myrights.ge

ფსიქოტროპული მედიკამენტების ურეცეპტოდ გაცემის ფაქტებზე 24 საათიანი მონიტორინგი გრძელდება. ჯანდაცვის სამინისტროს სამედიცინო საქმიანობის სახელმწიფო რეგულირების სააგენტოს ფარმაცევტული საქმიანობის დეპარტამენტის უფროსმა, დავით მაჭარაშვილმა  სამინისტროში შემაჯამებელი ბრიფინგი გამართა და პირველადი შედეგები გამოაქვეყნა. 5 აგვისტოდან დღემდე, საქართველოს მასშტაბით განხორციელებული კონტროლის ღონისძიებების შედეგად დარღვევები დაფიქსირდა 30 შემთხვევაში, კერძოდ, გამოვლენილია:

• ურეცეპტოდ ფსიქოტროპული მედიკამენტის გაცემის 13 ფაქტი;

• აღურიცხავი ფსიქოტროპული მედიკამენტების არსებობის 5 ფაქტი;

• მეორე ჯგუფის მედიკამენტების ურეცეპტოდ გაცემის 11 ფაქტი;

• აფთიაქის მხრიდან უნებართვო საქმიანობის განხორციელების ერთი ფაქტი;

„ახალი რეგულაციით განხორციელებული კონტროლის ღონისძიებების შედეგად, დადგა 13 ფარმაცევტის პროფესიული პასუხისმგებლობის საკითხი. ამავე პერიოდში ფუნქციონირება შეაჩერა 17-მა ავტორიზებულმა აფთიაქმა.

რეგულირების სააგენტოს სპეციალისტები შინაგან საქმეთა სამინისტროს თანამშრომლებთან ერთად, 24 საათიან რეჟიმში აგრძელებენ კონტროლის ღონისძიებებს“, - აღნიშნულია ჯანდაცვის სამინისტროს ინფორმაციაში.