ufleba.ge

მარნეულის მერი თემურ აბაზოვი დაკავებულია. ინფორმაციას მთავარ პროკურატურაში ადასტურებენ. აბაზოვის დაკავება სავარაუდოდ, მარნეულში მოქალაქე ე.ა-ს მიმართ ჯგუფურად განხორციელებულ არაადამიანური და დამამცირებელი მოპყრობის ფაქტს უკავშირდება, რომლის შესახებაც რეპორტაჟი „სტუდია მონიტორმა“ მოამზადა. ფაქტზე პროკურატურამ გამოძიება დაიწყო.

მარნეულის მერის გარდა, პასუხისგებაში საკრებულოს წევრებიც მისცეს

თემურ აბაზოვის დაკავების გარდა, მარნეულში ჯგუფურად განხორციელებული არაადამიანური და დამამცირებელი მოპყრობის ფაქტზე სისხლის სამართლის პასუხისგებაში კიდევ სამი პირია მიცემული. ინფორმაციას „პირველი არხი“ ავრცელებს.

პასუხისგებაში მიცემულ პირთა შორის არიან საკრებულოს მოქმედი წევრები, მათ შორის ერთი „ნაციონალური მოძრაობიდან“.

სოციალურ ქსელში გავრცელდა ვიდეო, სადაც მარნეულში მცხოვრები პირი საჯარო, დამამცირებელ ბოდიშს იხდის „ქართული ოცნების“ თავმჯდომარე ბიძინა ივანიშვილისა და მარნეულის მერის თემურ აბაზოვის სიტყვიერი შეურაცხყოფისთვის. აღნიშნულთან დაკავშირებით მარნეულის სათემო რადიომ და სტუდია „მონიტორმა“ რეპორტაჟები მოამზადეს. რეპორტაჟში საუბარია, რომ პირი, რომელიც სავარაუდოდ დამამცირებელი მოპყრობის მსხვერპლია, რამდენიმე დღის წინ თბილისში, რუსთაველის გამზირზე, აქციაზე ჩაწერილ ვიდეოში „ქართული ოცნების“ წარმომადგენლებს სიტყვიერ შეურაცხყოფას აყენებდა, მოგვიანებით, სოციალურ ქსელშივე გავრცელდა ვიდეო, სადაც ის დამამცირებელ გარემოებებში ბოდიშს იხდის.

მარნეულში ჯგუფურად განხორციელებული არაადამიანური და დამამცირებელი მოპყრობის ფაქტზე პროკურატურამ გამოძიება დაიწყო.