თამარ ჟვანია განცხადებას ავრცელებს

myrights.ge

რუსთავში მომხდარ ფაქტთან დაკავშირებით, ცენტრალური საარჩევნო კომისიის თავმჯდომარე თამარ ჟვანია მიმართავს ყველა საარჩევნო სუბიექტს და მათ მხარდამჭერებს თავი შეიკავონ ისეთი ქმედებისგან, რომელიც შეიცავს საარჩევნო კამპანიის ხელის შეშლის მცდელობას:

– მნიშვნელოვანია, რომ საარჩევნო სუბიექტებმა არ განახორციელონ ისეთი ქმედებები, რომელიც  დააზიანებს საარჩევნო გარემოს და თავისუფალ, კონკურენტულ პირობებში საარჩევნო კამპანიის წარმოებას.

2014 წლის ადგილობრივი თვითმმართველობის არჩევნების მაღალი საერთაშორისო სტანდარტების შესაბამისად ჩატარება ჩვენი სახელმწიფოსთვის უმნიშვნელოვანეს პრიორიტეტს წარმოადგენს.

ცესკოს თავმჯდომარე მოუწოდებს საარჩევნო პროცესში ჩართულ მხარეებს სრული პასუხისმგებლობით მოეკიდონ ამ პროცესის მიმდინარეობას და უზრუნველყონ აღნიშნული მიზნის ეფექტური განხორციელება, – ნათქვამია განცხადებაში. 

შეწგახსენებთ, რომ რუსთავში „ქართული ოცნების“ და „ნაციონალური მოძრაობის“ წარმომადგენლები ერთმანეთს ფიზიკურად დაუპირისპირდნენ. დაპირისპირება იმ დროს მოხდა , როდესაც „ნაცმოძრაობის“ რუსთავის მერობის კანდიდატს მამუკა ჩიქოვანს ბრიფინგი უნდა გაემართა და შეჩერებულ პროექტებზე ესაუბრა.

მანამდე „ერთიანი ნაციონალური მოძრაობის“ რუსთავის ოფისთან „ქართული ოცნების“ ახალგაზრდული ფრთის წევრები მივიდნენ. ისინი სკანდირებდნენ - მკვლელები, ცოცხები.

ადგილზე მობილიზებული იყო საპატრულო პოლიცია, რომელიც დაპირისპირებული მხარეების გაშველებას ცდილობდა.

აღნიშნულს „ქართული ოცნების“ რუსთავის მერობის კანდიდატი გამოეხმაურა, დავით ჯიქიას განცხადებით, ის პროვოკაციებს არ ემხრობა და მსგავსი შემთხვევები არ უნდა მოხდეს.