასავლეთის სანქციებშია მოხვედრილი და ოკუპირებული ტერიტორიების შესახებ კანონს არღვევს
myrights.ge
ბიზნესმენ დავით იაკობაშვილის კომპანია Petrocas Energy Group ადასტურებს გავრცელებულ ინფორმაციას, რომ „როსნეფტმა“ „პეტროკასის“ აქციების 49%-პროცენტიანი პაკეტი შეიძინა. „როსნეფტის“ მფლობელობაში გადავა ფოთის პორტის ნავთობტერმინალი, ასევე „გალფის“ ავტოგასამართი სადგურების ნაწილი, თუმცა აქციათა საკონტროლო პაკეტი კვლავ დავით იაკობაშვილს რჩება. გარიგების მოცულობა უცნობია.
„ახალგაზრდა ფინანსისტთა და ბიზნესმენთა ასოციაციის“ შეფასებით, ბოლო პერიოდის ყველაზე გახმაურებული ბიზნეს-გარიგება, რომელიც Petrocas Energy Group-ის აქციების 49%-ის „როსნეფტის“ მიერ შესყიდვას ეხება, ყოფილი ხელისუფლების მხრიდან საბოტაჟის ნიშნებს შეიცავს. როგორც ასოციაციაში აცხადებენ, წინა ხელისუფლების პირობებში, მათი ანტირუსული განწყობილების და განცხადებების მიუხედავად, არაერთი ბიზნეს-გარიგება შედგა რუსული მხარის მონაწილეობით.
„შეგახსენებთ, რომ „ნაციონალური მოძრაობის“ მმართველობის პერიოდში რუსულ მხარეზე არაერთი მნიშვნელოვანი ობიექტი გასხვისდა და რუსული ინვესტიციების შემოდინებაც საკმაოდ მძლავრი იყო. მაგალითად, „მადნეულის“ და „კვარციტის“ პრივატიზება რუსულ მხარეზე, რომელიც საკმაოდ საეჭვო ვითარებაში განხორციელდა. ასევე, შეგახსენებთ, რომ „თელასის“ აქციების 75% რუსული „ინტერ რაოს“ საკუთრებაშია. რუსული კაპიტალი ფიგურირებს აგრეთვე საბანკო, სატელეკომუნიკაციო, ქიმიური წარმოების და სხვა სფეროებში. ეს ყველაფერი კი სწორედ „ნაციონალური მოძრაობის“ მმართველობის პირობებში ხდებოდა და დღეს, ამ პოლიტიკური ძალისგან, რუსეთზე ეკონომიკური დამოკიდებულობის გაზრდაზე საუბარი, ყოვლად უსაფუძვლოა.
Petrocas Energy Group-ი არის კომპანია, რომელიც წინა ხელისუფლების სახელს უკავშირდებოდა, თუმცა ხელისუფლების ცვლილების შემდგომ თავდაცვის ყოფილმა მინისტრმა დავით კეზერაშვილმა ეს აქტივი და კიდევ სხვა ბიზნესები რუს ბიზნესმენ დავით იაკობაშვილს მიყიდა, თუმცა, როგორც ამბობენ, რეალურად აღნიშნულ აქტივებს კვლავ კეზერაშვილი განაგებდა. შესაბამისად, ნათლად იკვეთება ის გარემოება, რომ „ნაციონალური მოძრაობა“ ხელისუფლებაში ყოფნის დროსაც და მის შემდეგაც, აქტიურად შედის ბიზნეს გარიგებებში რუსულ მხარესთან, თუმცა ევროკავშირთან ასოცირების შეთანხმების ხელმოწერის და ხელშეკრულების რატიფიცირების მიუხედავად, მთავრობას რუსული ინტერესების ლობირებაში და გატარებაში სდებს ბრალს.
აქვე გვინდა შეგახსენოთ, რომ სწორედ წინა ხელისუფლების მმართველობის პერიოდში მიმდინარეობდა აქტიური მოლაპარაკებები „გაზრპომთან“ მაგისტრალური გაზსადენის მიყიდვის თაობაზე, ასევე წინა ხელისუფლების დროს იყო მოლაპარაკებები რუსული მხარისთვის „ენგურჰესის“ მიყიდვაზე. მართალია, „ენგურჰესი“ ქართული მხარის საკუთრებაში დარჩა, თუმცა, 2008 წლის დეკემბერში, რუსეთთან საომარი მოქმედებების შემდეგ, „ნაციონალური მოძრაობის“ მთავრობამ რუსულ „ინტერ რაოსთან“ ხელი მოაწერა თანამშრომლობის მემორანდუმს, „ენგურჰესის“ ეფექტიანი ექსპლუატაციის შესახებ, ანუ „ენგურჰესი“ რუსულ მხარეს, პრაქტიკულად, მართვაში გადაეცა. ამას წინ უძღვოდა, საქართველოს მთავრობის მიერ 2005 წელს „გაზპრომისთვის“ ერთობლივი საწარმოს შექმნის შეთავაზება, რომელიც გაზსადენის მართვას განახორციელებდა.
ამდენად, Petrocas Energy Group-ის აქციების მნიშვნელოვანი წილის რუსული „როსნეფტისთვის“ მიყიდვა, აფბა-ს შეფასებით არის იმ პოლიტიკის ნაწილი, რასაც „ნაციონალური მოძრაობა“ წლების განმავლობაში ახორციელებდა. ყოფილი ხელისუფლება რუსეთის მიმართ გამოთქმული მწვავე განცხადებების და პოზიციის მიღმა, აქტიურ ბიზნეს ურთიერთობაში იყო რუსულ მხარესთან. იგივე პროცესებს ყოფილი ხელისუფლება დღესაც აგრძელებს და ცდილობს ეს მოქმედ მთავრობას მიაწეროს“, - ნათქვამია ასოციაციის მიერ გავრცელებულ ინფორმაციაში.
თავის მხრივ, „ნაციონალური მოძრაობის“ ერთ-ერთი ლიდერის, ზურაბ ჯაფარიძის განცხადებით, კაპიტალის შემოსვლა არც ერთი ქვეყნიდან პრობლემას არ წარმოადგენს, მაგრამ თუ რომელიღაც კომპანია არღვევს საქართველოს კანონმდებლობას, ცხადია, ხელისუფლებამ პასუხი უნდა გასცეს:
„ფულის წარმომავლობას ზოგადად არა აქვს არანაირი მნიშვნელობა. ნებისმიერი კაპიტალი, რომელიც ქვეყანაში შემოდის, ასაქმებს საქართველოს მოქალაქეებს და თუ ამ კაპიტალის გამოყენება არ ხდება პოლიტიკური მიზნებისთვის, იქნება ეს რუსეთი, თუ სხვა ქვეყანა, ცხადია, მას არანაირი პრობლემა არ უნდა შეექმნას“.
მისივე თქმით, როდესაც „ნაციონალური მოძრაობა“ იყო ხელისუფლებაში, საქართველოში შემოვიდა დიდი ოდენობით რუსული კაპიტალი და მან დაასაქმა საქართველოს მოქალაქეები, რომლებიც შემოსავალს იღებენ.
როგორც ჯაფარიძე აცხადებს, „როსნეფტთან“ დაკავშირებით სხვა ტიპის პრობლემაა:
„ჯერ ერთი ის, რომ „როსნეფტი“ არის ის კომპანია, რომელიც დასავლეთის სანქციებში მოხვდა. თუ ჩვენ გვინდა, რომ ვიდგეთ ცივილიზებული სამყაროს მხარეს, ამ შემთხვევაში საქართველოც უნდა შეუერთდეს სანქციებს. მეორე - „როსნეფტი“ არის კომპანია, რომელიც არღვევს კანონს ოკუპირებული ტერიტორიების შესახებ. ის აფხაზეთის ტერიტორიაზე, შავი ზღვის აკვატორიაში აწარმოებს ნავთობმოპოვების სამუშაოებს და თუნდაც ამის გამო, საქართველოს ხელისუფლებას უნდა შეექმნა მისთვის პრობლემა“. ზურაბ ჯაფარიძის მოსაზრებებს „ინტერპრესნიუსი ავრცელებს.
ცნობისთვის, Petrocas Energy Group დაკავებულია ნავთობისა და ნავთობპროდუქტების ვაჭრობით და გადაზიდვით. ფლობს ავტოგასამართი სადგურების ქსელს საქართველოში, სომხეთში, აზერბაიჯანსა და ყაზახეთში და ფოთის პორტის ორ ნავთობტერმინალს. „როსნეფტის“ ინტერესის ძირითად საგანს სწორედ ფოთის პორტი წარმოადგენს, როგორც სომხეთის საწვავით უზრუნველყოფის საშუალება. რუსული ნავთობგიგანტის მიერ ფოთის ტერმინალით დაინტერესების შესახებ ინფორმაცია მიმდინარე წლის მარტში გავრცელდა.
„როსნეფტის“ ინფორმაციით, კომპანიამ უკვე მოაწერა ხელი დოკუმენტებს, რომლის თანახმადაც, ასევე იგეგმება ერთობლივი კომპანიების შექმნა ამიერკავკასიაში „როსნეფტის“ პროექტების რეალიზაციის მიზნით. „ამ გარიგებით „როსნეფტი“ საგრძნობლად გააფართოებს საკუთარ არსებობას ამიერკავკასიაში, გაზრდის საქმიანობის გეოგრაფიას“, - ნათქვამია „როსნეფტის“ განცხადებაში.
„როსნეფტის“ ოფიციალურ ვებგვერდის მიხედვით, დავით იაკობაშვილმა განაცხადა, რომ ეს გარიგება „პეტროკასის“ წარმატების კიდევ ერთი დასტურია.
რუსეთის სახელმწიფო ნავთობმომპოვებელი კომპანია სამხრეთ კავკასიის რეგიონში ბოლო წლების განმავლობაში განსაკუთრებით გააქტიურდა. 2013 წელს, ბაქოში ვლადიმირ პუტინს ვიზიტისას კომპანიამ ურთიერთთანამშრომლობის ხელშეკრულება გააფრომა აზერბაიჯანის სახელმწიფო კომპანია „სოკართან“, რომელიც საქართველოშიც ოპერირებს. ამას გარდა, „ამერიკის ხმის“ ინფორმაციით, „როსნეფტი“ აფხაზური მხარისაგან 2009 წელს მიღებული ნებართვის საფუძველზე შავი ზღვის შელფის აფხაზეთის მონაკვეთზეც საქმიანობს.
„პეტროკასისა“ და „როსნეფტის ბიზნეს-გარიგებაზე ექსპერტ დემურ გიორხელიძეს ვესუბრებით:
- სიმართლე გითხრათ, არ მესმის აღნიშნულ გარიგებაზე ხმაური რატომ არის ატეხილი. საქართველოს მთელ ეკონომიკაში რაიმე ღირებული თუ გვაქვს, ყველაფერი ისედაც რუსების ხელშია.
- „ახალგაზრდა ფინანსისტთა და ბიზნესმენთა ასოციაცია“ აცხადებს, რომ ეს გარიგება ყოფილი ხელისუფლების წარმომადგენლების საბოტაჟის ნიშნებს ატარებს...
- სოციალურ ქსელში მეც დავწერე, რომ არ არის გამორიცხული ეს წინა ხელისუფლების პროვოკაცია იყოს, რადგან ქვეყანაში ყველა მნიშვნელოვან ფირმას ის აკონტროლებდა; წინა ხელისუფლების გარეშე რაიმე სერიოზული კომპანიის არსებობა უბრალოდ წარმოუდგენელი იყო; ამიტომ ყველაფერი ოფშორებში იყო განთავსებული. ახლა არ არის გამორიცხული, რომ თემა ხმაურის ასატეხად, დღევანდელი ხელისუფლების დასამცირებლად და მის წინააღმდეგ ნაბიჯების გადასადგმელად იყოს წამოწეული. ამ დროს, წინა ხელისუფლებამ ფაქტობრივად უზრუნველყო რუსული ინტერესის სრულად დაკმაყოფილება. ამას კიდევ დაემატა 2008 წლის ტრაგედია, როცა აფხაზეთისა და ცხინვალის რეგიონები ჩავაბარეთ.
- „როსნეფტი“ რომ დასავლეთის სანქციებშია მოხვედრილი და ოკუპირებული ტერიტორიების შესახებ კანონს არღვევს, არ ქმნის უხერხულობას?
- მოდით ასე ვთქვათ, საქართველოს მთავრობას იურიდიულად რის გაკეთება შეუძლია? ასევე უბრალოდ, ლოგიკურად ვიფიქროთ, ჩვენ რა გვინდა - ლიბერალური ეკონომიკა და დემოკრატია ნაციონალური მოძრაობისთვის, მხარდამჭერებისთვის და მათივე ბიზნესჯგუფებისთვის და მეორე მხრივ გვინდა დესპოტური ეკონომიკა, როცა ვინმე არ მოგვწონს, ღამით დავეცეთ და წავართვათ; ანდა რაიმე კონტრაქტი თუ გააფორმა, გავაუქმოთ და მისი ქონების ნაციონალიზაცია მოვახდინოთ. ამიტომ ლოგიკაში არიან მაგრად გაჭედილები.
მე დაზუსტებით არ ვიცი, რეალურად რა ოპერაცია კეთდება, ვინ რას ყიდის, მაგრამ აქამდე ვისი რა იყო ქვეყანაში, ეს ძალიან კარგად ვიცი; ისიც ვიცი, რომ ჩემი და თქვენი არაფერი იყო, რადგან ამ ყაჩაღურ ქვეყანაში ასე ვერაფრით იქნებოდა.
- ზურაბ ჯაფარიძე აცხადებს, რომ ხელისუფლებას ამ პროცესისთვის წინააღმდეგობა უნდა გაეწია...
- ახლა მთავარია იურიდიულად ჩამოაყალიბოს ბატონმა ზურაბმა საკუთარი პოზიცია. ახალგაზრდა კაცია, უჭკუო ნამდვილად არ არის და ცოტა დეტალურად ისაუბროს. ტექნოლოგიურად თითოეული ნაბიჯი როგორ უნდა გადაედგა ხელისუფლებას, რომ იგი კანონისა და საერთაშორისო სამართლის ფარგლებში დარჩენილიყო. ამ ლოგიკით რა გამოდის, რანაირი ეკონიმიკა გინდა? თუ ნაციონალური მოძრაობა მხარს გიჭერს, ყველაფერი გეპატიება და თუ ქონება სხვა ვინმეს ეკუთვნის, იქ უკვე არიქა, რუსეთი, რუსეთის ძახილს ვიწყებ? რუსეთმა საფრთხე შეგვიქმნა მაშინ, როდესაც პოლიტიკაში სერიოზული შეცდომები დაშვებული იქნა და არ იქნა გათვალისწინებული, თუ ვის როგორ ესმის უსაფრთხოების საკითხები სამეზობლოში. ამ რეალობას ჩვენ ვერ შევცვლით, ვალდებული ვართ ვიცხოვროთ თანაცხოვების პინციპებით და მშვიდობიანად. შეიძლება არ ვიმეგობროთ და ერთმანეთს ხვევნა-კოცნით არ ვხვდებოდეთ, მაგრამ ვალდებული ვართ თანაცხოვრების წესები დავიცვათ, არ შევქმნათ ერთმანეთისთვის საფრთხეები. შევუქმნით ვინმეს საფრთხეს, ისედაც დაშლის პირას ვართ მისული და ეს პროცესი კიდევ გაგრძელდება.
