მთავარი ჩვენს შესახებსაიტის რუკაკონტაქტი
 
სერგეი ლავროვი - რუსეთი მზად არის, საქართველოს ხელისუფლების კონსტრუქციული წინადადებები განიხილოს - 21 აპრილი 2020

ufleba.ge

რუსეთის საგარეო საქმეთა მინისტრის, სერგეი ლავროვის განცხადებით, რუსეთი მზად არის, საქართველოს ხელისუფლების კონსტრუქციული წინადადებები განიხილოს. აღნიშნული განცხადება სერგეი ლავროვმა ვიდეოპრესკონფერენციაზე გააკეთა დიმიტრი ლორთქიფანიძის მიერ დასმული კითხვის საპასუხოდ, რომელიც ვიდეოპრესკონფერნციაში მონაწილეობდა. დიმიტრი ლორთქიფანიძე მოდერატორმა წარადგინა, როგორც პრიმაკოვის სახელობის ქართულ-რუსული საზოგადოებრივი ცენტრის დირექტორი. ლორთქიფანიძემ რუსეთის საგარეო საქმეთა მინისტრს კითხვა დაუსვა ქართულ-რუსულ ურთიერთობების ნორმალიზების შესაძლებლობაზე.

დასმული კითხვის კონტექსტში სერგეი ლავროვმა საქართველოდან რუსეთის ბაზების გაყვანის დროს მიღწეულ შეთანხმებაზე ისაუბრა.

„პუტინმა და სააკაშვილმა საქართველოდან რუსეთის ბაზების გაყვანაზე მოლაპარაკების ერთ-ერთი რაუნდის დროს მიაღწიეს შეთანხმებას, რომ შეიქმნებოდა რუსეთ-საქართველოს ერთობლივი ანტიტერორისტული ცენტრი, რომელიც იმ რეგიონში ან მათ სიახლოვეს უნდა გახსნილიყო, სადაც რუსული სამხედრო ბაზები იყო დისლოცირებული. იქ უნდა ემუშავა 30 რუს და 200 ქართველ სპეციალისტს. ეს იქნებოდა ერთგვარი სიმბოლო, რომ საქართველოსა და რუსეთის ერთიანი მტერი არის ტერორიზმი და მაშინ პანკისის ხეობაში იყო არასტაბილური ვითარება. ამიტომ ეს ცენტრი იმუშავებდა ამ საკითხებზე, მაგრამ შემდეგ ქართულმა მხარემ შეთანხმების ამ პუნქტის რეალიზებაზე უარი თქვა. ვფიქრობ, თუ მაშინ გამოიჩენდნენ უფრო მეტ პატივისცემას ამ შეთანხმების მიმართ, ამას შეეძლო მოვლენების განვითარების სცენარი შეეცვალა. ეს იქნებოდა ჟესტი, რომელიც ფაქიზ სფეროში ნდობისა და თანამშრომლობის კარგი საფუძველი გახდებოდა. ამიტომ, რუსეთი მზად იქნება, ქართველი მეზობლების კონსტრუქციულ ნაბიჯებს გამოეხმაუროს და რუსეთი ამით დაინტერესებულია“, – განაცხადა სერგეი ლავროვმა.

მას ასევე ისაუბრა საქართველოსა და რუსეთს შორის დიპლომატიური ურთიერთობის აღდგენის შესაძლებლობაზეც.

ლავროვის თქმით, ამ კავშირების გაწყვეტის ინიციატორი რუსეთი არ ყოფილა.

„დღეს შვეიცარიის საელჩოში მოქმედებს რუსეთის ინტერესების სექცია და მოსკოვში ქართული ინტერესების სექცია, ელჩები არ გვყავს. მუშაობენ სექციის ხელმძღვანელები. ეს იძლევა კავშირების შენარჩუნების საშუალებას. თუმცა, ეს რომ სრულყოფილი საელჩო ყოფილიყო, მაშინ ეკონომიკური, სავაჭრო და კულტურული საკითხების გადაწყვეტა უფრო ოპერატიულად და ეფექტურად იქნებოდა შესაძლებელი“, – განაცხადა ლავროვმა.

მისივე თქმით, თუ საქართველო რუსეთს სავაჭრო წარმომადგენლობის გაზრდას შესთავაზებს, მოსკოვი ამ საკითხის განხილვისთვის მზად არის.

სერგეი ლავროვმა ასევე თქვა, რომ იმედი აქვს, რუსეთი და საქართველო ავიამიმოსვლის აღდგენის საკითხს უახლოეს პერიოდში მოაგვარებენ.

„რუსეთი საქართველოსთვის სიდიდით მესამე სავაჭრო პარტნიორია. საქართველო იღებს გაზპრომისგან გაზს, ეს ყველასთვის ცნობილი ფაქტებია. სამწუხაროდ, ჯერ არ არის ავიამიმოსვლა. მე იმედი მაქვს, რომ უახლოეს ხანში ეს პრობლემა მოგვარდება. ჩვენთვის ყველაზე მნიშვნელოვანია, რომ საქართველოში რუსოფობური კამპანია არ იყოს“, – განცხადა ლავროვმა.

რუსეთის საგარეო საქმეთა მინისტრმა ასევე ისაუბრა საქართველოს პრეზიდენტ სალომე ზურაბიშვილის მიერ რუსეთის შესახებ გაკეთებულ განცხადებებზე.

ლავროვი ამბობს, რომ „საქართველოს პრეზიდენტის ზოგიერთი განცხადება აგრესიულია“. მისივე თქმით, ეს არ უწყობს ხელს „საზოგადოებაში სწორი განწყობის ჩამოყალიბებას“.

წყარო: პირველი არხი

პოპულარული სტატიები
მე და სამოქალაქო ორგანიზაციები - ეს ქვეყანა ჩვენი მოსავლელია
  ციხეებში ძალადობრივი წესრიგი საფრთხეს უქმნის პატიმართა სიცოცხლეს და ჯანმრთელობას 
კორპორატიული პასუხისმგებლობა - პირბადე არ გვაქვს და არც გვექნება?

 

 
ვიდეოები
გამოკითხვა
 


სპონსორები

2020 ყველა უფლება დაცულია