ufleba.ge

ზვიად კუპრავას 5000 ლარის ოდენობით გირაო შეეფარდა. საქმე ეხება ბრალს, რომელიც "სამართალდამცველთა რეფორმირების ცენტრის" ხელმძღვანელს საქალაქო სასამართლოს სასადილოში მომხდარ ინციდენტთან დაკავშირებით წაუყენეს.

კერძოდ; გამოძიება ზვიად კუპრავას სასამართლოს უპატივცემულობას ედავება. თავად მოსამართლე თავართქილაძე კი საქმეში დაზარალებულად არის ცნობილი.

მოსამართლემ ბრალდების მხარის შუამდგომლობა დააკმაყოფილა. დაცვის მხარე სასამართლოს ზაზა სარალიძის და ბაჩუკი ქარდავას თავდებობას ან ალტერნატიულ შემთხვევაში 1000 ლარის ოდენობით გირაოს სთავაზობდა, რაც მოსამართლემ არ გაითვალისწინა.

ინფორმაციას „რუსთავი 2“ ავრცელებს.

შეგახსენებთ, რომ პროკურატურამ, შინაგან საქმეთა სამინისტროს წარმოებაში არსებულ სისხლის სამართლის საქმეზე გამოძიების ფარგლებში შეკრებილი მტკიცებულებების საფუძველზე, - „სასამართლოს უპატივცემულობის ფაქტზე, რაც სამართალწარმოების მონაწილე მოსამართლის შეურაცხყოფაში გამოიხატა“, - ზვიად კუპრავას ბრალდება საქართველოს სისხლის სამართლის კოდექსის 366-ე მუხლის მე-2 ნაწილით წარუდგინა.

„გამოძიებით დადგინდა, რომ 2018 წლის 11 ივნისს  თბილისის საქალაქო სასამართლოში, ადმინისტრაციულ საქმეთა კოლეგიის მოსამართლე ლ.თ.-ს მიერ იხილებოდა ადმინისტრაციული სამართალდარღვევის საქმე ადმინისტრაციული წესით დაკავებულ ზ.კ-ს და სხვათა მიმართ, რა დროსაც  სასამართლო პროცესზე  14:00 საათიდან 15:00 საათამდე გამოცხადდა შესვენება.

ადმინისტრაციული წესით დაკავებული ზ.კ.  თვითნებურად გავიდა სხდომის დარბაზიდან და ჩავიდა პირველ სართულზე მდებარე სასადილოში. გარკვეული პერიოდის გასვლის შემდეგ სასადილოში შევიდნენ საქართველოს შინაგან საქმეთა სამინისტროს საპატრულო პოლიციის დეპარტამენტის თანამშრომლები და ზ.კ-ს სხდომის დარბაზში დაბრუნება მოსთხოვეს და განუმარტეს, რომ მოსამართლეს პროცესი უნდა გაეგრძელებინა, რის გამოც აუცილებელი იყო სხდომის დარბაზის და მონაწილე პირების მზადყოფნა.

ზ.კ. არ დაემორჩილა სამართალდამცველების მოწოდებას და მოსამართლის მისამართით შეიგინა. პოლიციელთა არაერთი მოთხოვნის მიუხედავად ზ.კ.-მ უარი განაცხადა სხდომის დარბაზში დაბრუნებაზე და კვლავ იგინებოდა სამართალწარმოების მონაწილე მოსამართლის მისამართით და უცენზურო ფრაზებით მოიხსენიებდა მას, რითაც გამოხატავდა სასამართლოსადმი აშკარა უპატივცემულობას. აღნიშნულის გამო ზ.კ.-ს  სასამართლო სხდომის დარბაზში მიყვანა პოლიციის მუშაკების მიერ იძულების პროპორციული ზომის გამოყენებით მოხდა.

ბრალდების მხარემ ზ.კ.-სთვის აღკვეთის ღონისძიების, გირაოს შეფარდების შუამდგომლობით თბილისის საქალაქო სასამართლოს უკვე მიმართა. სისხლის სამართლის საქმეზე გრძელდება გამოძიება. ზ.კ.-სთვის წარდგენილი ბრალდება სასჯელის სახედ და ზომად ორ წლამდე თავისუფლების აღკვეთას ითვალისწინებს“, - განაცხადეს  პროკურატურაში.