ცენტრალური საარჩევნო კომისია (ცესკო) ელექტრონულად ხმის დათვლის საპილოტე პროექტის განხორციელებაზე მსჯელობს. პროექტის დანერგვის შემთხვევაში, წინასწარ შერჩეული ოლქის რამდენიმე უბანზე ამომრჩევლები ხმის მიცემას ელექტრონული ტექნოლოგიის გამოყენებით შეძლებენ და კენჭისყრის შედეგები, ელექტრონული დათვლის საშუალებით, ხმის მიცემის პროცედურის დასრულებისთანავე იქნება ცნობილი.

ზემოაღნიშნული მიზნის მისაღწევად ცესკო ერთ-ერთ მოწინავე კომპანიასთან აწარმოებს მოლაპარაკებებს; კომისია დღეს „სმარტმატიკს“ შეხვდა; კომპანიის წარმომადგენლებმა ცესკოს წევრებისთვის საჩვენებელი პრეზენტაცია გამართეს და დეტალურად ახსნეს თუ როგორ მოხდება ელექტრონული დანადგარის გამოყენება ხმის მიცემისა და დათვლის პროცესში.

„ჩვენ დღეს გვაქვს შესაძლებლობა განვიხილოთ პროექტის შესაძლებლობები, თუ რა სარგებელი ექნება ამით ერთის მხრივ ამომრჩეველს და მეორეს მხრივ საარჩევნო ადმინისტრაციას. ეს არის ერთ-ერთი შესაძლებლობა, რომელსაც მინიმუმამდე დაყავს ყოველგვარი მანიპულაციის შესაძლებლობა კენჭისყრის დღეს. ამასთან ქმნის შედეგების ძალიან მცირე დროში მიღების შესაძლებლობას, ფაქტობრივად კენჭისყრის პროცედურების დასრულებისთანავე, რამდენიმე წუთში იქნება შესაძლებელი იმ კონკრეტული უბნის შედეგების გამოცხადება. ამ დეტალური განხილვების შედეგად უახლოეს დღეებში ცესკო მიიღებს კონკრეტულ გადაწყვეტილებას“- განაცხადა ცესკოს თავმჯდომარე გიორგი კალანდარიშვილმა შეხვედრის დასრულების შემდეგ.

ტექნოლოგია, რომლის გამოყენებასაც საქართველოს ცესკო 2 ოქტომბრის არჩევნებზე რამდენიმე უბანზე ვარაუდობს, მსოფლიოს მასშტაბით ბევრ ქვეყანაშია გამოცდილი. მისი გამოყენებით ნაწილობრივ ან სრულად ტარდება არჩევნები ისეთ ქვეყნებში როგორებიცაა ამერიკის შეერთებული შტატები, დიდი ბრიტანეთი, საფრანგეთი და აზიის ბევრი ქვეყანა.

„ვიმედოვნებთ რომ საარჩევნო ადმინისტრაცია ტექნოლოგიური სიახლის დანერგვას შეუწყობს ხელს, რომლის პილოტირება 2021 წლის 2 ოქტომბრის არჩევნებზე მოხდება. აღნიშნული ტექნოლოგიური სიახლე უკვე დაინერგა მრავალ სხვა ქვეყანაში, ჩვენ აღნიშნულ სერვისს 25 სხვადასხვა ქვეყანაში ვახორციელებთ.“  - განაცხადა კომპანია სმარტმატიკის წარმომადგენელმა ლუის კორონელიმ დღევანდელი შეხვედრის შემდეგ.