თბილისის პროკურატურის საგამოძიებო სამმართველოს თანამშრომლებმა, სამსახურეობრივი გულგრილობის, სამსახურებრივი მდგომარეობის გამოყენებით თაღლითობისა და უკანონო საექიმო საქმიანობის ფაქტზე, მოსამართლის განჩინების საფუძველზე, "თბილისის ცენტრალური საავადმყოფოს" დირექტორი გ.ლ. და ამავე კლინიკის ექიმი ვ.ყ. დააკავეს, ხოლო უკანონო საექიმო საქმიანობის ფაქტზე მ.ხ.-ს მიმართ დაუსწრებლად იქნა გამოტანილი დადგენილება ბრალდებულად პასუხისგებაში მიცემის შესახებ - ამის შესახებ პროკურატურაში სპეციალურ ბრიფინგზე განაცხადეს.
"საქმეზე ჩატარებული გამოძიებით დადგინდა, რომ 2018 წლის ზაფხულში მოქალაქე ნ.ც.-მ შესაბამისი სამედიცინო მომსახურების მიღების მიზნით, კლინიკა - შპს "თბილისის ცენტრალურ საავადმყოფოს" მიმართა, სადაც მას კონსულტაცია ექიმმა ვ.ყ.-მ გაუწია.
პაციენტი- ნ.ც. და მისი ოჯახის წევრები დაარწმუნა, რომ პაციენტისათვის ჩატარებული გამოკვლევის შედეგები იტალიაში გადააგზავნეს და მათი რეკომენდაციით უნდა ჩატარებულიყო ქირურგიული ოპერაცია, რომელსაც ასევე იტალიიდან მოწვეული ექიმები გააკეთებდნენ. თუმცა, აღნიშნული ოპერაცია შპს "თბილისის ცენტრალურ საავადმყოფოში" 2018 წლის 18 სექტემბერს ექიმმა ვ.ყ.-მ თავად გაუკეთა პაციენტს, ისე რომ მას არ გააჩნდა დამოუკიდებელი საექიმო საქმიანობის დამადასტურებელი სახელმწიფო სერტიფიკატი სპეციალობით "ორთოპედია-ტრავმატოლოგია“, ასევე მან ოპერაციაზე დაიხმარა მ.ხ. რომელსაც ასევე არ გააჩნდა სახელმწიფო და/ან დროებითი სერტიფიკატი არც ერთ სპეციალობაში და იგი საავადმყოფოში ხელშეკრულების საფუძველზე კონსულტანტის თანამდებობაზე მუშაობდა.
გამოძიებით ასევე დადგენილია, რომ ოპერაციის შემდეგ ნ.ც.-ს ტკივილები განუახლდა, რის გამოც პაციენტმა აღნიშნულ საავადმყოფოს ისევ მიმართა. ვ.ყ-მ დაიყოლია პაციენტი და მისი ოჯახის წევრები განმეორებითი ოპერაციის ჩატარებაზე იმ არგუმენტით, რომ ეს იტალიელი სპეციალისტების რეკომენდაცია იყო და რომ ოპერაციას იტალიიდან მოწვეული ექიმები თავად ჩაატარებდნენ. ნ.ც.-ს განმეორებითი ოპერაცია 2018 წლის 10 დეკემბერს გაუკეთდა და ისევე, როგორც პირველი ოპერაცია იტალიელი სპეციალისტების ნაცვლად, შესაბამისი ლიცენზიის არმქონე ვ.ყ.-მ და მ.ხ-მ ჩაატარეს. ექიმების მიერ გამოვლენილი უყურადღებობისა და დაშვებული შეცდომების გამო პაციენტის მდგომარეობა გართულდა და იგი დღემდე კომატოზურ მდგომარეობაში იმყოფება.
გამოძიებით ასევე დადგინდა, რომ პაციენტისთვის ჩატარებული ორივე ოპერაციის დროს კლინიკას გ.ლ. ხელმძღვანელობდა, რომელმაც ჯეროვნად არ შეასრულა თავისი სამსახურებრივი მოვალეობა. ნ.ც.-ს მიმართ დაგეგმილ ოპერაციას, მის მიმდინარეობას, ექიმების შესაბამისი ლიცენზიის არსებობის კონტროლის საკითხს, ასევე პაციენტის სიცოცხლესა და ჯანმრთელობას მოეკიდა დაუდევრად.
ვ.ყ.-ს ბრალდება საქართველოს სისხლის სამართლის კოდექსის 180-ე მუხლის მეორე ნაწილის „ბ“ და მესამე ნაწილის „ა“ ქვეპუნქტებით, 246-ე მუხლის I ნაწილით წარედგინა, რაც სასჯელის სახედ და ზომად ექვსიდან ცხრა წლამდე თავისუფლების აღკვეთას ითვალისწინებს.
გ.ლ.-ს ბრალდება სისხლის სამართლის კოდექსის 2201-ე მუხლის მეორე ნაწილით წარედგინა, რაც სასჯელის სახედ და ზომად ორიდან ხუთ წლამდე თავისუფლების აღკვეთას ითვალისწინებს.
რაც შეეხება მ.ხ.-ს, იმის გათვალისწინებით, რომ მას საქართველოს ტერიტორია დატოვა და უარს აცხადებს საგამოძიებო ორგანოში გამოცხადებაზე, მის მიმართ დაუსწრებლად იქნა გამოტანილი დადგენილება სისხლის სამართლის კოდექსის 246-ე მუხლის I ნაწილით, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.
საქართველოს პროკურატურა სამივე ბრალდებულის მიმართ აღკვეთის ღონისძიების სახედ პატიმრობის გამოყენების შუამდგომლობით, თბილისის საქალაქო სასამართლოს მიმართავს,"- განაცხადეს პროკურატურაში.
სამსახურებრივი გულგრილობის, თაღლითობისა და უკანონო საექიმო საქმიანობის ბრალდებით დაკავებული „თბილისის ცენტრალური საავადმყოფოს“ დირექტორისა და ექიმის ადვოკატი, სალომე ჯანუაშვილი აცხადებს, რომ ის გარემოებები, რასაც პროკურატურა მისი დაცვის ქვეშ მყოფ პირებს ედავება, სიმართლეს არ შეესაბამება და დაკავებულები ბრალს არ აღიარებენ.
როგორც ადვოკატი ამბობს, საქმესთან დაკავშირებით უფრო დეტალურად მას შემდეგ ეცოდინება, რაც დაკავებულებს ბრალს ოფიციალურად წარუდგენენ და ბრალდების დოკუმენტს გაეცნობა.
„ბრალის წარდგენის პროცედურა ახლა იქნება. შევდივარ დროებითი მოთავსების იზოლატორში, რომ შევხვდე ჩემი დაცვის ქვეშ მყოფებს. ასევე იქ შემოვა ბრალდების მხარეც, ამ შემთხვევაში, გამომძიებელი და ბრალის წარდგენის პროცედურა გაიმართება. თუმცა, მინდა გითხრათ, რომ იმ გარემოებებს, რასაც ბრალდების მხარე ედავება ჩემი დაცვის ქვეშ მყოფებს, არც ერთი მათგანი არ აღიარებს. კლინიკაში კონკრეტული პაციენტის მიმართ ყველა მოქმედება, ოპერაცია და პროცედურა კანონის სრული დაცვით მიმდინარეობდა, საქართველოს კანონმდებლობის შესაბამისი ლიცენზიის მქონე, კვალიფიციური სპეციალისტების მიერ. პაციენტისთვის და მისი ოჯახისთვის არასწორი მოლოდინი არც ექიმს და არც თავად კლინიკის წარმომადგენელს არ შეუქმნია და შესაბამისად, ის ბრალდებები, რომლებიც პროკურატურამ ბრიფინგზე დაასახელა, საერთოდ შეუსაბამოა და გამორიცხულია, ამან სასამართლოში რაიმე სახის დადასტურება მოიპოვოს.
საქმესთან დაკავშირებით უფრო დეტალურად ბრალის წარდგენის პროცედურის გავლისა და ბრალდების დოკუმენტის წაკითხვის შემდეგ შევიტყობ“, - განუცხადა "პირველ არხს" ჯანუაშვილმა.