myrights.ge

დღეს ცენტრალურ საარჩევნო კომისიაში არჩევნების უსაფრთხოების უზრუნველყოფის მიმართულებით სამუშაო შეხვედრა გაიმართა, რომელშიც ცესკოს, სწავლების ცენტრის, შინაგან საქმეთა სამინისტროს და საარჩევნო სისტემების საერთაშორისო ფონდის (IFES) ხელმძღვანელი პირები და ექსპერტები მონაწილეობდნენ.

შეხვედრას ექსპერტი საარჩევნო უსაფრთხოების საკითხებში და IFES-ის აზია-წყნარი ოკეანის რეგიონული დირექტორი ვასუ მოჰანი უძღვებოდა. მონაწილეებმა არჩევნების უსაფრთხოების უზრუნველყოფის მიმართულებით სახელმძღვანელო ინსტრუქციის კონცეფცია განიხილეს.

„ეს არის ძალიან მნიშვნელოვანი წამოწყება. ჩვენი მიზანია ინსტიტუციებმა შეიმუშაონ სახელმძღვანელოები, ინსტრუქციები, რომელშიც აღწერილი იქნება არჩევნების და უსაფრთხოების საერთაშორისო სტანდარტები. დღევანდელი შეხვედრა არის მხოლოდ დასაწყისი. ჩვენ ერთობლივად ვიმუშავებთ იმისათვის, რომ 2016 წლის არჩევნები იყოს უსაფრთხო, გამჭვირვალე, სამართლიანი და ყველა საერთაშორისო სტანდარტის შესაბამისი“,- განაცხადა შეხვედრის დასრულების შემდეგ ცესკოს თავმჯდომარის მოადგილე გიორგი შარაბიძემ.

სახელმძღვანელოს საარჩევნო ადმინისტრაციისა და შინაგან საქმეთა სამინისტროს თანამშრომლები შეიმუშავებენ, რომლებმაც 28-29 ივლისს უსაფრთხოების საკითხებზე  ტრენინგი გაიარეს.

სამუშაო შეხვედრა ცესკოს ინიციატივით, შინაგან საქმეთა სამინისტროსთან თანამშრომლობით და საარჩევნო სისტემების საერთაშორისო ფონდის (IFES) მხარდაჭერით გაიმართა.