ამასთან „ტელეიმედში“ ძალისმიერი მეთოდით შეჭრისა და დაწესებულების უკანონოდ დაკავების სამართლებრივ ჩარჩოებში  მოსაქცევად, ხელოვნურად შეიქმნა სისხლის სამართლის საქმის წარმოება, რომლის ფარგლებშიც შესაბამისი მტკიცებულებების არარსებობის პირობებში ეჭვმიტანილად იქნა ცნობილი არკადი პატარკაციშვილი და მის ქონებას, კერძოდ შპს „ტელეიმედს“ დაედო ყადაღა, რითიც  მესაკუთრესა და მფლობელს აეკრძალა შპს ,,ტელეიმედის“ ქონების (მათ შორის, მის მფლობელობაში არსებული კერძო საეთერო მაუწყებლობის ლიცენზიის) განკარგვა და სარგებლობა. საზოგადოებას კი გენერალურმა პროკურატურამ წარუდგინა არკადი პატარკაციშვილსა და ერეკლე კოდუას შორის შემდგარი საუბრის ფალსიფიცირებული, კონტექსტიდან ამოჭრილი და შინაარსის შეცვლით დამონტაჟებული აუდიო ჩანაწერი. (იხ. ექსპერტის დასკვნა; ( დასკვნა_1; დასკვნა_2, დასკვნა_3; დასკვნა_4; დასკვნა_5; დასკვნა_6; დასკვნა_7 )

ხელისუფლებისა და მისი მეთაურის, მიხეილ სააკაშვილის ქმედების მიმართ, საერთაშორისო საზოგადოების მხრიდან უმკაცრესი რეაგირების მიუხედავად, მ.სააკაშვილის დავალებით და უმაღლესი თანამდებობის პირების, მათ შორის გიგი უგულავას, დავით კეზერაშვილის და სხვათა უშუალო ჩარევით, საბოლოო ჯამში, ზეწოლისა და დაშინების გზით პატარკაციშვილების ოჯახს ჩამოართვეს ტელეკომპანია "იმედი". ა.პატარკაციშვილის გარდაცვალებიდან ერთ კვირაში, კერძოდ 2008 წლის 19 თებერვალს, ნოტარიუს მერი ბუბაშვილთან,  ა.პატარკაციშვილის ნდობით აღჭურვილ პირს  გიორგი ჯაოშვილს, მის  სახელზე რიცხული ს/ს „ჯეი-ემ-ჯი კონსალტინგ გრუპი“-ის წილი, რომლის საკუთრებაშიც იყო „ტელეიმედი“, წესდების მოთხოვნათა დარღვევით, გადააფორმებინეს ბიზნესმენ ჯოზეფ კეიზე. აღნიშნულ მოქმედებას ადგილზე ხელმძღვანელობდნენ  დავით კეზერაშვილის დავალებით მოქმედი სამხედრო პოლიციის წარმომადგენლები და ხელისუფლების სხვა თანამდებობის პირები. იმავე დღეს გიორგი ჯაოშვილი მიიყვანეს ფინანსური პოლიციის შენობაში და აიძულეს  გადამდგარიყო შპს ,,ტელეიმედის“  დამფუძნებელი ფირმების  სამეთვალყურეო საბჭოს თავმჯდომარეობიდან, რითაც ა.პატარკაციშვილის ოჯახი საბოლოოდ ჩამოაშორეს ტელევიზიას.  მომდევნო დღეს,  „ტელეიმედი“-ს წილი 5 წლის ვადით, სამართავად გადაეცა დავით კეზერაშვილთან დაახლოებულ პირს პაატა სირაძეს. ,,NEWS CORP EUROPEITED INC“-ს ცალმხრივად შეუწყდა შპს ,,ტელეიმედის“ მართვის უფლება.

ამის შემდეგ უკვე დაიწყო ხელისუფლების მხრიდან ტელეკომპანიის გაკონტროლება, რაშიც მონაწილეობდნენ მაღალი თანამდებობის პირები, მათ შორის გიორგი უგულავა, რომელიც სრულად წარმართავდა და აკონტროლებდა არხის საინფორმაციო პოლიტიკას.

2012 წლის 18 ოქტომბერს,  ოქტომბრის არჩევნებისა და ქვეყანაში ხელისუფლების ცვლილების შემდეგ, მაშინდელ ხელისუფლებასთან დაახლოებულმა პირებმა გიორგი არველაძემ, გიორგი კორახაშვილმა და გიორგი მიქელაძემ პატარკაციშვილების ოჯახს დაუბრუნეს 90%-იანი წილი ტელეკომპანია "იმედის".

მაშინდელი ხელისუფლებისა და მისი მეთაურის, მიხეილ სააკაშვილის მხრიდან პატარკაციშვილების ოჯახზე ზეწოლა არ შემოიფარგლა მხოლოდ "ტელეიმედის" უკანონოდ ხელში ჩაგდებით. ხელისუფლებამ პატარკაციშვილების ოჯახს  ჩამოართვა მთაწმინდის პარკიც. კერძოდ, 2007 წლის 7 ნოემბერს, რუსთაველის გამზირზე მომიტინგეთა დაშლის პარალელურად, შს მინისტრის დავალებით მთაწმინდის პარკის ტერიტორიაზე, ყოველგვარი სამართლებრივი საფუძვლის გარეშე შეიჭრნენ შსს შეიარაღებული სპეცრაზმელები და ტერიტორიიდან უკანონოდ გამოაძევეს პარკის თანამშრომლები. იმავე დღეს, თბილისის მერიაში ჩატარდა პრესკონფერენცია, თითქოსდა, რომ შპს ,,ლინქსი“ არ იხდიდა მთაწმინდის პარკის იჯარის თანხას, რის გამოც თბილისის მთავრობამ შპს ,,ლინქსთან“ სრულიად უკანონოდ, ცალმხრივად შეწყვიტა ხელშეკრულება, მაშინ როდესაც პატარკაციშვილის კუთვნილი კომპანია პირნათლად ასრულებდა ყველა აღებულ ვალდებულებას და არ არსებობდა არანაირი საფუძველი ხელშეკრულების შეწყვეტისთვის.  ამასთან, პარლამენტის მიერ ,,მეწარმეთა შესახებ“ კანონში საგანგებოდ შეტანილი ცვლილების შედეგად, შპს ,,ლინქსი“-ს დირექტორის თანამდებობაზე დანიშნეს გიორგი უგულავას მეგობარი გიორგი კირცხაია, რომელმაც ფირმის წინააღმდეგ ჩადენილ სხვა საზიანო ქმედებებთან ერთად სასამართლოდან გამოითხოვა ქ.თბილისის მერიის მიმართ შეტანილი ყველა სასარჩელო მოთხოვნა.

მიხეილ სააკაშვილის და ხელისუფლების წარმომადგენლების  მხრიდან ზეწოლის კიდევ ერთი ფაქტია პატარკაციშვილების ოჯახისთვის რუსთავის მეტალურგიული ქარხნის ჩამორთმევა. სხვადასხვა გზით, ზეწოლისა და დაშინების შემდეგ, ფიქტიურად გაფორმებული ხელშეკრულებების და დოკუმენტების შედეგად, რომ თითქოს რუსთავის მეტალურგიული ქარხნის მესაკუთრე კომპანიას ვალი ჰქონდა კეზერაშვილის გავლენის ქვეშ მყოფი ოფშორული კომპანიის მიმართ, აღსრულების ეროვნული ბიუროს და სასამართლოს ჩარევით, ვალის გაქვითვის საფუძვლით პატარკაციშვილების კუთვნილი რუსთავის მეტალურგიული ქარხნის ქონება გადავიდა დავით კეზერაშვილის ოფშორული კომპანიის საკუთრებაში.

ხელისუფლების მხრიდან მიხეილ სააკაშვილის ხელმძღვანელობით არკადი პატარკაციშვილის ოჯახის მიმართ განხორციელებულ უკანონო ქმედებებს, შედეგად მოჰყვა ის, რომ 2008 წელს ა.პატარკაციშვილის მეუღლემ ინა გუდავაძემ სარჩელით მიმართა საერთაშორისო სავაჭრო სამართლის კომისიას და მოითხოვა საქართველოს სახელმწიფოს მიერ უკანონოდ წართმეული ქონების დაბრუნება ან ქონების ექვივალენტი 400 000 000 აშშ დოლარის ანაზღაურება. მას შემდეგ, რაც მაშინდელი ხელისუფლების წარმომადგენლები და მათი მეთაური მიხეილ სააკაშვილი დარწმუნდნენ, რომ პატარკაციშვილების ოჯახის წინააღმდეგ ჩადენილი ყველა ამ უკანონობის გამო, აუცილებლად წააგებდნენ პროცესს საერთაშორისო საარბიტრაჟო სასამართლოში,  მიხეილ სააკაშვილის ბრძანებით, მაშინდელი ხელისუფლების სახელით მოქმედმა იუსტიციის მინისტრის მოადგილემ თინა ბურჯალიანმა პატარკაციშვილების ოჯახთან გააფორმა მემორანდუმი, რის საფუძველზეც ოჯახს დაუბრუნდა ყველა ზემოხსნებული ქონება, გარდა "ტელეიმედისა".

საქართველოს მაშინდელი ხელისუფლების წარმომადგენელების და მისი მეთაურის მიხეილ  სააკაშვილის უკანონო მოქმედებების შედეგად: დაირღვა არკადი პატარკაციშვილის ოჯახის საკუთრების უფლება, ხელყოფილ იქნა მოქალაქეთა შეკრებისა და მანიფესტაციის უფლება, მრავალმა მოქალაქემ მიიღო სხეულის სხვადასხვა სახის დაზიანება, მოხდა დამოუკიდებელი მედიის საქმიანობაში უკანონოდ ჩარევა და ხელის შეშლა, რამაც ფიზიკური და იურიდიული პირის, სახელმწიფოს და საზოგადოების კანონიერი უფლებების არსებითი დარღვევა გამოიწვია.

მიხეილ სააკაშვილის, ივანე მერაბიშვილის, ზურაბ ადეიშვილის, დავით კეზერაშვილის და გიორგი უგულავას მიმართ გამოიტანილია ბრალდების შესახებ დადგენილებები სამსახურებრივი უფლებამოსილების გადამეტებისათვის.

გამოძიება გრძელდება საქართველოს სისხლის სამართლის კოდექსის 333-ე მუხლის მესამე ნაწილით, რაც სასჯელის სახედ და ზომად ითვალისწინებს თავისუფლების აღკვეთას 5-დან 8 წლამდე ვადით.

ასევე, საზოგადოებას გვინდა ვაცნობოთ, რომ გამოძიება დასკვნით ფაზაშია შესული პროკურატურის მიერ ადრე გაცხადებულ სხვა სისხლის სამართლის საქმეებზეც, რომლებზეც მიხეილ სააკაშვილი დაბარებული იყო მოწმის სახით, რომელთა შედეგების შესახებ საზოგადოებას ეცნობება უახლოეს მომავალში, – ნათქვამია პროკურატურის მიერ გავრცელებულ ინფორმაციაში.

ბრალის წარდგენასთან დაკავშირებით, დღესვე განცხადებას ავრცელებს „ერთიანი ნაციონალური მოძრაობა“:

„დღეს საქართველოს პროკურატურამ რამდენიმე საქმეზე ბრალი წაუყენა საქართველოს ყოფილ პრეზიდენტს მიხელ სააკაშვილს, ყოფილ შინაგან საქმეთა მინისტრ ივანე მერაბიშვილს, ყოფილ თავდაცვის მინისტრს დავით კეზერაშვილს, ყოფილ იუსტიციის მინისტრ ზურა ადეიშვილს და თბილისის ყოფილ მერ გიორგი უგულავას.

პროკურატურის სპიკერმა წარმოადგინა ურთიერთგამომრიცხავი ფაქტებით გაჯერებული ბელეტრისტიკული მოთხრობა, რითაც კიდევ ერთხელ გამოჩნდა, რომ საქართველოს პროკურატურა არის ბიძინა ივანიშვილის პოლიტიკური იარაღი და მის მოქმედებას არავითარი კავშირი არ აქვს სამართლიანობასთან და კანონიერებასთან.

ნაცვლად იმისა, რომ აესრულებინა თავისი საარჩევნო დაპირებები და ეზრუნა საქართველოს მოქალაქეების კეთილდღეობაზე ივანიშვილმა მიზნად დაისახა ერთადერთი რეალური ოპოზიციური ძალის - საქართველოს ერთიანი ნაციონალური მოძრაობის განადგურება. ყველა მისი აქტივობა და ძალისხმევა  სწორედ აქეთკენ არის მიმართული. ბიძინა ივანიშვილმა არაერთხელ ღიად განაცხადა, რომ ნაციონალური მოძრაობის პოლიტიკურ აქტიურობასა და მის პოზიციაზე იყო დამოკიდებული, განხორციელდებოდა თუ არა დევნა პარტიის ლიდერებისა და აქტივისტების წინააღმდეგ. ბუნებრივია ნაციონალურმა მოძრაობამ ეს შემოთავაზება არ მიიღო და გააგრძელა აქტიურობა, როგორც ერთადერთმა რეალურმა ოპოზიციურმა ძალამ. რის შედეგადაც დააპატიმრეს  პარტიის გენერალური მდივანი ივანე მერაბიშვილი, ქ. თბილისის ყოფილი მერი, საარჩევნო შტაბის ხელმძღვანელი გიგი უგულავა, ყოფილი თავდაცვის მინისტრი ბაჩო ახალაია  და გამგებლობის კანდიდატები. ნაციონალური მოძრაობის ასობით  ლიდერისა და აქტივისტის წინააღმდეგ  მიმდინარეობს სისხლის სამართლებრივი დევნა. რამდენიმე ათასი აქტივისტი იქნა დაკითხული.

მიუხედავად ამისა, 2014 წლის თვითმართველობის არჩევნების შედეგებმა საბოლოოდ დაარწმუნა ბიძინა ივანიშვლი და „ქართული ოცნება“, რომ ნაციონალური მოძრობის განადგურება ვერ მოხერხდა, უფრო მეტიც, პარტიის მხარდაჭერა გაიზარდა.

აშკარაა, რომ სწორედ ამის გამო ივანიშვილის ხელისუფლებამ პოლიტიკური დევნის ახალი ეტაპი დაიწყო.

პროცესებზე დამაჩქარებლად იმოქმედა მიხეილ საააკაშვილის და ნაციონალური მოძრაობის წარმომადგენლების აქტიურობამ უკრაინაში. იმ დროს, როცა მთელი მსოფლიო გაერთიანებულია და ებრძვის პუტინის აგრესიას უკრაინაში, საქართველოს რეალური ხელისუფალი ბიძინა ივანიშვილი იანუკოვიჩის მსგავსად პოლიტიკური ოპონენტების დევნით არის დაკავებული და როგორც ჩანს, მას განსაკუთრებით აღიზიანებს პრეზიდენტ სააკაშვილის აქტიურობა საერთაშორისო ასპარეზზე პუტინის რეჟიმის წინააღმდეგ.

ნაციონალური მოძრაობა გააგრძელებს პოლიტიკურ ბრძოლას ივანიშვილის ავტორიტარული რეჟიმის წინააღმდეგ:  რეპრესიები ვერ შეაჩერებს ოპოზიციის პოლიტიკურ საქმიანობას და ჩვენ გავაგრძელებთ ბრძოლას ჩვენი ქვეყნის და ხალხის ინტერესების დასაცავად“.

იხილეთ ვიდეო: ბრიფინგი პროკურატურაში მიხეილ სააკაშვილთან დაკავშირებით

ასევე: http://www.youtube.com/watch?v=ovzwfC9BRqI