„თბილსერვის ჯგუფის“ თანამშრომელი, ირაკლი ბაღდავაძე მისი სამსახურიდან გათავისუფლებას უკანონოს უწოდებს და პროტესტის უკიდურეს ზომას, შიმშილობას მიმართავს.
დასუფთავების სამსახურის ყოფილი თანამშრომლის მხარდასაჭერად დღეს „თბილსერვის ჯგუფის“ შენობასთან ოპოზიციური პარტიის წარმომადგენლებიც იმყოფებოდნენ. ისინი ხელმძღვანელ პირებთან შეხვედრას და ბაღდავაძის გათავისუფლების დამადასტურებელი დოკუმენტის წამოღებას აპირებდნენ, თუმცა მათ დაცვის თანამშრომლებმა შენობაში შესვლის უფლება არ მისცეს, რასაც მცირე სიტყვიერი დაპირისპირებაც მოყვა.
„თბილსერვის ჯგუფი“ ირაკლი ბაღდავაძის სამსახურიდან გათავისუფლების საკითხზე განცხადებას ავრცელებს, სადაც აღნიშნულია, რომ ირაკლი ბაღდავაძე დასუფთავების სამსახურის შრომითი კოლექტივის უკანონოდ გაფიცვის ორგანიზების, თანამშრომლებთან დაპირისპირებისა და მათზე მუქარის გამო გათავისუფლდა.
„თბილსერვის ჯგუფის“ მიერ ჩატარებული შიდასამსახურებრივი მოკვლევის საფუძველზე დადგენილია ირაკლი ბაღდავაძის მიერ ზემოთ აღნიშნული დარღვევების ჩადენის ფაქტები, რის გამოც მოხდა მისი სამსახურიდან გათავისუფლება“, – ნათქვამია განცხადებაში.
ინფორმაციას „პირველი არხი“ ავრცელებს.
