მეორე ტურში მონაწილე ამომრჩევლის უმრავლესობა იყო ქალი 

myrights.ge

ცენტრალური საარჩევნო კომისიის მონაცემებით, 8 თვითმმართველ ქალაქსა და 13 მუნიციპალიტეტში, 12 ივლისს ჩატარებულ თვითმმართველობის არჩევნების მეორე ტურში ქალთა მონაწილეობის სტატისტიკა შემდეგნაირად გამოიყურება:

მეორე ტურში მონაწილე ამომრჩევლის უმრავლესობა იყო ქალი  და შეადგინა საარჩევნო უბნებზე მისული ამომრჩევლის 53.91%. სულ ხმა მისცა 332,865-მა ქალმა ამომრჩეველმა.

ქალი ამომრჩევლების მაღალი აქტიურობით გამოირჩეოდა  თბილისი - 57%. დედაქალაქის ათივე ოლქში ქალი ამომრჩევლების აქტივობის მეტნაკლებად ერთნაირი მაღალი მაჩვენებელი დაფიქსირდა და საშუალო აქტივობა მერყეობდა 55-59%-ს შორის.

რაც შეეხება რეგიონებს, აქ არჩევნებში მისული ამომრჩევლების 51% იყო ქალი.  ქალები ყველაზე აქტიურები იყვნენ რუსთავში 54.79%, ოზურგეთში 54.38%, და მარტვილში 52.29%.

ცესკომ ასევე შეადარა არჩევნებში მისული ამომრჩევლების რაოდენობა მეორე ტურისთვის ამომრჩეველთა სიაში რეგისტრირებულ ამომრჩეველთა საერთო რაოდენობას. სულ რეგისტრირებული ქალი ამომრჩევლებიდან 12 ივლისს ხმა მისცა 35%-მა. თბილისში არჩევნების მეორე ტურში რეგისტრირებულ ქალ ამომრჩეველთა 34% მივიდა. რაც შეეხება რეგიონებს, არჩევნებში რეგისტრირებული ქალი ამომრჩევლების 36%-მა მიიღო მონაწილეობა. შედარებით მაღალი აქტივობით გამოირჩეოდა ხონი 61%, თიანეთი 53% და თერჯოლა 52%. 

რაც შეეხება ქალ კანდიდატებს, აღსანიშნავია, რომ 2014 წლის ადგილობრივი თვითმმართველობის არჩევნებისთვის საარჩევნო სუბიექტების მიერ წარდგენილ პარტიულ სიებში, დამატებითი დაფინანსების მისაღებად კანონით დადგენილი გენდერული ბალანსი ორმა საარჩევნო სუბიექტმა დაიცვა: საარჩევნო ბლოკი „ერთიანი ნაციონალური მოძრაობა“ და „ნინო ბურჯანაძე - ერთიანი ოპოზიცია“.

მიმაგრებული დოკუმენტები: