[მედიანიუსი] 

საქართველოს პარლამენტის თავდაცვისა და უშიშროების კომიტეტის ყოფილი თავმჯდომარე, პარლამენტარი გიგი თარგამაძე რუსეთის ფედერაციაის ტერიტორიაზე მასობრივი არეულობის მომზადების საქმეში ბრალდებულად მიიჩნიეს, – იუწყება „რია ნოვოსტი“.

წყაროს ცნობით, თარგამაძე არეულობას რუს ოპოზიციონერებთან: სერგეი უდალცოვთან, კონსტანტინ ლებედევსა და ლეონიდ რაზვოზჟაევთან ერთად აპირებდა.

„თარგამაძეზე საერთაშორისო ძებნა გამოცხადდა. გამომძიებლები უახლოეს პერიოდში სასამართლოს მისი დაუსწრებლად დაპატიმრების შუამდგომლობით მიმართავენ“, – აცხადებს საგამოძიებო კომიტეტის ოფიციალური წარმომადგენელი ვლადიმირ მარკინი.

"რუსეთის საგარეო უწყებიდან მივიღეთ ოფიციალური პასუხი, რომ თარგამაძე არ სარგებლობს რაიმე სახის იმუნიტეტით სისხლის სამართლებრივ დევნასთან დაკავშირებით", – დასძინა ვლადიმირ მარკინმა.

მისი ინფორმაციით, გამოძიებას აქვს სამხილები, რომლებიც ადასტურებს როგორც თარგამაძის მიერ რუსული ოპოზიციის დაფინასებას, ისე მოსკოვში 2012 წლის 6 მაისს ბოლოტნაიას მოედანზე მასობრივ არეულობაში მის მონაწილეობას.

„რია ნოვოსტის“ ცნობით, საქართველოს მთავარმა პროკურატურამ განაცხადა, რომ თარგამაძეს რუსეთს არ გადასცემს, რადგან ამას ქვეყნის კონსტიტუცია კრძალავს.