ცენტრალურ საარჩევნო კომისიაში (ცესკო) საარჩევნო ადმინისტრაციაზე განხორციელებული ზეწოლისა და ბოლო პერიოდში გავრცელებული არასწორი ინფორმაციის  შესახებ ბრიფინგი გაიმართა.

როგორც ცესკოს პრეს-სპიკერმა ნათია იოსელიანმა განაცხადა, საუბნო და საოლქო საარჩევნო კომისიების წევრებზე მიმდინარეობს უპრეცედენტო ზეწოლა. ზოგიერთი პოლიტიკური ძალის წარმომადგენლები ცდილობენ ხელი შეუშალონ საარჩევნო  კომისიების საქმიანობას და მიზანმიმართულად დააზიანონ საარჩევნო პროცესი.  

„უსაფუძვლო ბრალდებები და ზეწოლა განსაკუთრებით საოლქო საარჩევნო კომისიების მიმართ მიმდინარეობს. ამის მაგალითია დღეს მომხდარი ფაქტი ლანჩხუთის საოლქო საარჩევნო კომისიაში, სადაც ერთიანი ნაციონალური მოძრაობის წევრი ჟურნალისტების თანხლებით შეიჭრა. ის საოლქო საარჩევნო კომისიის თავმჯდომარეზე ახდენდა ზეწოლას და ემუქრებოდა მას, მისი მხრიდან ასევე ადგილი ჰქონდა მუქარას და ბრალდებებს თავმჯდომარის მოადგილის მიმართაც.

კიდევ ერთხელ გვინდა ცალსახად განვაცხადოთ, რომ საოლქო საარჩევნო კომისიამ საუბნო საარჩევნო კომისიების წევრები კანონმდებლობის სრული დაცვით აირჩია და ბრალდება, რომ საოლქო საარჩევნო კომისია „ნიშნავს“ პოლიტიკურად მიკერძოებულ პირებს, არის სიცრუე, რომელსაც აქვს ერთადერთი მიზანი - მოქალაქეები შეიყვანოს შეცდომაში.

საოლქო საარჩევნო კომისიების წარმომადგენლებს მოვუწოდებთ, გააგრძელონ კანონით განსაზღვრული საქმიანობის ნეიტრალურად განხორციელება. არ აყვნენ  პროვოკაციებს. ზეწოლის ან მუქარის შემთხვევაში იმოქმედონ კანონის შესაბამისად. სრულ მხარდაჭერას ვუცხადებთ საოლქო საარჩევნო კომისიებს მათ საქმიანობაში და მზადების პროცესში 2 ოქტომბრის არჩევნებისთვის. და ამასთან ვაცხადებთ, რომ ყოველთვის გვექნება შესაბამისი რეაგირება ნებისმიერი სახის კანონსაწინააღმდეგო ქმედებაზე.

საარჩევნო ადმინისტრაცია სრული დატვირთვით მუშაობს მაღალ დონეზე ორგანიზებული არჩევნების ჩასატარებლად. მოვუწოდებთ არჩევნებში ჩართულ ყველა მხარეს, თუ აქვთ რომელიმე საარჩევნო მოხელის მიკერძოებული საქმიანობის დამადასტურებელი დოკუმენტი, წარმოადგინონ კანონით განსაზღვრული წესით  და ნუ გაავრცელებენ მედია საშუალებებით არასწორ ინფორმაციას, როგორც აღვნიშნეთ, მიუღებელია მათზე ზეწოლა და მუქარაც. რამაც მოქალაქეები შეიძლება შეცდომაში შეიყვანოს და ასევე გამოიწვიოს მათში უნდობლობის განცდა, როცა საარჩევნო ადმინისტრაციის მთელი შემადგენლობა ემსახურება იმას, რომ ამომრჩეველი მივიდეს 2 ოქტომბერს არჩევნებზე და თავისუფლად მიიღოს კენჭისყრაში მონაწილეობა“,-განაცხადა ნათია იოსელიანმა.

დღევანდელ ბრიფინგზე ცესკოს სახელის გამოყენებით შექმნილ ინტერნეტგვერდებზე განცხადება ინფორმაციის დაცულობის ცენტრის  სპიკერმა თორნიკე გოგისვანიძემ გააკეთა.

მისი თქმით, ინფორმაციის დაცულობის ცენტრის მონიტორინგმა აჩვენა, რომ ბოლო დღეებია სოციალურ ქსელებსა და ზოგადად ინტერნეტ სივრცეში საარჩევნო პროცესთან დაკავშირებით ინტენსიური დეზინფორმაციული კამპანია მიმდინარეობს, რომელიც საზოგადოების შეცდომაში შეყვანას ისახავს მიზნად.

უკვე მეორე დღეა, რაც ინტერნეტ სივრცეში გამოჩნდა ვებგვერდი cesko.cf, რომელიც განთავსებული მასალების მიხედვით ფაქტობრივად არის ცენტრალური საარჩევნო კომისიის გვერდის ანალოგი. აღნიშნული გვერდი იყენებს არამხოლოდ ცესკოს ლოგოს, არამედ ბრენდისთვის დამახასიათებელ ყველა დეტალს. ვებგვერდზე ამჟამად მიმდინარეობს გამოკითხვა არჩევნებთან დაკავშირებით და მითითებულია, რომ აღნიშნული გამოკითხვა ასახავს არჩევნების რეალურ შედეგებს, რაც ცალსახად არის ტყუილი და ემსახურება ამომრჩევლის შეცდომაში შეყვანას.

„ცენტრალურმა საარჩევნო კომისიამ უკვე მიმართა სოციალური ქსელის „ფეისბუქი“ ადმინისტრაციას აღნიშნულ ქმედებასთან დაკავშირებით და მოითხოვა ამ გვერდის  წაშლა.

ამასთან საყურადღებოა ის ფაქტიც, რომ ბოლო პერიოდში ინტერნეტ სივრცეში გამოჩნდა კიდევ რამდენიმე გვერდი, რომლის ტირაჟირებაც ხორციელდება პოლიტიკურად დაინტერესებული მხარეების მიერ და სადაც განთავსებულია ინფორმაცია საარჩევნო თემატიკასთან დაკავშირებით. სავარაუდოა,  რომ აღნიშნული გვერდების შექმნის მიზანს საზოგადოების შეცდომაში შეყვანა წარმოადგენს. ასეთი ტიპის გვერდად მოიაზრება მაგალითად cec.org.ge.

მაგალითისთვის გეტყვით, რომ ვებგვერდის cec.org.ge მიერ გავრცელებულ ვიდეოში, სადაც საუბარია ამომრჩეველთა სიაში თავის გადამოწმების შესახებ, გაჟღერებულია არასწორი მოწოდება იმის შესახებ, თუ როგორ უნდა მოიქცეს ამომრჩეველი სიაში ხარვეზის აღმოჩენის შემთხვევაში.

მივმართავთ არჩევნებში ჩართულ მხარეებს, დაინტერესდნენ ჩვენს მიერ გამოვლენილი ფაქტებით, რომლებიც ამომრჩევლის დეზორიენტაციას იწვევს.

ამომრჩევლებს კი მივმართავთ საარჩევნო საკითხებზე ინფორმაციის მიღებისას ყურადღებით დააკვირდნენ ინფორმაციის გავრცელების წყაროს.

არჩევნებს ატარებს და საზოგადოებას ამ არჩევნების უტყუარ შედეგებს აწვდის მხოლოდ საარჩევნო ადმინისტრაცია, ხოლო ზემოაღნიშნულის მსგავსი აქტივობები არის ამომრჩევლის შეცდომაში შეყვანის და დეზორიენტაციის მცდელობა.

შესაბამისად, ყველა ზემოაღნიშნული აქტივობა შეიძლება განვიხილოთ როგორც საარჩევნო პროცესის მიზანმიმართული დაზიანება“, - განაცხადა თორნიკე გოგისვანიძემ.