myrights.ge

„არასაპარლამენტო ოპოზიციის“ წარმომადგენელი ცესკოში თენგიზ ომანიძე აცხადებს, რომ მათი ბლოკის მოთხოვნით ირაკლი ღარიბაშვილს 2 000 ლარით დააჯარიმებენ. მის განცხადებას უცვლელად გთავაზობთ:

„16 მაისს ცენტრალურ საარჩევნო კომისიამ „არასაპარლამენტო ოპოზიციის“ საჩივარი განიხილა. საკითხი შეეხებოდა 22 აპრილს მთავრობის კანცელარიაში გამართულ „ქართული ოცნების“ პოლიტიკური საბჭოს სხდომას, სადაც მმართველი პარტიის წევრები და მთავრობის მეთაური ღარიბაშვილი საარჩევნო საკითხებს, სავარაუდო კანდიდატებს და პარტიულ სიას განიხილავდნენ.

კანონმდებლობის შესაბამისად, ადმინისტრაციული შენობა (ამ შემთხვევაში მთავრობის კანცელარია) არ შეიძლება გამოყნებული იყოს ერთი კონკრეტული პოლიტიკური სუბიექტის საარჩევნო კამპანიის მიზნებისთვის.

„არასაპარლამენტო ოპოზიციის“ მხრიდან წარდგენილი იქნა უტყუარი მტკიცებულებები იმასთან დაკავშირებით, რომ პრემიერ–მინისტრის მხრიდან ადგილი ჰქონდა ადმინისტრაციული რესურსის არამართლზომიერ გამოყენებას.

ცენტრალურმა საარჩევნო კომისიამ დააკმაყოფილა „არასაპარლამენტო ოპოზიციის“ საჩივარი და ადმინისტრაციული სამართალდარღვევის ოქმის გამოწერის გადაწყვეტილება მიიღო.

ეს არის მნიშვნელოვანი პრეცენდენტი, როდესაც ცესკო ადასტურებს, რომ მთავრობის უმაღლესი თანამდებობის პირი კანონდარღვევით აწარმოებს მმართველი პარტიის საარჩევნო კამპანიას და იყენებს ადმინისტრაციულ რესურსს. იმედი გვაქვს, ცესკოს გადაწყვეტილების შემდეგ, ირაკლი ღარიბაშვილს ეცოდინება, სად არის მისი პარტიის ოფისი და სად – მთავრობის კანცელარია“, – აცხადებს თენგიზ ომანიძე.