ufleba.ge

ჩემი აზრით, მთავრობამ უნდა აიღოს პასუხისმგებლობა და გააკონტროლოს მდგომარეობა, – ამის შესახებ საქართველოს პატრიარქმა, უწმინდესმა და უნეტარესმა ილია მეორემ საკვირაო ქადაგებაზე მარიხუანას კანონპროექტთან დაკავშირებით განაცხადა.

როგორც ილია მეორემ სამების ტაძარში აღნიშნა, „რად გვინდა ისეთი ეკონომიკა, თუ დავკარგავთ ჩვენ შვილებს“.

„ჩემი აზრით, მთავრობამ უნდა აიღოს პასუხისმგებლობა და გააკონტროლოს მდგომარეობა. კერძო სექტორში არ უნდა გადავიდეს ეს დარგი. კერძო სექტორში რომ გადავიდეს, ვერ გავაკონტროლებთ მას.

ახლა დგას საკითხი, რომ კანონმდებლობა იყო გამომუშავებული. იმ კანონმდებლობაში უნდა იყოს ნათქვამი, რომ მთავრობა პასუხს აგებს ამ პროცესზე.

უნდა გვახსოვდეს, რომ ეს საშიშია. საშიშია იმიტომ, რომ სხვა ქვეყნებიდან ნარკომანები ჩამოვლენ საქართველოში და ისარგებლებენ ამ თავისუფლებით. ამით უფრო გავრცელდება ნარკომანია საქართველოში. ამიტომ, მინდა ვთხოვო ჩვენ ხელისუფლებას, რომ დიდი პასუხისმგებლობით შეხედონ ამ საკითხს. არ შეიძლება, რომ უყუროთ მხოლოდ ეკონომიკას, რომ შემოსავალი ექნება ქვეყანას. რად გვინდა ისეთი ეკონომიკა, თუ დავკარგავთ ჩვენ შვილებს“,- განაცხადა ილია მეორემ.

„მარიხუანასთან დაკავშირებით მთავრობის მიერ მომზადებული საკანონმდებლო პაკეტი ორ ნაწილად გაიყოფა“, – ამის შესახებ ჟურნალისტებს პარლამენტის თავმჯდომარე ირაკლი კობახიძემ განუცხადა.

მისი განმარტებით, საკანონმდებლო პაკეტის ერთი ნაწილის განხილვა ცალკე მოხდება, რომელიც საქართველოში მარიხუანას მოხმარებასთან დაკავშირებით საკანონმდებლო რეგულაციებს აწესებს.

კობახიძის თქმით, მეორე ნაწილად მოხდება მსჯელობა კანაფის პროდუქტების წარმოება-კულტივაციასთან დაკავშირებით მომზადებულ საკანონმდებლო ცვლილებებზე.

ირაკლი კობახიძე ამბობს, რომ საკანონმდებლო პაკეტის ორად გაყოფის მიზეზი საზოგადოებაში არსებული განწყობაა და ხელისუფლება შეეცდება, ცვლილებებთან დაკავშირებით დეტალური ინფორმაცია მიაწოდოს საზოგადოებას.

„პარლამენტში შემოსულია კანონპროექტების ორი პაკეტი, რომელიც შეეხება საქართველოში მარიხუანას მოხმარების რეგლამენტაციას და მცენარე კანაფის წარმოებას.

მნიშვნელოვანია, რომ საზოგადოების განწყობის შესაბამისად ვიმოქმედოთ და საზოგადოება უნდა იყოს ინფორმირებული ასეთი მნიშვნელოვანის საკითხების მოწესრიგების თაობაზე. საზოგადოებისთვის ეს თემა აქტუალურია, ინფორმირებას დრო სჭირდება.

გადაწყვეტილება მივიღეთ, ორ ნაწილად გავყოთ საკითხები. შსს-ს თხოვნით იმ საკითხის განხილვას დავიწყებთ, რაც საქართველოში მარიხუანას მოხმარებას ეხება. დღეს საქართველოში ვაკუუმია დარჩენილი საკონსტიტუციო სასამართლოს გადაწყვეტილებიდან და ჩვენი ამოცანაა, ამ ვაკუუმის შევსება.

მომავალ სასესიო კვირას იმ ცვლილებების განხილვა დაიწყება, რაც საქართველოში მარიხუანას მოხმარების რეგლამენტაციას ეხება. რაც შეეხება მეორე საკანონმდებლო პაკეტს, მცენარე კანაფის კულტივაციას, აქ არ გვეჩქარება. მთავარია, საზოგადოება სათანადოდ ინფორმირებული იყოს. საზოგადოებას ინფორმაცია იმაზეც კი არ აქვს, რომ ეს კანონპროექტი არ ითვალისწინებს ნარკოტიკების წარმოებას და რეალიზებას. სპეკულაცია ხდება ოპონენტების მიერ. მნიშვნელოვანია, საზოგადოების ინფორმირება. დარწმუნებული ვარ, ისეთ გადაწყვეტილებას მივიღებთ, რაც მისაღები იქნება ინფორმირებული საზოგადოებისთვის“,- განაცხადა ირაკლი კობახიძემ.