მთავარი ჩვენს შესახებსაიტის რუკაკონტაქტი
 
ვადამდელი არჩევნები გარდაუვალია - რას ურჩევს გია ხუხაშვილი ოპოზიციას? - 02 ნოემბერი 2020

"ოპოზიციამ დოკუმენტურად რომ დაადასტუროს ეს რამდენიმე პროცენტი ნამდვილად არის გაყალბებული, ეს კრიტიკულად შეცვლიდა საარჩევნო შედეგებს"

ufleba.ge

 „ufleba.ge“ ექსპერტ გია ხუხაშვილს ესაუბრა.

- ბატონო გია, როგორ შეაფასებთ 31 ოქტომბრის საპარლამენტო არჩევნებს, რა მთავარ ნიშან-თვისებებს გამოყოფთ?

- ფაქტობრივად, ყველა მანკიერი ტექნოლოგია იქნა გამოყენებული. დიახ, 30 წლის განმავლობაში საარჩევნო მოცემულობის რა გამოცდილებაც დაგროვდა უკლებლივ ყველა იხმარეს.

თავისი, ახალი „ქართულ ოცნებას“ მაინც და მაინც არაფერი მოუფიქრებია. ყველაფერი - დაწყებული ადმინისტრაციული რესურსით, აღვირახსნილი პროპაგანდით, საზოგადოების გახლეჩვითა და დაპირისპირებით, მოსყიდვით, შანტაჟით, ყველა ეს ინსტრუმენტი იქნა გამოყენებული.

ამან რამდენად კრიტიკულად იმოქმედა არჩევნების შედეგებზე, ძნელი სათქმელია. ფაქტია, რომ ამ ყველაფერმა ხელისუფლებას კანონს მიღმა დამატებითი შედეგი მისცა.

აქ მთავარი კამათი ახლა არის იმაზე, რამდენად კრიტიკული იყო ეს მოცემულობა.

ფაქტია, ხელისუფლებას ჰქონდა უპირატესობა (პირველ ადგილზე გადიოდა), მაგრამ მისი შედეგი, კონკურენტული არჩევნების შემთხვევაში, სავარაუდოდ, არ იქნებოდა საკმარისი იმისთვის, რომ პოლიტიკური პარტნიორების გარეშე მთავრობის ფორმირება მოეხერხებინათ. და ზუსტად აქ იკვეთება ძირითადი კონფლიქტი, როდესაც ლეგიტიმაცია ხელისუფლების ეჭვქვეშ დგება.

- როგორ აფასებთ ოპოზიციის გადაწყვეტილებას შედეგების არაღიარების და საპროტესტო აქციების დაწყების შესახებ?

- პოლიტიკური კრიზისი სახეზეა. ახლა, ამის განვითარების ორი შესაძლო სცენარი არსებობს. 

პირველი - ოპოზიცია არ შედის პარლამენტში,  შესაბამისად, გარკვეული პერიოდი პარლამენტი პარალიზებული იქნება.

შესაძლოა პარლამენტის ფორმალურად გახსნა მოახერხონ, მაგრამ გამომდინარე იქიდან, რომ რიგი გადაწყვეტილებები პარლამენტში მიიღება კვალიფიციური უმრავლესობით და ეს უმრავლესობა პარლამენტში ფიზიკურად არ იქნება, გასაგებია, რომ საპარლამენტო მუშაობა იქნება პარალიზებული. და შესაბამისად, რიგგარეშე არჩევნების აუცილებლობა დადგება. სამართლებრივ ნაწილს ვამბობ, თუმცა ამას აქვს თავისი პოლიტიკური ნაწილიც - ბუნებრივია, სტერილური პარლამენტი სრული აბსურდი იქნება და ესეც სერიოზული პრობლემა იქნება ხელისუფლებისთვის.

ახლა, სხვა საკითხია რამდენად არგუმენტირებულია ოპოზიციის მხრიდან ეს ყველაფერი, იმ ფონზე, როდესაც საერთაშორისო თანამეგობრობა ერთი მხრივ, ამბობს, რომ დარღვევები იყო, მეორე მხრივ, გარკვეულწილად ირიბ ლეგიტიმაციას აძლევს საარჩევნო პროცესს.

ასე რომ, შესაძლებელია ასეთი განვითარება, ანუ კრიზისის სწრაფად გადაწყვეტის მცდელობა რიგგარეშე არჩევნების დანიშვნით. მაგრამ ვფიქრობ, უკეთესი მომზადება სჭირდება ამისთვის ოპოზიციას. დიახ, მეტი არგუმენტი სჭირდება.

ანუ ისე კი არა, ემოციურად რომ გამოსტყორცნიან ხან ერთ ბიულეტენს, ხან მეორეს. არა, მათ უნდა შეკრან ერთი დიდი საქმე, რომლითაც უეჭველად დადასტურდება, რომ ამ დარღვევევბის გარეშე შედეგი რადიკალურად შეიცვლებოდა და იქნებოდა საპირისპირო. მათ ეს უნდა დაადასტურონ დოკუმენტურად. ჯერ ეს არ გაუკეთებიათ.

ვფიქრობ, ოპოზიცია კარგად უნდა მოემზადოს. დიახ, ეს სცენარი განხილვადია, მაგრამ იმისთვის, რომ ამ სცენარით წავიდნენ, უკეთესად უნდა მოემზადონ.

რაც შეეხება ოპოზიციის პარლამენტში შესვლას, იქაც კრიზისი შეიქმნება აუცილებლად და აგიხსნით რატომ. ქვეყანაში ხომ ძალიან სერიოზული პრობლემებია, სოციალურ-ეკონომიკური რისკებია მაღალი, პანდემიის მართვასთან დაკავშირებით ხელისუფლებას აქვს სერიოზული პრობლემები და ა.შ.

პარლამენტში მივიღებთ როგორ მოცემულობას იცით? ჩვენ გვეყოლება 60 პროცენტი მაინც პოლიტიკურად უმწიფარი, მოდით ასე ვთქვათ, მოუმზადებელი რუხი მასა (ბევრმა ლაპარაკიც კი არ იცის ნორმალურად, მე ბევრს ვიცნობ ასეთს) და მეორე მხრივ, გვეყოლება 40 პროცენტი პარლამენტის, პოლიტიკაში გამობრძმედილი ( ნეგატიური, პოზიტიური ამაზე არ ვლაპარაკობ), ანუ პოლიტიკურად ამ 40 პროცენტს შეუძლია იმ მდუმარე უმრავლესობის პარალიზება მოახდინოს; და როგორც უნდა ისე ათამაშონ.

კი ბატონო, იმათ კი ექნებათ რიცხვობრივად უპირატესობა, მაგრამ აქეთ მხარეს პოლიტიკური კვალიფიკაციის ისეთი მუხტი გროვდება, რომ უბრალოდ, ხელისუფლება იქნება გაშიშვლებული, დიახ, აბსოლუტურად გაშიშვლებული. და კრიზისის ფორმირება უკვე საპარლამენტო დარბაზში მოხდება. 

- ფიქრობთ, აქამდე მივალთ, ბატონო გია?

- დიახ, ორივე სცენარში კრიზისამდე მივდივართ. ამიტომ ჩემი აზრით, ვადამდელი არჩევნები გარდაუვალია. სხვა საკითხია, ჩვენ ვიჩქარებთ და ქუჩით,  ასე ვთქვათ, აგრესიული მეთოდით შევეცდებით ამის გაკეთებას თუ შედარებით გრძელვადიანი ტაქტიკით წავა ეს ყველაფერი და უკვე საპარლამენტო დარბაზში გადაინაცვლებს ამ კრიზისის გენერირება. ეს არის არჩევანი.

ახლა ორივე გზას აქვს არსებობის უფლება. მაგრამ თუ პირველ გზას დაადგნენ მე უბრალოდ ვურჩევდი, რომ უკეთესად მოემზადონ ამისთვის.

კი ბატონო, გვესმის ეს განცხადებები, არალეგიტიმურია და ა.შ. მაგრამ ჩვენ ვიცით, რომ ხელისუფლებას მინიმუმ 40 % ნატურალურად აქვს აღებული. ანუ სულ რამდენიმე პროცენტზეა საუბარი. შესაბამისად, ოპოზიციამ დოკუმენტურად რომ დაადასტუროს ეს რამდენიმე პროცენტი ნამდვილად არის გაყალბებული, ეს სავარაუდოდ კრიტიკულად შეცვლიდა საარჩევნო შედეგებს. დაადასტურონ და კი ბატონო.

და  აჩვენონ ეს იგივე ეუთო-ოდირს იქნება თუ საელჩოებს, რომ იმათთვისაც გასაგები იყოს რატომ მიმართავს ამ რადიკალურ ფორმას ოპოზიცია.

ვიმეორებ, მოსამზადებელი სამუშაოებია ჩასატარებელი. გარდა ამისა, უნდა შეაფასონ საკუთარი რესურსები, იმიტომ რომ ასეთ ქუჩის ჭიდილში ანუ კუნთების თამაშში როგორც წესი ჩვენი გამოცდილება აჩვენებს, რომ ხელისუფლებას ყოველთვის აქვს უპირატესობა (მე კონკრეტულად, ამ ხელისუფლებას არ ვგულისხმობ); რადგან კანონი, სამართალდამცავი სისტემა მათი ინსტრუმენტია და ბუნებრივია, კანონის ფარგლებში მათ აქვთ გარკვეული უპირატესობა.

ვიმეორებ, მე, ორივე ვარიანტს განვიხილავ, ეს ოპოზიციიის ასარჩევია. მე, უბრალოდ შემიძლია გავაკეთო გარკვეული ანალიზი და ვთქვა ერთ შემთხვევაში რა და მეორე შემთხვევაში რა რისკებია.   

- ამ სიტუაციაში ქვეყნისთვის უკეთესი გამოსავალი რა იქნებოდა?

- მე ამ მომენტისთვის უფრო საპარლამენტო გზით პროცესების განვითარებისკენ ვიხრები. იმიტომ, რომ არაორდინალური ვითარებაა. ჩვენ ვხედავთ იგივე ამ პანდემიის მართვასთან დაკავშირებით და ბევრ სხვა საკითხთან დაკავშირებით პრობლემებს, ამიტომ ამ პროცესის ლოკალიზაცია და წმინდა პოლიტიკური დაპირისპირების ჭრილში გადაყვანა ყოველგვარი ბუნდოვანი განვითარების გარეშე, მიმაჩნია, რომ უფრო სწორი იქნებოდა.

თუმცა მე არ მაქვს სრული ინფორმაცია და ამიტომ კატეგორიული ვერ ვიქნები. ვიმეორებ, ტოტალური გაყალბება არ მომხდარა, აქ ჩვენ, რამდენიმე პროცენტზე ვსაუბრობთ, რომელიც გადამწყვეტი იყო და მე ამას ვიზიარებ. 40 პროცენტი, რომ ჰქონოდა ხელისუფლებას, ამ შემთხვევაში ოპოზიციას ჰქონდა სერიოზული შანსი, რომ ის მოსულიყო ხელისუფლებაში სრული მობილიზაციის შემთხვევაში, რისი კონტურებიც ნამდვილად, იკვეთებოდა.

- და როგორია თქვენი პროგნოზი, როგორ განვითარდება მოვლენები?

- პროგნოზის გაკეთება მიჭირს. მე ორივე სცენარს ვუშვებ. ამ ეტაპზე გასაგებია, რომ ოპოზიცია იხრება ასე ვთქვათ რადიკალური ზომებისკენ, აგრესიული პრესინგისკენ. ჩვენ არ გამოვრიცხოთ, რომ რაღაც ეტაპზე ისინი უკვე სხვა ნაბიჯებს გადადგამენ. ასე რომ, მე დღეს პროგნოზს ვერ გავაკეთებ, გამიჭირდება. ეს ოპოზიციის გადასაწყვეტია.

ქეთი ხომერიკი 

 

 

 

 

 

 

 

 

 

 

 

 

 

 

 

 

 

პოპულარული სტატიები
რა განაპირობებს ახალგაზრდებში უმუშევრობის და პასიურობის პრობლემას
გენდერული თანასწორობა რეგიონებში - ქალების ჩართულობა საქმისთვის გადამწყვეტია 
რა მნიშვნელობა აქვს ოზონის შრეს და რას ვაკეთებთ მის დასაცავად? 
 
ვიდეოები
გამოკითხვა
 


სპონსორები

2024 ყველა უფლება დაცულია