საქართველოში კორონავირუსის 25 ახალი შემთხვევა გამოვლინდა. ინფორმაცია მთავრობის სპეციალურ ვებგვერდ stopcov.ge-ზე ცოტა ხნის წინ განახლდა.

ვებგვერდის მონაცემებით, ამ დროისთვის საქართველოში კორონავირუსის 1 250 შემთხვევაა დადასტურებული. გამოჯანმრთელდა კიდევ ათი პაციენტი – განკურნებულთა რაოდენობა სულ 1010-ს შეადგენს.

ამასთან, უცხოეთიდან სამკურნალოდ გადმოყვანილია საქართველოს 41 მოქალაქე.

გორში კორონავირუსი ჰოსპიტალის ექთანს დაუდასტურდა. როგორც საქართველოს პირველ არხს დაავადებათა კონტროლის შიდა ქართლის ცენტრში განუცხადეს, 26 წლის ქალს კორონავირუსი ზღვიდან ჩამოსვლის შემდეგ დაუდასტურდა. ახალი შემთხვევა არ უკავშირდება ინფიცირებული ექიმ ჰემატოლოგის კონტაქტს, რომელიც ასევე გორის სამხედრო ჰოსპიტალში მუშაობს.

როგორც დაავადებათა კონტროლის შიდა ქართლის ცენტრში აცხადებენ, ხვალიდან ეპიდემიოლოგები ახალი შემთხვევის კონტაქტების მოძიებას დაიწყებენ.

კორონავირუსის შედეგად, ქვეყანაში 17 პაციენტი გარდაიცვალა. კარანტინის რეჟიმში იმყოფება 7068 მოქალაქე, ხოლო სტაციონარში მეთვალყურეობის ქვეშ – 242.