ტექნიკური უნივერსიტეტის მეექვსე კორპუსში მასობრივი ვაქცინაციის ცენტრი გაიხსნა, სადაც რესპუბლიკური საავადმყოფოს ვაქცინაციის ჯგუფები მუშაობენ.
როგორც რესპუბლიკური საავადმყოფოს დირექტორის მოადგილემ, ჯავარა უგრეხელიძემ განაცხადა, ვაქცინაციის ცენტრში ერთდროულად მუშაობს ამცრელთა ექვსი ჯგუფი.
„ვცრით ყველა ტიპის ვაქცინით „სინოფარით“, „სინოვაკითა“ და „ფაიზერით“. მოსახლეობას წინასწარი რეგისტრაციის გარეშე შეუძლია, მოგვმართოს, მიიღოს დახმარება და აიცრას მისთვის სასურველი ვაქცინით. დღიურად ამ ცენტრს შეუძლია 2000 მოქალაქეზე მეტის გატარება. ეს ცენტრი მუშაობს 10:00 საათიდან 20:00 საათამდე, ყოველდღე შესვენებისა და დასვენების დღეების გარეშე. მოქალაქეს შეუძლია, მოვიდეს, ჩადგეს ცოცხალ რიგში, მაგრამ იმის გამო, რომ ძალიან ბევრი დამხმარე პერსონალი გვყავს, ფაქტობრივად რიგში დაყოვნება არ ხდება, გაიაროს ადგილზე ოპერატორთან რეგისტრაცია, შემდეგ გაიაროს კონსულტაცია ექიმთან, დაასახელოს მისთვის სასურველი ვაქცინა და აიცრას. დაწესებული 30-45 წუთი გაატაროს ძალიან კომფორტულ გარემოში და შემდეგ ვაქცინირებულმა დატოვოს სივრცე. ეს არის ძალიან კარგი შანსი, რომ ბოლო მოვუღოთ ამ პანდემიას და გამოვიდეთ ამ მდგომარეობიდან“, – განაცხადა ჯავარა უგრეხელიძემ.
ამასთან, როგორც ჯანდაცვის მინისტრის მოადგილე გიორგი წოწკოლაურმა განაცხადა, ტექნიკური უნივერსიტეტში გახსნილ მასობრივი ვაქცინაციის ცენტრში დილიდან უკვე 200-ზე მეტი მოქალაქე აიცრა.
„ტექნიკური უნივერსიტეტის ბაზაზე დღეს დილიდან გაიხსნა მასობრივი იმუნიზაციის ცენტრი, სადაც ნებისმიერ მოქალაქეს შეუძლია, მობრძანდეს და წინასწარი რეგისტრაციის გარეშე ჩაიტაროს ვაქცინაცია. ეს არის ნამდვილად დიდი სიკეთე ჩვენი მოსახლეობისთვის. აქვე გეტყვით, რომ ეს ცენტრი 10:00 საათზე გაიხსნა და ორ საათზე ნაკლებ დროში უკვე 200-ზე მეტი ჩვენი მოქალაქე არის მოსული და ვაქცინირებული. კიდევ ერთხელ მოვუწოდებ ჩვენს მოსახლეობას, მეტად იაქტიურონ, მოვიდნენ და აიცრან, ეს არის ჩვენი ამ ჩიხური ვითარებიდან გამოსვლის ერთადერთი გზა“, – განაცხადა წოწკოლაურმა.
ვაქცინაციას სჭირდება მართვა და მთავრობას სჭირდება გვერდში დგომა. ძალიან ელემენტარული წესების დაცვაა საჭირო, როგორიც არის პირბადის ტარება, დისტანცია და ხალხმრავალი შეკრებების, ქეიფების, ქორწილების და ქელეხების, სამწუხაროდ, არ გამართვა, – ამის შესახებ საქართველოს პრემიერ-მინისტრმა, ირაკლი ღარიბაშვილმა ლაგოდეხის მუნიციპალიტეტში, „ქართული ოცნების“ ლაგოდეხის მერობის კანდიდატის, ჯონდო მდივნიშვილის წარდგენაზე, სიტყვით გამოსვლისას განაცხადა.
მთავრობის მეთაურმა კიდევ ერთხელ მოუწოდა საზოგადოებას, რომ მაქსიმუმ 2-3 თვე არ გადაიხადონ ქორწილები და ქელეხები, რადგან სწორედ ეს არის ერთ-ერთი ყველაზე მთავარი გამავრცელებელი ვირუსის.
„თქვენი მისამართით და ზოგადად, მედია გვესწრება და მინდა, კიდევ ერთხელ, მივმართო მოსახლეობას თხოვნით, რომ ეს პერიოდი, მაქსიმუმ 2-3 თვე გავიჭირვოთ და ეს ქორწილები და ქელეხები არ გადავიხადოთ. ეს არის ერთ-ერთი ყველაზე მთავარი ბუსტერი, გამავრცელებელი ვირუსის. ქორწილის გადახდა შემოდგომაზე, მგონი, კიდევ უფრო სასურველია. ჩვენ ახლა მოგვიწია გარკვეული შეზღუდვების დაწესება, გუშინ მივიღეთ გადაწყვეტილება, რომ გარკვეული შეზღუდვები დავაწესოთ ქვეყანაში. ეს გადაწყვეტილება, რა თქმა უნდა, ჩვენი გათვლებით, არ იქონიებს რეალურ გავლენას ეკონომიკის ზრდაზე და მეორეს მხრივ, მინდა, აქვე ვისაუბრო, კიდევ ერთხელ, ვაქცინაციის მნიშვნელობაზე. ბევრმა ქვეყანამ ჯერ კიდევ ვერ შეძლო ვაქცინების საკმარისი რაოდენობის შეტანა, ჩვენ ეს მოვახერხეთ. ოპონენტები გვაკრიტიკებენ, კიდევ რაღაცებს გვაბრალებენ, მაგრამ ფაქტი არის სახეზე და ჩვენ ყოველთვის შედეგზე უნდა ვისაუბროთ. შედეგი არის ის, რომ ქვეყანაში 3 მლნ-ზე მეტი ხარისხიანი ვაქცინა გვაქვს – „ფაიზერი“, ჩინური ვაქცინები და ყველაფერი, რაც ხელმისაწვდომია ჩვენი მოსახლეობისთვის“, – აღნიშნა ირაკლი ღარიბაშვილმა.
პრემიერ-მინისტრმა ხაზი გაუსვა, რომ აღნიშნული აცრა არის აბსოლუტურად უსაფრთხო და არავითარი გვერდითი მოვლენები, გართულებები არ ახლავს.
„მიმდინარეობს ტენდენცია გლობალური და ვისმენთ რა, ჯანმრთელობის მსოფლიო ორგანიზაციის შეფასებებს, პროგნოზებს, ეს პანდემია გაგრძელდება, მეგობრებო. ეს არ დასრულდება წლის ბოლოს. ვინმეს არ ჰქონდეს პროგნოზი და განცდა, რომ მთელ მსოფლიოში პანდემია დასრულდება წლის ბოლო, ასე არ იქნება, არ მოხდება, შესაძლოა გაგრძელდეს კიდევ რამდენიმე წელიწადი, 2-3. მეცნიერები ვერ ამბობენ ზუსტ პროგნოზს, იმიტომ, რომ დამოკიდებულები არიან ადამიანების, ანუ ჩვენს ქცევაზე. ჩვენი ქცევა რა უნდა იყოს ამ შემთხვევაში, ყველაზე გონივრული და მომიტევეთ, ჩემს მოკრძალებულ აზრს გეტყვით კიდევ ერთხელ – აუცილებელია აცრის ჩატარება, როგორც ადამიანები იცრებიან ჩვეულებრივ, გრიპის საწინააღმდეგო ვაქცინებით, ანალოგიურად მიმდინარეობს ტენდენცია და საუბარი იმაზე, რომ ანალოგიურად დაიწყება და დამკვიდრდება მომდევნო 2-3 წლის განმავლობაში აღნიშნული აცრების ჩატარება. აცრა არის აბსოლუტურად უსაფრთხო, არავითარი გვერდითი მოვლენები, გართულებები არ ახლავს აღნიშნულ აცრას. ამერიკის შეერთებული შტატებია ყველაზე ძლიერი ქვეყანა და სექტემბერში საბოლოოდ დაამტკიცებს „ფაიზერის“ ვაქცინას და ზოგადად, გამოაცხადებს, რომ ყველა დონის ავტორიზაცია გაიარა ვაქცინებმა, რაც ნიშნავს იმას, რომ ამერიკა, საკუთარი მოქალაქეებისთვის სავალდებულოს გახდის ვაქცინების მიღებას. შესაბამისად, ჩვენ გვინდა, თუ არ გვინდა, ამის გაკეთება მოგვიწევს. ვინც აცრას არ ჩაიტარებს, სამწუხაროდ, უნდა ვთქვათ და ვუყურებთ ამ რეალობას, გარდაცვალება მოგვემატება, ამიტომ, ამისგან თავის დაზღვევის მიზნით, საჭირო არის ძალიან მარტივი აცრის ჩატარება. გვაქვს საკმარისი რაოდენობის ვაქცინები და უნდა ავიცრათ ყველა, დავარწმუნოთ ჩვენი მშობლები, შვილები, ახლობლები, მეგობრები, რომ ყველა ავიცრათ. მე აცრილი ვარ, ჩემი ოჯახის ყველა წევრი აცრილია. მთავარი არგუმენტი, კიდევ ერთხელ მინდა ვუთხრა ჩვენს მოსახლეობას, რომ აცრა გვიცავს სიკვდილისგან. რამდენიმე ადამიანი ვიცი ჩემს ირგვლივ, ახლობლები, რომლებიც ძალიან ჯანმრთელები, გარდაიცვალნენ კოვიდის გამო. ისინი ვერ წარმოიდგენდნენ, რომ კოვიდს შეეძლო გამოეწვია მათი სიკვდილი, მაგრამ, სამწუხაროდ, ასე მოხდა. ამიტომ, უნდა დავარწმუნოთ ყველა, რომ ავიცრათ და დავიცვათ ჩვენი თავი, ოჯახის წევრები, ახლობლები და ჩვენი ქვეყანა“, – განაცხადა მთავრობის მეთაურმა.
ინფორმაციას „პირველი არხი“ ავრცელებს.
